Chuir an tOmbudsman Eorpach Teresa Anjinho fáilte roimh fhreagra cuiditheach foriomlán an Choimisiúin Eorpaigh ar a cuid torthaí i sraith fiosrúchán a bhaineann le cinnteoireacht phráinneach.

Ina fhreagra, d’aithin an Coimisiún a thábhachtaí atá sé a áirithiú go ndéantar maoluithe ar a rialacha caighdeánacha maidir le ceapadh beartas i gcás práinne a thaifeadadh agus a mhíniú i gceart. Mar chuid dá phleananna chun athbhreithniú a dhéanamh ar na rialacha inmheánacha sin, chuir an Coimisiún in iúl freisin go ndéanfaidh sé machnamh ar bhealaí chun a bheith níos trédhearcaí ina mheasúnuithe ar an ngá atá le gníomhú go práinneach.

Mar a leagtar amach i moltaí an Ombudsman, ní mór don Choimisiún a áirithiú, mar a cheanglaítear leis na Conarthaí agus leis an gcásdlí, go ndéanfar tograí reachtacha ‘práinneacha’ a ullmhú ar bhealach trédhearcach, fianaisebhunaithe agus cuimsitheach.

Déanfaidh an tOmbudsman anailís mhionsonraithe anois ar fhreagra an Choimisiúin sula dtiocfaidh sé ar chonclúidí críochnaitheacha. Cuirfidh a hanailís san áireamh freisin an t-aiseolas a bhfuil súil aici a fháil ó na gearánaigh.

Cúlra

Rinne an tOmbudsman trí fhiosrúchán ar leith bunaithe ar ghearáin inar scrúdaíodh a mhéid a chuir an Coimisiún a rialacha féin maidir le Rialáil Níos Fearr i bhfeidhm agus dréachtaí reachtacha á n-ullmhú aige maidir le dícheall cuí inbhuanaitheachta corparáidí (Omnibus I), an Comhbheartas Talmhaíochta (CBT), agus smuigleáil imirceach a chomhrac.

D’aimsigh sí roinnt easnamh nós imeachta maidir leis an gcaoi ar chuir an Coimisiún na rialacha sin i bhfeidhm, arb ionann iad agus drochriarachán i dteannta a chéile.

In dhá mholadh réamhbhreathnaitheacha, d’iarr an tOmbudsman ar an gCoimisiún a áirithiú go gcuirfí na rialacha maidir le Rialáil Níos Fearr i bhfeidhm ar bhealach intuartha, comhsheasmhach agus neamhthreallach agus go mbeadh ullmhú práinneach tograí reachtacha amach anseo trédhearcach, fianaisebhunaithe agus cuimsitheach i gcónaí. Rinne sí roinnt moltaí freisin i bhfianaise an athbhreithnithe atá le teacht ar na rialacha.