D'oscail an tOmbudsman fiosrúchán faoin gcaoi a n-oibríonn an Coimisiún Eorpach ar thograí reachtacha 'práinneacha', amhail an leasú a rinneadh le déanaí ar Chomhbheartas Talmhaíochta (CBT) an AE. Baineann an fiosrúchán freisin leis an gcaoi a ndéanann an Coimisiún measúnú ar cé acu atá nó nach bhfuil a thograí comhsheasmhach le spriocanna aeráidneodrachta an Dlí Aeráide Eorpaigh.

Chuir eagraíochtaí comhshaoil imní in iúl don Ombudsman faoin gcaoi ar ullmhaigh an Coimisiún togra CBT, a glacadh níos luaithe i mbliana agus a bhfuil sé mar aidhm aige níos mó solúbthachta a thabhairt d'fheirmeoirí maidir le rialacha cosanta comhshaoil an AE a chomhlíonadh.

Cheistigh na heagraíochtaí an ndearna an Coimisiún scrúdú leordhóthanach ar cé acu a rinne nó nach ndearna na hathruithe difear d’inbhuanaitheacht fhadtéarmach chomhshaoil thalmhaíocht an Aontais. Cheistigh siad freisin an ndeachthas i gcomhairle go hiomchuí leis an bpobal maidir leis an togra reachtach ón gCoimisiún. Tá gá leis an gcéim sin faoi ‘Treoirlínte agus Bosca Uirlisí um Rialáil Níos Fearr’ inmheánach an Choimisiúin.

Mar chéad chéim, d’iarr an tOmbudsman ar an gCoimisiún freagra a thabhairt ar shraith ceisteanna. Áirítear orthu sin cé acu atá nó nach bhfuil nósanna imeachta inmheánacha aige chun cinneadh a dhéanamh maidir le ceanglais measúnaithe tionchair le haghaidh tograí reachtacha práinneacha a sheachaint agus conas a chloíonn sé le prionsabal na cinnteoireachta fianaisebhunaithe sna himthosca sin.

D’iarr an tOmbudsman ar an gCoimisiún freagra a thabhairt faoin 16 Nollaig 2024.