FINALI

L-inkjesta fuq inizjattiva proprja tal-Ombudsman Ewropew OI/6/2014/NF dwar il-kompożizzjoni tal-gruppi ta' esperti tal-Kummissjoni

L-opinjoni tal-Kummissjoni dwar l-analiżi u s-suġġerimenti tal-Ombudsman Ewropew

I. Sfond

Fid-19 ta' Diċembru 2013, l-Ombudsman Ewropew għalqet l-inkjesta tagħha dwar l-ilment 1682/2010/(ANA)BEH imressaq minn Alter-EU kontra l-Kummissjoni għal amministrazzjoni ħażina fil-qasam tal-gruppi ta' esperti.

Fit-12 ta' Mejju 2014, l-Ombudsman Ewropew infurmat lill-Kummissjoni bid-deċiżjoni tagħha li tiftaħ inkjesta fuq inizjattiva proprja dwar il-kompożizzjoni tal-gruppi ta' esperti tal-Kummissjoni. Skont l-Ombudsman Ewropew, din l-inkjesta fuq inizjattiva proprja kellha l-għan li tippromwovi t-trasparenza u tappoġġa l-isforzi lejn il-kisba ta’ kompożizzjoni aktar ibbilanċjata tal-gruppi ta’ esperti tal-Kummissjoni.

Fis-27 ta' Jannar 2015, l-Ombudsman Ewropew kitbet lill-President tal-Kummissjoni sabiex tikkomunika (i) il-feedback li rċeviet għall-konsultazzjoni pubblika[1] mwettqa fil-kuntest tal-inkjesta msemmija hawn fuq, (ii) il-fehmiet preliminari tagħha dwar il-kwistjonijiet involuti, u (iii) sett ta' suġġerimenti li għalihom l-Ombudsman stiednet lill-Kummissjoni twieġeb.

II. Suġġeriment ġenerali tal-Ombudsman

L-Ombudsman Ewropew issuġġerixxa lill-Kummissjoni li tikkunsidra (i) l-adozzjoni ta' deċiżjoni fl-2015 li tistabbilixxi l-qafas ġenerali għall-gruppi ta' esperti u (ii) ir-rieżami tal-kompożizzjoni tal-gruppi ta' esperti li huma attivi jew sospiżi, ladarba din id-deċiżjoni tkun ġiet adottata.

L-opinjoni tal-Kummissjoni

Il-Kummissjoni tenfasizza li hija impenjata bis-sħiħ għal rappreżentanza bbilanċjata ta’ oqsma rilevanti ta’ għarfien espert u oqsma ta’ interess fi gruppi ta’ esperti u għal standards għoljin ta’ ftuħ, etika, u trasparenza fir-rigward tal-kompożizzjoni u l-ħidma tagħhom.

Qafas ġenerali li jirregola l-ħolqien u l-funzjonament tal-gruppi ta’ esperti ilu fis-seħħ minn Novembru 2010[2]. Fid-deċiżjoni li tagħlaq l-inkjesta tagħha dwar l-ilment 1682/2010 imsemmi hawn fuq ta' Diċembru 2013, l-Ombudsman qieset li "l-Kummissjoni għandha regoli xierqa fis-seħħ sabiex tiżgura rappreżentanza bbilanċjata ta' interessi differenti fil-gruppi ta' esperti tagħha" (ara l-punt 141 tad-deċiżjoni tal-Ombudsman).

Kif indikat f’korrispondenza preċedenti mal-Ombudsman, il-Kummissjoni tqis li r-regoli eżistenti dwar il-gruppi ta’ esperti jipprevedu qafas koerenti u li jiffunzjona tajjeb. Madankollu, il-Kummissjoni tista' taqbel ma' diversi suġġerimenti mressqa mill-Ombudsman, sabiex ittejjeb għadd ta' aspetti. Fir-rigward tal-kwistjoni speċifika tal-kompożizzjoni tal-gruppi ta’ esperti, il-Kummissjoni tibqa’ impenjata li tindirizza kwalunkwe żbilanċ perċepit fuq bażi ta’ każ b’każ, sabiex tirrimedja inkonsistenzi possibbli, fid-dawl ta’ ċirkostanzi speċifiċi.

