Strasburgu, 03/02/2021

Inkjesta strateġika: OI/1/2021/KR

Suġġett: Kif il-Kummissjoni Ewropea tittratta l-isfida tar-“revolving doors” tal-persunal

Għażiż President,

Fi Frar 2019, għalaqt l-inkjesta strateġika tiegħi dwar kif il-Kummissjoni Ewropea timmaniġġja sitwazzjonijiet ta’ “bibien iduru” tal-membri tal-persunal tagħha (OI/3/2017/NF)^[1]. L-inkjesta wasslitni biex noħroġ għadd ta’ suġġerimenti lill-Kummissjoni, sabiex tkun tista’ tkompli tmexxi bl-eżempju f’dan il-qasam.

B’mod partikolari, enfasizzajt il-ħtieġa li l-Kummissjoni tieħu approċċ aktar robust fil-valutazzjoni ta’ każijiet fejn membri għolja tal-persunal jitilqu mis-servizz ċivili tal-UE. Impenjajt ruħi wkoll li nniedi inkjesta ta’ segwitu biex inħares aktar mill-qrib lejn kif il-Kummissjoni timmaniġġja każijiet bħal dawn.

Filwaqt li d-dritt għax-xogħol huwa dritt fundamentali tal-UE u kull każ għandu jiġi eżaminat individwalment, jistgħu jinqalgħu problemi jekk jitqajmu dubji f’moħħ ħafna Ewropej dwar il-possibbiltà li l-interess pubbliku jiġi kompromess permezz ta’ din il-prattika. Ċaqliq bħal dan jista’ jwassal għal kunflitt ta’ interess mal-interess leġittimu tal-Kummissjoni, u għalhekk tal-UE, biex tinżamm il-fiduċja pubblika.

Mill-aħħar inkjesta tiegħi, tqajjem aktar tħassib dwar din l-isfida dejjem akbar li qed tiffaċċja l-amministrazzjoni tal-UE ^[2]. Għalhekk iddeċidejt li issa niftaħ din l-inkjesta biex nivvaluta kif il-Kummissjoni mmaniġġjat in-notifiki ta’ wara l-impjieg tal-membri tal-persunal. Bħal fl-inkjesta preċedenti tiegħi (OI/3/2017/NF), din l-inkjesta speċifika mhux se tikkonċerna eks Kummissarji.

Fit-twettiq ta' din l-inkjesta, se nuża xi wħud mill-iżviluppi reċenti f'dan il-qasam, inklużi l-miżuri aktar b'saħħithom li l-Awtorità Bankarja Ewropea introduċiet wara l-inkjesta tiegħi s-sena l-oħra ^[3].

Bħala l-ewwel pass, napprezza jekk il-Kummissjoni tipprovdili lista tal-għadd ta’ notifiki li ttrattat matul l-aħħar sentejn (2019/2020) skont id-dispożizzjonijiet li ġejjin tar-Regolamenti tal-Persunal:

•  L-Artikolu 12b mal-Artikolu 40: liv bla ħlas biex wieħed jibda attività esterna,
•  Artikolu 16: attività wara t-tluq mill-Kummissjoni.

Jekk jogħġbok agħżel iż-żewġ listi skont id-Direttorat Ġenerali (DĠ), u speċifika l-għadd ta’ każijiet għal kull DĠ li jaqgħu taħt kull wieħed mill-artikoli ta’ hawn fuq u jekk jogħġbok inkludi:

(i) L-għadd ta' każijiet relatati ma' uffiċjali għolja ^[4] f'kull DĠ, u

(ii) L-għadd ta’ każijiet ta’ persunal f’pożizzjonijiet maniġerjali ^[5] f’kull DĠ.

Inkun grat jekk il-Kummissjoni tipprovdili din il-lista fi żmien xahar minn meta tirċievi din l-ittra.

L-Uffiċċju tiegħi mbagħad se jagħżel kampjun ta’ fajls minn għadd ta’ DĠs, u se jikkuntattja lill-Kummissjoni biex isib data xierqa għal spezzjoni u laqgħa. Fost affarijiet oħra, il-laqgħa se tkun opportunità biex jiġi evalwat il-progress li sar mill-Kummissjoni bi tweġiba għas-suġġerimenti li għamilt matul l-inkjesta preċedenti tiegħi.

Jekk il-persunal tiegħek ikollu xi mistoqsijiet, jista’ jikkuntattja lil dawk responsabbli li jittrattaw il-każijiet fl-uffiċċju tiegħi, is-Sinjura Angela Marcos Figueruelo jew is-Sur Koen Roovers.

Dejjem tiegħek,

Emily O'Reilly Ombudsman
Ewropew

[1] Ara: https://www.ombudsman.europa.eu/en/decision/en/110608, kif ukoll id-Deċiżjoni mehmuża.

[2] Ara l-istudju tad-Dipartiment Tematiku tal-Parlament Ewropew għad-Drittijiet taċ-Ċittadini u l-Affarijiet Kostituzzjonali "The Effectiveness of Conflict of Interest Policies in the EU - Member States" (L-Effikaċja tal-Politiki dwar il-Kunflitt ta' Interess fl-Istati Membri tal-UE), https://www.europarl.europa.eu/thinktank/en/document.html?reference=IPOL_STU%282020%29651697 (p.12); ara wkoll l-EUObserver: https://euobserver.com/institutional/149841 (23/10/20).

[3] Ara: https://www.ombudsman.europa.eu/en/decision/en/135141, kif ukoll id-Deċiżjoni mehmuża.

[4] Direttur Ġenerali jew ekwivalenti fil-gradi AD16/AD15, direttur jew ekwivalenti fil-gradi AD15/AD14

[5] Kap tal-unità u 'l fuq.