Ar fhiosrúchán a bhaineann le samhlacha intleachta saorga ilchuspóireacha agus tomhaltas fuinnimh a dhúnadh, mhol an tOmbudsman Eorpach Teresa Anjinho don Choimisiún Eorpach leanúint d’fheabhas a chur ar réitigh theicniúla chun é a chur ar a gcumas do sholáthraithe intleachta saorga meastachán níos fearr a dhéanamh ar úsáid fuinnimh a samhlacha agus na cuspóirí a leagtar amach i nGníomh an Aontais um an Intleacht Shaorga a bhaint amach.

Tháinig fiosrúchán an Ombudsman sna sála ar ghearán ó Fheisire de Pharlaimint na hEorpa a léirigh imní faoi neamhréireachtaí a d’fhéadfadh a bheith ann maidir le tomhaltas fuinnimh idir an Gníomh um an Intleacht Shaorga agus treoirlínte atá ceaptha cabhrú lena chur chun feidhme le haghaidh samhlacha intleachta saorga ilchuspóireacha – an Cód Cleachtais.

Ina torthaí, d’admhaigh an tOmbudsman nach bhfuil sa Chód Cleachtais ach beart sealadach chun comhlíonadh an Ghnímh um an Intleacht Shaorga a áirithiú. Chuir sí i bhfios go láidir go bhfuil sé d’oibleagáid ar an gCoimisiún faireachán agus meastóireacht rialta a dhéanamh ar an gcaoi a bhfuil ag éirí leis an gCód agus a athbhreithniú agus a oiriúnú a spreagadh más gá. I ndeireadh na dála, féadfar ionstraimí spriocdhírithe amhail caighdeáin chomhchuibhithe a chur in ionad an Chóid.

Cúlra

Leis an nGníomh um an Intleacht Shaorga, ceanglaítear ar sholáthraithe intleachta saorga ilchuspóirí doiciméadacht theicniúil atá cothrom le dáta a choinneáil faoina samhlacha, lena n-áirítear faisnéis faoi thomhaltas fuinnimh. Mura bhfuil an fhaisnéis is gá ag soláthraí samhla chun meastachán a dhéanamh ar ídiú fuinnimh, cuireann an Cód Cleachtais atá ann faoi láthair ar a gcumas a mhíniú cén fhaisnéis nach bhfuil acu. Déanfaidh Oifig um Intleacht Shaorga an Choimisiúin a measúnú féin ansin bunaithe ar na mínithe a fhaigheann sí ó sholáthraí na samhla maidir leis an bhfaisnéis atá in easnamh orthu, chomh maith le sonraí eile atá ar fáil di.