L-Ombudswoman Ewropew Anjinho fetaħ inkjesta dwar id-deċiżjoni tal-Kummissjoni Ewropea li ma twettaqx valutazzjoni tal-impatt fuq żewġ proposti leġiżlattivi biex tiġġieled il-faċilitazzjoni ta’ dħul klandestin ta’ migranti.

Id-deċiżjoni li tinfetaħ inkjesta ssegwi lment mill-organizzazzjonijiet tas-soċjetà ċivili li jargumentaw li l-Kummissjoni kisret il-“Linji Gwida għal Regolamentazzjoni Aħjar” tagħha billi ma wettqitx valutazzjoni tal-impatt meta ħejjiet il-proposti.

L-ilment tagħhom huwa relatat mat-tħejjija tad-direttiva dwar it-tisħiħ tal-kooperazzjoni tal-pulizija dwar il-prevenzjoni, id-detezzjoni u l-investigazzjoni tal-faċilitazzjoni ta’ dħul klandestin ta’ migranti kif ukoll ir-regolament għall-prevenzjoni u l-ġlieda kontra l-faċilitazzjoni ta’ dħul, tranżitu u soġġorn mhux awtorizzati fl-Unjoni.

 Bħala l-ewwel pass, l-Ombudswoman staqsiet lill-Kummissjoni sensiela ta’ mistoqsijiet inkluż dwar ir-raġunament għan-nuqqas ta’ twettiq ta’ valutazzjoni tal-impatt. Il-Kummissjoni hija mitluba wkoll tispjega l-urġenza wara l-proposti leġiżlattivi.

Din hija t-tielet inkjesta li għaddejja mill-Uffiċċju tal-Ombudsman Ewropew fir-rigward ta’ jekk il-Kummissjoni segwietx ir-regoli meħtieġa hekk kif tħejji proposti leġiżlattivi.

L-inkjesti l-oħra huma relatati ma’ kif il-Kummissjoni ħejjiet proposta biex temenda l-leġiżlazzjoni relatata mal-Politika Agrikola Komuni u kif il-Kummissjoni ħejjiet proposta leġiżlattiva dwar ir-rapportar korporattiv dwar is-sostenibbiltà u d-diliġenza dovuta.