Sabiex tissaħħaħ it-trasparenza, Reġistru rivedut tal-gruppi ta' esperti tal-Kummissjoni u entitajiet simili oħra (minn hawn 'il quddiem "ir-Reġistru tal-gruppi ta' esperti") li jinkludi, fost l-oħrajn, għadd ta' proposti mill-Ombudsman huwa previst li jkun operattiv sal-ewwel kwart tal-2016.

Jekk jogħġbok ara hawn taħt l-opinjoni tal-Kummissjoni dwar is-suġġerimenti individwali tal-Ombudsman.

III. Suġġerimenti individwali tal-Ombudsman

A. In-natura (legali) tar-regoli orizzontali u l-kisba ta’ kompożizzjoni bbilanċjata:

Skont l-Ombudsman, il-Kummissjoni għandha tadotta deċiżjoni li tistabbilixxi l-qafas għall-gruppi ta' esperti. Din id-deċiżjoni tal-Kummissjoni għandha teħtieġ dan li ġej:

1. Rappreżentazzjoni bbilanċjata tal-interessi rilevanti kollha f’kull grupp ta’ esperti.

2. Definizzjoni individwali ta’ “bilanċ” li għandha tiġi stabbilita għal kull grupp ta’ esperti individwali.

3. Dispożizzjoni li fiha kriterji ġenerali għad-delimitazzjoni tal-interessi ekonomiċi u mhux ekonomiċi.

L-opinjoni tal-Kummissjoni

Il-Kummissjoni ma tqisx li huwa xieraq li jiġi adottat qafas ġdid għall-gruppi ta’ esperti li jkun jinkludi r-rekwiżiti proposti mill-Ombudsman taħt l-intestatura A, għar-raġunijiet deskritti hawn taħt. Madankollu, kif iddikjarat hawn fuq, il-Kummissjoni se tagħmel għadd ta’ titjib f’oqsma differenti, li jikkorrispondu għal xi wħud mis-suġġerimenti individwali ppreżentati mill-Ombudsman taħt l-intestaturi B sa D.

Il-Komunikazzjoni C(2010) 7649, flimkien mar-"Regoli orizzontali" dwar il-gruppi ta' esperti annessi magħha, li jipprevedu l-qafas eżistenti għall-gruppi ta' esperti tal-Kummissjoni, ġew adottati mill-Kulleġġ. L-adozzjoni ta’ qafas ġdid permezz ta’ deċiżjoni tal-Kummissjoni, kif issuġġerit, għalhekk ma tipprevedix valur miżjud reali peress li r-regoli applikabbli ġew adottati wkoll mill-Kulleġġ.

Il-qafas ġenerali għall-gruppi ta’ esperti huwa ta’ natura differenti minn, pereżempju, id-deċiżjoni tal-Kummissjoni dwar il-“gruppi ta’ djalogu ċivili” mqiegħda taħt ir-responsabbiltà tad-DĠ AGRI. Fl-ewwel każ, il-Kummissjoni stabbiliet regoli ġenerali dwar il-ħolqien u l-funzjonament ta’ gruppi ta’ esperti, filwaqt li fit-tieni każ, il-Kummissjoni adottat deċiżjoni li tistabbilixxi għadd ta’ gruppi speċifiċi fil-qasam tal-agrikoltura, abbażi tal-qafas ġenerali. Il-Kummissjoni adottat ħafna deċiżjonijiet oħra li jistabbilixxu gruppi ta’ esperti matul is-snin.

Huwa importanti li jiġi enfasizzat li l-gruppi ta’ esperti mhumiex stabbiliti l-ewwel nett biex jinvolvu ruħhom f’dibattitu ta’ natura ġenerali mal-partijiet ikkonċernati jew l-opinjoni pubblika. Il-funzjoni primarja tal-gruppi ta’ esperti hija li jipprovdu lill-Kummissjoni b’għarfien espert ta’ livell għoli fir-rigward ta’ suġġetti speċifiċi u spiss tekniċi, li jvarjaw minn grupp għal ieħor. Kif stabbilit fir-"Regoli orizzontali", il-kompożizzjoni tal-gruppi ta' esperti hija ddeterminata l-ewwel nett mill-mandat u t-tip ta' għarfien espert meħtieġ. Id-DĠs għandhom ikunu jistgħu jagħżlu membri li jipprovdu valur miżjud reali fir-rigward tax-xogħol li għandu jitwettaq.

