L-Ombudsman Ewropew, Emily O'Reilly, għamlet proposti lill-Kummissjoni Ewropea dwar kif il-gruppi ta' esperti tagħha jistgħu jsiru aktar ibbilanċjati u trasparenti. Il-Kummissjoni tissorvelja mijiet ta’ gruppi konsultattivi bħal dawn li għandhom rwol kruċjali fl-iżvilupp tal-leġiżlazzjoni u l-politika tal-UE. L-Ombudsman tistieden lill-Kummissjoni tistabbilixxi qafas legalment vinkolanti għall-gruppi ta' esperti kollha, inkluża definizzjoni ta' kif għandha tkun ir-rappreżentanza bbilanċjata fi gruppi differenti. Hija tirrakkomanda wkoll miżuri biex jitnaqqsu sitwazzjonijiet potenzjali ta’ kunflitt ta’ interess u biex tiġi ppubblikata aktar informazzjoni dwar il-ħidma tal-gruppi. Il-Kummissjoni għandha twieġeb għall-proposti tagħha sat-30 ta' April 2015.

Emily O'Reilly spjegat: "F'dawn l-aħħar snin, il-Kummissjoni għamlet ħafna biex iżżid it-trasparenza u tippromwovi rappreżentanza tal-interessi aktar ibbilanċjata fil-gruppi ta' esperti tagħha. Madankollu, hemm lok għal titjib jekk irridu nkunu ċerti li l-pubbliku jista’ jafda u jiskrutinizza l-ħidma ta’ dawn il-gruppi importanti. Bil-proposti tiegħi, irrid ngħin lill-Kummissjoni tindirizza dan il-kompitu kumpless u ta’ sfida.”

Tħassib dwar id-dominanza perċepita tal-interessi korporattivi

F'Mejju 2014, l-Ombudsman bdiet l-inkjesta fuq inizjattiva proprja tagħha dwar il-gruppi ta' esperti tal-Kummissjoni b'konsultazzjoni pubblika. Il-problemi ewlenin li tqajmu fil-kontribuzzjonijiet kienu jikkonċernaw il-kategorizzazzjoni inkonsistenti tal-organizzazzjonijiet li jipparteċipaw fi gruppi ta’ esperti, l-iżbilanċ perċepit favur l-interessi korporattivi f’ċerti gruppi u l-kunflitti ta’ interess potenzjali tal-esperti li jipparteċipaw fil-kapaċità personali tagħhom.

Filwaqt li tqis dawn il-kontribuzzjonijiet, kif ukoll l-analiżi tagħha stess, l-Ombudsman titlob lill-Kummissjoni tippubblika sejħa għall-applikazzjonijiet għall-gruppi ta’ esperti kollha, filwaqt li tkompli tfittex esperti b’mod proattiv, u toħloq portal online uniku għal dawn is-sejħiet. Barra minn hekk, il-kategorizzazzjoni tal-membri tal-gruppi ta’ esperti għandha tkun l-istess bħal dik fir-Reġistru tat-Trasparenza. L-organizzazzjonijiet u l-individwi li jaqgħu fil-kamp ta’ applikazzjoni tar-Reġistru ta’ Trasparenza jenħtieġ li jitħallew jipparteċipaw fi gruppi ta’ esperti biss jekk ikunu rreġistrati.

Fir-rigward tal-esperti maħtura fil-kapaċità personali tagħhom, l-Ombudsman tissuġġerixxi li l-Kummissjoni tirrieżamina l-politika tagħha dwar il-kunflitt ta’ interess, billi tivvaluta l-isfond tagħhom b’aktar reqqa u billi tippubblika CVs dettaljati. Barra minn hekk, il-minuti tal-laqgħat tal-gruppi ta’ esperti għandhom ikunu dettaljati kemm jista’ jkun.

L-Ombudsman tagħti parir lill-Kummissjoni biex tuża l-qafas legalment vinkolanti għall-gruppi ta' djalogu ċivili tad-DĠ AGRI bħala punt ta' riferiment għall-gruppi ta' esperti kollha. F’investigazzjoni separata, bħalissa qed teżamina jekk id-DĠ AGRI huwiex qed jimplimenta kif xieraq l-obbligi stabbiliti f’dan il-qafas.

L-ittra tal-Ombudsman lill-Kummissjoni hija disponibbli hawnhekk.