L-Ombudswoman Ewropew Teresa Anjinho fetħet inkjesta dwar kif il-Kummissjoni Ewropea ħejjiet proposta leġiżlattiva bħala parti mill-pakkett omnibus tagħha ta’ miżuri ta’ simplifikazzjoni.

Id-deċiżjoni li tinfetaħ inkjesta ssegwi lment minn tmien organizzazzjonijiet tas-soċjetà ċivili li jargumentaw li l-Kummissjoni kisret il-Linji Gwida tagħha għal Regolamentazzjoni Aħjar billi naqset milli tiġġustifika għaliex ma wettqitx konsultazzjoni pubblika jew valutazzjoni tal-impatt dwar l-abbozz tal-leġiżlazzjoni.

L-ilmentaturi jargumentaw ukoll li l-Kummissjoni kellha twettaq valutazzjoni tal-konsistenza klimatika kif previst mil-Liġi Ewropea dwar il-Klima.

F’dan l-istadju tal-inkjesta, l-Ombudswoman staqsiet lill-Kummissjoni sensiela ta’ mistoqsijiet. Huma jiffukaw fuq il-konsultazzjonijiet mal-partijiet ikkonċernati elenkati mill-Kummissjoni fil-memorandum ta’ spjegazzjoni li jakkumpanja l-proposta leġiżlattiva tagħha.

Dawn jinkludu talba għal aktar dettall dwar liema kumpaniji u partijiet ikkonċernati ġew mistiedna għal laqgħat mal-Kummissjoni fil-bidu ta’ Frar 2025 u bl-użu ta’ liema kriterji.

Il-Kummissjoni hija mitluba wkoll tispjega d-deċiżjoni tagħha li ma twettaqx konsultazzjoni pubblika.

Dan l-ilment huwa t-tielet wieħed li wasal għand l-Uffiċċju tal-Ombudsman fir-rigward ta' jekk il-Kummissjoni segwietx ir-regoli meħtieġa waqt li kienet qed tħejji proposti leġiżlattivi.

Miż-żewġ ilmenti l-oħra, wieħed wassal għal inkjesta (li għadha għaddejja) dwar kif il-Kummissjoni ħejjiet proposta biex temenda l-leġiżlazzjoni relatata mal-Politika Agrikola Komuni u l-ieħor għadu fl-istadju ta' valutazzjoni inizjali mill-Uffiċċju tal-Ombudsman.