Mar an chéad chéim eile ina fiosrúchán ar an gcaoi ar ullmhaigh an Coimisiún Eorpach pacáiste reachtach chun rialacha inbhuanaitheachta an AE do ghnólachtaí a shimpliú, d'iarr an tOmbudsman Anjinho mínithe mionsonraithe ar an bhfáth nach ndearnadh sraith céimeanna nós imeachta - dá bhforáiltear faoi rialacha inmheánacha - a chur i gcrích.

Go sonrach, d’iarr an tOmbudsman ar an gCoimisiún míniú a thabhairt ar a réasúnaíocht gan measúnú tionchair, comhairliúchán poiblí ná measúnú comhsheasmhachta aeráide a bheith aige, chomh maith leis an bhfáth nár mhair comhairliúchán inmheánach idir ranna an Choimisiúin maidir leis an dréacht-togra ach 24 uair an chloig.

Tagann an iarraidh ar thuilleadh faisnéise tar éis iarraidh chun iniúchadh a dhéanamh ar dhoiciméid ábhartha agus ar chruinniú idir ionadaithe ó Oifig an Ombudsman Eorpaigh agus ón gCoimisiún i mí an Mheithimh, inar mhínigh an Coimisiún an chaoi ar dhréachtaigh sé an togra reachtach chun an Treoir maidir le Tuairisciú Inbhuanaitheachta Corparáideach agus an Treoir maidir le Dícheall Cuí i dtaca le hInbhuanaitheacht Chorparáideach a leasú.

D’iarr an tOmbudsman ar an gCoimisiún mionléiriú a dhéanamh ar a réasúnaíocht maidir le ‘práinn chriticiúil’ an togra. Faoi na treoirlínte maidir le Rialáil Níos Fearr, ní mór údar maith a thabhairt le maoluithe ar cheanglais amhail measúnuithe tionchair agus iad a mhíniú go maith.

Ina theannta sin, d’iarr an tOmbudsman ar an gCoimisiún a mhíniú cén fáth nár measadh go raibh gá le comhairliúchán poiblí eile nuair is cosúil gurb é dhá chruinniú a tionóladh i mí Feabhra 2025, agus ar fhreastail ionadaithe gnó agus tionscail orthu den chuid is mó, an t-aon mhalartú páirtithe leasmhara a tionóladh i ndáil leis an reachtaíocht leasaithe atá beartaithe.

D’iarr an tOmbudsman soiléiriú freisin maidir le fad an chomhairliúcháin inmheánaigh idir ranna an Choimisiúin. I gcásanna áirithe, is féidir comhairliúcháin idir-rannacha den sórt sin a laghdú ó na 10 lá is gnách go dtí nós imeachta mear 48 n-uaire an chloig ach tugadh an nós imeachta sin i gcrích laistigh de 24 uair an chloig.

I bhfianaise thábhacht an fhiosrúcháin seo agus ós rud é go bhfuil pacáistí omnibus eile beartaithe, iarradh ar an gCoimisiún freagra a thabhairt faoin 15 Meán Fómhair 2025.

Is é seo an tríú fiosrúchán atá ar siúl faoi láthair ag Oifig an Ombudsman Eorpaigh i dtaobh ar lean an Coimisiún na rialacha is gá agus tograí reachtacha á n-ullmhú aige.

Baineann na fiosrúcháin eile leis an gcaoi ar ullmhaigh an Coimisiún togra chun reachtaíocht a bhaineann leis an gComhbheartas Talmhaíochta a leasú, chomh maith lena chinneadh gan measúnú tionchair a dhéanamh ar dhá thogra reachtacha atá dírithe ar smuigleáil imirceach a chomhrac.