Strasburgu, 24/07/2014

Inkjesta fuq inizjattiva proprja dwar l-iżvelar ta' informazzjoni protetta (OI/1/2014/PMC)

Għażiż Sur President,

Fil-bidu ta' Frar 2014, il-Kummissjoni Ewropea ppubblikat l-ewwel Rapport tagħha tal-UE kontra l-Korruzzjoni [1], li qrajt b'interess kbir. Kif ir-Rapport ġustament jidentifika, il-korruzzjoni tista’ tagħmel ħsara serja lill-ekonomija u lis-soċjetà kollha kemm hi u, f’każijiet estremi, tista’ ddgħajjef il-fiduċja taċ-ċittadini fl-istituzzjonijiet u l-proċessi demokratiċi. Dawn huma kwistjonijiet li jeħtieġ li nindirizzaw b’mod attiv fil-livell tal-istituzzjonijiet tal-UE.

Ir-Rapport enfasizza l-iżvelar ta’ informazzjoni protetta bħala qasam li fih politiki effettivi jistgħu jgħinu biex jitnaqqsu l-opportunitajiet għall-korruzzjoni. Ir-Rapport innota, madankollu, li "[…] l-iżvelar ta' informazzjoni protetta jiffaċċja diffikultajiet minħabba r-riluttanza ġenerali li wieħed jirrapporta tali atti fi ħdan l-organizzazzjoni tiegħu stess, u l-biża' ta' ritaljazzjoni. F'dan ir-rigward, il-bini ta' kultura ta'integrità fi ħdan kull organizzazzjoni, is-sensibilizzazzjoni, u l-ħolqien ta' mekkaniżmi ta' protezzjoni effettivi li jagħtu fiduċja lil informaturi potenzjali huma kruċjali […]."[2]

L-Artikolu 22c tar-Regolamenti tal-Persunal, li daħal fis-seħħ fl-1 ta' Jannar 2014, jipprevedi wkoll li tiġi indirizzata l-kwistjoni msemmija hawn fuq fir-rigward tal-istituzzjonijiet tal-UE u l-persunal tagħhom. Dan jistipula li l-istituzzjonijiet tal-UE għandhom jistabbilixxu regoli interni li jkopru l-protezzjoni tal-informaturi u l-għoti ta’ informazzjoni lilhom, kif ukoll il-proċedura għat-trattament tal-ilmenti magħmula mill-informaturi dwar il-mod kif ġew ittrattati bħala riżultat tar-rapportar ta’ irregolaritajiet serji.

Sabiex jingħata effett lill-Artikolu 22c tar-Regolamenti tal-Persunal, l-Ombudsman abbozza regoli interni dwar l-iżvelar ta' informazzjoni protetta, bl-użu tal-Linji Gwida tal-Kummissjoni dwar l-Iżvelar ta' Informazzjoni Protetta bħala sors siewi ta' ispirazzjoni [3]. L-abbozz tar-regoli mbagħad ġie ċċirkolat lill-persunal kollu tal-Ombudsman, permezz tal-Kumitat tal-Persunal, bi stedina biex jitressqu l-kummenti. Minħabba l-obbligu tal-persunal li jirrapporta irregolaritajiet serji, inħass li huwa partikolarment importanti li l-persunal iħossu s-sjieda tar-regoli, li jifhemhom u li jħossu kunfidenti fil-protezzjoni li jipprovdu.

L-abbozz tar-regoli mbagħad ġie ppreżentat lill-Uffiċjal tal-Protezzjoni tad-Data tal-Ombudsman, f'konformità mal-prinċipju ta' responsabbiltà mħaddan mill-Kontrollur Ewropew għall-Protezzjoni tad-Data fil-"Politika dwar il-Konsultazzjonijiet fil-qasam tas-Superviżjoni u l-Infurzar"[4] tiegħu. Minħabba l-implikazzjonijiet tal-protezzjoni tad-data tal-iżvelar ta' informazzjoni protetta, l-Ombudsman qed jiffinalizza notifika dwar is-suġġett, li se tiġi ppreżentata lill-KEPD skont l-Artikolu 27 tar-Regolament dwar il-Protezzjoni tad-Data [5], flimkien mal-abbozz ta' regoli.

