L-ilmentatur, organizzazzjoni mhux governattiva Pollakka, qajjem tħassib mal-Kummissjoni Ewropea dwar proposta leġiżlattiva dwar sistemi tal-ikel sostenibbli kif previst skont l-Istrateġija tal-UE "Mill-Għalqa sal-Platt". L-ilmentatur sostna li l-Kummissjoni kienet wettqet ħidma preparatorja u konsultazzjonijiet dwar il-proposta iżda mbagħad irtiratha mill-pjan tagħha ta’ attivitajiet leġiżlattivi li jmiss mingħajr ma pprovdiet spjegazzjoni suffiċjenti.

Matul l-inkjesta tal-Ombudsman, il-Kummissjoni spjegat li kienet irrevediet il-prijoritajiet politiċi tagħha minħabba tfixkil ekonomiku kkawżat mill-invażjoni tal-Ukrajna mir-Russja, il-protesti tal-bdiewa madwar l-UE, u tħassib usa’ tal-partijiet ikkonċernati dwar l-agrikoltura tal-UE.

Fl-2025, il-Kummissjoni adottat “Viżjoni għall-Agrikoltura u l-Ikel” ġdida. Peress li dan id-dokument ma semmax qafas għal sistemi tal-ikel sostenibbli, il-Kummissjoni spjegat li kienet temmen li kien ċar għall-partijiet ikkonċernati li din l-inizjattiva kienet twaqqfet. Barra minn hekk, il-Kummissjoni indikat li kienet fil-proċess li taġġorna l-informazzjoni dwar l-inizjattivi ta’ politika kollha tagħha fuq is-sit web tagħha.

L-Ombudsman laqgħet l-impenn tal-Kummissjoni li tipprovdi trasparenza akbar dwar l-istatus tal-inizjattivi ta’ politika tagħha u għalqet l-inkjesta.