Ir-regoli jipprevedu li meta tiddefinixxi l-kompożizzjoni tal-gruppi ta’ esperti, il-Kummissjoni għandu jkollha l-għan li tiżgura, “sa fejn ikun possibbli”, rappreżentanza bbilanċjata tal-oqsma rilevanti ta’ għarfien espert u tal-oqsma ta’ interess. Din il-formulazzjoni tirrifletti l-impenn sod tal-Kummissjoni li tistinka għal kompożizzjoni bbilanċjata, iżda tippermetti ċirkostanzi u diffikultajiet speċifiċi possibbli li tista’ tiltaqa’ magħhom fil-fażi tal-għażla. Il-kompożizzjoni tal-gruppi ta’ esperti hija soġġetta għal livell għoli ta’ trasparenza pubblika permezz tar-Reġistru, u dan flimkien ma’ aktar miżuri ta’ trasparenza li l-Kummissjoni beħsiebha twettaq, kif imsemmi hawn taħt, jiżguraw livell għoli ta’ skrutinju u responsabbiltà fir-rigward tal-applikazzjoni mill-Kummissjoni tal-prinċipju ta’ bilanċ fil-prattika.

Jekk grupp jibbenefikax minn rappreżentanza "bilanċjata" ma jistax ikun eżerċizzju aritmetiku fir-rigward tan-numru ta' esperti preżenti f'kull grupp ta' esperti, kif irrikonoxxa l-Ombudsman meta għalaq l-ilment imsemmi hawn fuq kontra l-Kummissjoni. Diversi fatturi jistgħu jiddeterminaw is-sħubija ta’ grupp ta’ esperti, li wħud minnhom mhumiex possibbli li jiġu previsti minn qabel. Din hija r-raġuni għaliex il-Kummissjoni tqis li ma għandhiex tintroduċi sett ta' definizzjonijiet pjuttost riġidi ta' "bilanċ" għal kull grupp individwali jekk fl-istess ħin ma jkollhiex kontroll sħiħ fuq l-implimentazzjoni ta' tali definizzjoni.

L-ewwel nett, xi drabi d-differenzi fil-mod kif jiġu organizzati l-organizzazzjonijiet ta’ min iħaddem u t-trade unions u/jew l-organizzazzjonijiet tas-soċjetà ċivili jistgħu jinfluwenzaw il-kompożizzjoni tal-gruppi ta’ esperti. It-tieni, il-komunità tan-negozju ma tistax titqies bħala grupp omoġenju li jikkondividi l-istess fehmiet, peress li fir-realtà spiss ikollhom interessi pjuttost diverġenti f’setturi differenti. It-tielet nett, la l-kwalità tal-applikazzjonijiet u lanqas l-interess reali muri mill-partijiet ikkonċernati rilevanti matul il-proċeduri tal-għażla ma huma prevedibbli u, għalhekk, ma jistgħux jitqiesu f'definizzjoni teoretika ta' "bilanċ". Pereżempju, l-esperjenza turi li l-organizzazzjonijiet tas-soċjetà ċivili mhux dejjem iwieġbu għal sejħiet pubbliċi għall-applikazzjoni biex isiru membri ta’ gruppi ta’ esperti anke jekk jiġu rreklamati b’mod wiesa’ u/jew mhux neċessarjament jaċċettaw stediniet diretti mis-servizzi tal-Kummissjoni biex ikunu membri ta’ gruppi ta’ esperti. F’każijiet oħra, l-applikazzjonijiet iridu jiġu rrifjutati minħabba li mhumiex xierqa fir-rigward tax-xogħol li għandu jitwettaq.

Din hija r-raġuni għaliex definizzjoni ta' "bilanċ" ma tistax tiddependi fuq ċifri biss u, kif spjegat, kwalunkwe tentattiv biex titfassal tali definizzjoni għal kull grupp ta' esperti abbażi ta' kriterji oħra jiffaċċja problemi kunċettwali, ikun ta' piż amministrattiv u, b'mod partikolari, ma jipprovdi l-ebda garanzija biex ikun effettiv fil-prattika, peress li mhuwiex meqjus li, jekk tiġi introdotta, dik id-definizzjoni jkollha impatt reali fuq il-kompożizzjoni tal-grupp.

