L-Ombudswoman Ewropew Teresa Anjinho kkonkludiet li r-rispons tal-Kummissjoni Ewropea għas-sejbiet tagħha relatati mat-tħejjija ta’ proposti leġiżlattivi urġenti huwa ġeneralment kostruttiv, iżda għadu ġenerali wisq biex jippermettilha tiddetermina jekk it-tfassil urġenti futur tal-liġijiet huwiex se jkun trasparenti, ibbażat fuq l-evidenza u inklużiv biżżejjed. Għalhekk, l-Ombudswoman se tkompli timmonitorja s-sitwazzjoni permezz ta’ lmenti futuri.

Fl-għeluq tal-inkjesti tagħha dwar kif il-Kummissjoni ħejjiet tliet proposti leġiżlattivi urġenti, l-Ombudswoman innotat li l-miżuri li l-Kummissjoni biħsiebha tieħu huma deskritti f’termini ġenerali biss u spiss huma nieqsa minn speċifiċità u impenji konkreti.

Il-Komunikazzjoni sussegwenti tal-Kummissjoni dwar kif biħsiebha tirriforma r-regoli għal Regolamentazzjoni Aħjar lanqas ma fiha biżżejjed dettall biex jinsiltu konklużjonijiet dwar jekk il-prinċipji kollha ta’ tfassil tajjeb tal-liġijiet humiex se jiġu rispettati f’sitwazzjonijiet urġenti u jekk ir-rakkomandazzjonijiet u s-suġġerimenti tal-Ombudswoman humiex se jiġu segwiti bis-sħiħ.

L-Ombudswoman sabet li għad hemm riskju li proċeduri urġenti jistgħu jsiru l-mod prevalenti tat-tfassil tal-liġijiet tal-UE jekk il-kunċett ta’ “urġenza” ma jkunx definit b’mod ċar. L-Ombudswoman innotat ukoll li hemm nuqqas ta’ dettall dwar l-istandards proċedurali u tat-tfassil tal-liġijiet li l-Kummissjoni se tapplika għal dawk li tqis li huma reviżjonijiet iżgħar tal-leġiżlazzjoni tal-UE (inizjattivi mmirati).

Barra minn hekk, hija staqsiet jekk l-intenzjoni tal-Kummissjoni li tuża “sejħiet għal evidenza” matul it-tfassil aċċellerat tal-liġijiet hijiex se tiżgura involviment suffiċjenti tal-partijiet ikkonċernati.

L-Ombudswoman se tkun tista’ tivvaluta aħjar dawn il-kwistjonijiet ladarba l-Kummissjoni tkun irrevediet ir-regoli tagħha għal Regolamentazzjoni Aħjar u tkun applikathom fit-tħejjija ta’ proposti leġiżlattivi futuri.

Sfond

F’Novembru 2025, l-Ombudswoman sabet għadd ta’ nuqqasijiet proċedurali fil-mod kif il-Kummissjoni ħejjiet proposti leġiżlattivi rapidi dwar id-diliġenza dovuta tas-sostenibbiltà korporattiva (Omnibus I), il-Politika Agrikola Komuni (PAK), u l-ġlieda kontra l-faċilitazzjoni ta’ dħul klandestin ta’ migranti.

Fir-rakkomandazzjonijiet tagħha lill-Kummissjoni, hija talbitha tiżgura applikazzjoni prevedibbli, konsistenti u mhux arbitrarja tar-regoli għal Regolamentazzjoni Aħjar u li t-tħejjija urġenti futura tal-proposti leġiżlattivi tkun dejjem trasparenti, ibbażata fuq l-evidenza u inklużiva.

Il-Linji Gwida għal Regolamentazzjoni Aħjar jistabbilixxu r-regoli li l-Kummissjoni ssegwi meta tħejji inizjattivi u proposti ġodda kif ukoll meta timmaniġġja u tevalwa l-leġiżlazzjoni eżistenti.

Il-Kummissjoni wieġbet għar-rakkomandazzjoni tal-Ombudsman fi Frar 2026 u ppubblikat Komunikazzjoni li tiddeskrivi l-intenzjoni tagħha li tirrevedi r-regoli għal Regolamentazzjoni Aħjar f’April 2026.