Fl-aħħar nett, l-abbozz tar-regoli qed ikun disponibbli wkoll fuq is-sit web tal-Ombudsman għal kummenti pubbliċi qabel ma tiġi adottata verżjoni finali.

Bħala Ombudsman, irrid nassisti lill-amministrazzjoni tal-UE biex tiżgura li qed tagħmel dak kollu li tista' biex tħeġġeġ lill-individwi li jikxfu irregolaritajiet serji jitkellmu. Huwa f'dan l-isfond li ddeċidejt li niftaħ din l-inkjesta fuq inizjattiva proprja [6] fir-rigward tal-iżvelar ta' informazzjoni protetta.

Jiena konxju/a li ħafna mill-istituzzjonijiet u l-korpi tal-UE adottaw gwida fir-rigward tal-iżvelar ta’ informazzjoni protetta. Minħabba l-ħtieġa li jiġu adottati regoli interni li jikkonformaw mal-Artikolu 22c, l-inkjesta fuq inizjattiva proprja tiffoka prinċipalment fuq dak l-obbligu speċifiku.

Għalhekk qed nikteb lill-istituzzjonijiet u l-korpi kollha tal-UE li huma rrappreżentati fil-Kulleġġ tal-Kapijiet tal-Amministrazzjoni [7], u qed nitlobhom jinfurmawni dwar il-passi li ħadu, jew li biħsiebhom jieħdu, biex jagħtu effett lill-Artikolu 22c tar-Regolamenti tal-Persunal.

B’mod partikolari, inkun grat jekk tkun tista’ tipprovdili 

(i) informazzjoni dwar jekk l-istituzzjoni tiegħek tkunx diġà adottat, jew meta tkun biħsiebek tadotta, ir-regoli interni meħtieġa mill-Artikolu 22c tar-Regolamenti tal-Persunal u l-forma li dawn ir-regoli jieħdu, jew se jieħdu;

(ii) informazzjoni dwar il-proċedura għall-adozzjoni tar-regoli interni msemmija, jekk applikabbli. B’mod partikolari, inkun interessat li nkun naf jekk, fil-proċess ta’ adozzjoni, il-persunal tiegħek u/jew il-pubbliku ġenerali kellhomx l-opportunità li jagħtu l-fehmiet tagħhom u, jekk iva, b’liema mod;

(iii) kopja tar-regoli msemmija jew abbozz preliminari tagħhom, jekk applikabbli; u

(iv) kwalunkwe informazzjoni utli oħra dwar dan is-suġġett. B'mod partikolari, peress li l-ġestjoni tal-fondi pubbliċi tikkonċerna mhux biss il-persunal tal-istituzzjonijiet tal-UE, iżda wkoll partijiet terzi, bħal kuntratturi u sottokuntratturi, nistiednek tirrifletti dwar kif l-informaturi esterni, filwaqt li jaqgħu barra mill-kamp ta' applikazzjoni tar-regoli interni ta' istituzzjoni dwar l-iżvelar ta' informazzjoni protetta, jistgħu jiġu mħeġġa jirrapportaw irregolaritajiet serji u kif jistgħu jiġu protetti bl-aħjar mod jekk jagħmlu dan [8]. 

Jekk jogħġbok innota li nista' nqis li jkun utli li t-tweġiba tiegħek tkun disponibbli fuq is-sit web tal-Ombudsman.

Inkunlek grat jekk tibgħat it-tweġiba tiegħek sal-31 ta' Ottubru 2014.  Jekk is-servizzi tiegħek jeħtieġu aktar informazzjoni jew kjarifiki dwar din l-inkjesta fuq inizjattiva proprja, jekk jogħġbok toqgħodx lura milli tikkuntattja lill-uffiċjal legali li jittrattaha, is-Sur Philipp-Maximilian Chaimowicz (tel: +32 2 284 67 68).

Dejjem tiegħek,

Emily O'Reilly