Fl-aħħar nett, kif iddikjarat fil-korrispondenza preċedenti mal-Ombudsman, il-grad ta’ involviment ġenerali tal-partijiet ikkonċernati għandu jiġi vvalutat fid-dawl tal-inizjattivi kollha meħuda mill-Kummissjoni, mhux biss abbażi tas-sħubija fi grupp ta’ esperti. Fil-fatt, il-Kummissjoni tiddependi regolarment fuq għodod oħra li jissupplimentaw il-ħidma tal-gruppi ta’ esperti, bħal konsultazzjonijiet pubbliċi, seminars, studji u rapporti jew opinjonijiet ipprovduti mill-aġenziji Ewropej.

Fid-dawl ta' dan ta' hawn fuq, il-Kummissjoni hija tal-fehma li aktar milli tiġi adottata definizzjoni ta' "bilanċ" għal kull grupp, għandhom isiru sforzi sabiex il-proċessi tal-għażla jsiru aktar trasparenti u inklużivi. Dan għandu jsir b'żewġ modi:

(1) billi tiddeskrivi b'mod ċar fis-sejħiet pubbliċi għall-applikazzjoni l-għarfien espert rilevanti u r-rappreżentanza tal-interessi mfittxija mill-Kummissjoni u s-servizzi tagħha fir-rigward tax-xogħol li għandu jitwettaq; u

(2) bl-użu ta' sejħiet bħal dawn biex jintgħażlu membri tal-grupp ta' esperti għajr l-awtoritajiet pubbliċi u l-korpi rappreżentattivi stabbiliti mil-leġiżlazzjoni tal-Unjoni għal pariri f'oqsma speċifiċi. Barra minn hekk, jekk l-għarfien espert meħtieġ jista’ jinkiseb permezz ta’ sejħa kontinwament miftuħa, tista’ ma tkunx meħtieġa sejħa ġdida speċifika. Jekk jogħġbok ara l-opinjoni tal-Kummissjoni taħt l-intestatura B għal aktar dettalji.

4. Spjega t-trattament inkonsistenti mill-Kummissjoni tal-COPA u l-COGECA fir-rigward tas-sħubija fi gruppi ta’ esperti.

L-opinjoni tal-Kummissjoni

Il-Kummissjoni tindika li fir-Reġistru tal-gruppi ta’ esperti COPA/COGECA dehru bħala organizzazzjonijiet separati għall-gruppi ta’ esperti kollha mqiegħda taħt ir-responsabbiltà tad-DĠ AGRI li kienu membri tagħhom, ħlief għal grupp wieħed, il-Bord ta’ Tmexxija ta’ Livell Għoli għas-Sħubija Ewropea għall-Innovazzjoni (E02844) fejn bi żball dehru bħala organizzazzjoni waħda. Sadanittant, dan il-grupp ta’ esperti ngħalaq u ġie sostitwit minn sottogrupp tal-Assemblea tan-Network Rurali li għadha kif ġiet stabbilita (E03277).

5. Jinforma lill-Ombudsman jekk, bl-istess mod, ittrattax b'mod inkonsistenti organizzazzjonijiet oħra maħtura fi gruppi ta' esperti.

L-opinjoni tal-Kummissjoni

Id-dipartimenti tal-Kummissjoni se jirrieżaminaw il-klassifikazzjoni tal-membri tal-grupp ta’ esperti fir-Reġistru tal-gruppi ta’ esperti sabiex jiġi evitat tikkettar inkonsistenti tal-organizzazzjonijiet. Dan se jkun parti mill-eżerċizzju ġenerali biex tittejjeb l-affidabbiltà tad-data dwar ir-Reġistru (ara wkoll l-opinjoni tal-Kummissjoni taħt l-intestatura C1).

