L-Ombudsman Ewropew Emily O’Reilly nediet inkjesta wiesgħa dwar kif il-Kummissjoni tittratta l-hekk imsejħa każijiet ta’ “revolving doors” fost il-persunal tagħha. L-inkjesta hija parti minn monitoraġġ imsaħħaħ ta’ kif l-amministrazzjoni tal-UE timplimenta l-obbligi etiċi fuq il-persunal tal-UE li jiċċaqlaq għas-settur privat.

L-Ombudsman se jispezzjona 100 fajl tal-persunal relatati ma’ deċiżjonijiet mill-Kummissjoni dwar talbiet minn maniġers ta’ livell għoli u medju għall-approvazzjoni ta’ impjieg ġdid jew ta’ liv bla ħlas sabiex titwettaq attività oħra.

Il-fajls ikopru total ta’ 14-il Direttorat Ġenerali minbarra l-kabinetti kollha tal-kummissarji, is-Servizz Legali tal-Kummissjoni, is-Segretarjat Ġenerali, il-grupp ta’ riflessjoni intern u l-Bord tal-Iskrutinju Regolatorju. Il-kamp ta’ applikazzjoni wiesa’ għandu l-għan li jiżgura fehim wiesa’ ta’ kif tali deċiżjonijiet jittieħdu f’firxa ta’ dipartimenti tal-Kummissjoni.

Il-ġestjoni robusta tal-kwistjoni tar-“revolving doors” hija importanti biex tinżamm il-fiduċja fl-istituzzjonijiet tal-UE. Kwalunkwe perċezzjoni li r-regoli mhumiex qed jiġu infurzati kif suppost tirriskja li tqajjem mistoqsijiet dwar jekk l-amministrazzjoni tal-UE hijiex qed taġixxi bis-sħiħ fl-interess pubbliku.

L-effett korrużiv potenzjali ta' "revolving doors" mhux ikkontrollati huwa, fil-fehma tiegħi, sottovalutat - u din hija r-raġuni għaliex l-Uffiċċju tiegħi ffoka fuqu għal diversi snin.

Għandu jkun hemm aktar sensibilizzazzjoni fl-amministrazzjoni tal-UE dwar l-impressjoni li tagħmel fuq il-pubbliku meta persuni b’għarfien espert regolatorju jmorru fis-settur privat fejn l-għarfien u n-networks tagħhom jista’ jkollhom valur kummerċjali u valur ieħor sinifikanti. Dak il-fehim għadu mhux hemm,” qalet is-Sa O’Reilly.

L-Ombudsman wettqet diversi inkjesti relatati mar-revolving doors, inkluż waħda li tikkonċerna l-Awtorità Bankarja Ewropea (issa magħluqa) u waħda li tikkonċerna l-Aġenzija Ewropea għad-Difiża (għadha għaddejja). L-Ombudsman kitbet ukoll lill-Kummissjoni biex titlobha tiżgura l-konformità mal-kundizzjonijiet li fasslet meta approvat ir-rwol il-ġdid tal-ex Kummissarju Oettinger f’konsulenza dwar il-komunikazzjonijiet, li għandha kumpanija tat-tabakk bħala waħda mill-akbar klijenti tagħha fl-UE.

Rapport Annwali 2020

Illum, l-Ombudsman qed tniedi wkoll ir-Rapport Annwali tagħha għall-2020. Bħal fis-snin li għaddew, l-ilmenti relatati mat-trasparenza u l-obbligu ta’ rendikont kienu jirrappreżentaw l-akbar proporzjon ta’ inkjesti (25 %).

Ir-Rapport jiddokumenta l-monitoraġġ proattiv tal-Ombudsman ta’ kif l-istituzzjonijiet ewlenin tal-UE wieġbu fil-kuntest tal-kriżi tal-COVID-19. L-Ombudsman sabet li ċ-Ċentru Ewropew għall-Kontroll tal-Mard ma għandux biżżejjed setgħat biex iwettaq il-mandat tiegħu kif xieraq. Hija talbet ukoll lill-Kunsill itejjeb it-trasparenza tal-proċeduri tiegħu għat-teħid tad-deċiżjonijiet matul il-kriżi tal-COVID-19. Fl-2021, l-Ombudsman fetħet inkjesti dwar il-COVID-19 ibbażati fuq l-ilmenti dwar l-aċċess pubbliku għall-kuntratti tal-vaċċini ffirmati mill-Kummissjoni u dettalji dwar l-Istati Membri li qed jieħdu sehem fin-negozjar tal-kuntratti tal-vaċċini.

“Meta tinqala’ kriżi, it-trasparenza u r-responsabbiltà spiss jiġu sagrifikati favur l-espedjenza. Għalhekk huwa aktar u aktar importanti li l-amministrazzjonijiet pubbliċi jiġu mfakkra biex ikomplu jaġixxu b’mod li jiżgura l-akbar fiduċja pubblika,” qalet is-Sa O’Reilly.

L-2020 rat ukoll diversi inkjesti importanti relatati mat-teħid ta' deċiżjonijiet ambjentali, kif ukoll inkjesti dwar l-etika u dwar id-drittijiet fundamentali - bħal inkjesta dwar l-effettività tal-mekkaniżmu tal-ilmenti tal-Frontex.

Ir-rapport annwali tal-2020 jinsab hawnhekk.

Storja fuq il-web, li tenfasizza l-aktar każijiet u statistika rilevanti, tinsab hawnhekk.