B. Sejħiet għall-applikazzjonijiet:

1. Ippubblika sejħa għall-applikazzjonijiet għal kull grupp ta’ esperti.

2. Oħloq portal uniku għal sejħiet għal applikazzjonijiet għal gruppi ta’ esperti.

3. Tintroduċi skadenza minima standard ta’ 6 ġimgħat għas-sejħiet kollha għall-applikazzjonijiet.

L-opinjoni tal-Kummissjoni

Skont ir-regoli eżistenti, is-sejħiet pubbliċi jintużaw “sa fejn ikun raġonevolment prattikabbli” sabiex jintgħażlu individwi li għandhom jinħatru f’kapaċità personali^[3], mhux tipi oħra ta’ membri. Meta sejħa għall-applikazzjonijiet ma tkunx prattikabbli (pereżempju meta tkun meħtieġa kompetenza teknika estremament speċifika), l-għażla ssir abbażi ta’ “kriterji oġġettivament verifikabbli”, li mbagħad jissemmew b’mod espliċitu fir-Reġistru tal-gruppi ta’ esperti għal kull grupp. Fil-prattika, is-sejħiet pubbliċi qed jintużaw dejjem aktar mid-DĠs biex jagħżlu individwi li jirrappreżentaw interess u/jew organizzazzjonijiet. Il-Kummissjoni tqis li tali flessibbiltà fl-għażla tal-membri taħdem tajjeb.

Sabiex il-proċeduri tal-għażla jsiru saħansitra aktar trasparenti u inklużivi, kif issuġġerit mill-Ombudsman, fil-prinċipju l-għażla futura tal-membri tal-grupp ta' esperti għandha titwettaq permezz ta' sejħiet pubbliċi għall-applikazzjoni, ħlief meta l-membri tal-gruppi ta' esperti jkunu awtoritajiet pubbliċi, bħall-awtoritajiet tal-Istati Membri u ta' pajjiżi terzi, organizzazzjonijiet internazzjonali, korpi tal-Unjoni u aġenziji tal-UE, kif ukoll korpi rappreżentattivi stabbiliti mil-leġiżlazzjoni tal-Unjoni għal pariri f'oqsma speċifiċi[4].

Sabiex jintlaħaq bilanċ bejn it-trasparenza u r-restrizzjonijiet amministrattivi, l-iskadenza minima għall-applikazzjonijiet se tkun ta' erba' ġimgħat minflok sitta kif propost mill-Ombudsman. Il-Kulleġġ jista' jitbiegħed minn dawn id-dispożizzjonijiet, fejn dan jitqies ġustifikat minn prijoritajiet prevalenti jew kondizzjonijiet ta' urġenza. Jekk l-għarfien espert meħtieġ jista’ jinkiseb permezz ta’ sejħa kontinwament miftuħa, eż. sejħa għal esperti miftuħa mill-2013 sal-2017 fil-qasam tar-Riċerka u l-Ġestjoni; l-Innovazzjoni (ara l-anness), tista’ ma tkunx meħtieġa sejħa ġdida speċifika. Sejħa kontinwament miftuħa tipprovdi punt uniku ta’ servizz għal esperti potenzjali biex jindikaw ir-rieda tagħhom li jipparteċipaw f’settur partikolari. Dan wera li huwa mekkaniżmu effiċjenti u trasparenti għall-għażla tal-esperti u jippermetti approċċ konsistenti fid-DĠ kollha li jaħdmu fil-qasam tar-Riċerka u l-Innovazzjoni.

Fl-aħħar ta' Awwissu 2012, ġiet introdotta "Taqsima tal-Aħbarijiet" fir-Reġistru tal-gruppi ta' esperti li tipprevedi, fost l-oħrajn, punt uniku ta' aċċess għall-informazzjoni dwar sejħiet ġodda għall-applikazzjonijiet. Il-Kummissjoni tqis li huwa sproporzjonat li jinħoloq, kif issuġġerit, "portal uniku" kompletament ġdid għas-sejħiet għall-applikazzjonijiet. Minflok, il-Kummissjoni se ttejjeb il-viżibbiltà tas-sejħiet fil-qafas tar-Reġistru tal-gruppi ta’ esperti billi toħloq taqsima ddedikata esklussivament għalihom. Din it-taqsima se tinkludi, fost l-oħrajn, sistema ta’ twissija bil-posta elettronika għal sejħiet ġodda, kif issuġġerit mill-Ombudsman. Se tiġi pprovduta sistema ta’ twissija simili għall-utenti li jixtiequ jirċievu notifiki dwar bidliet introdotti fi gruppi speċifiċi (sħubija, kompiti, eċċ.).

C. Link għar-Reġistru tat-Trasparenza:

1. Uża l-kategorizzazzjoni tar-Reġistru tat-Trasparenza biex tikkategorizza l-membri fil-gruppi ta’ esperti tal-Kummissjoni.

L-opinjoni tal-Kummissjoni

Iż-żewġ Reġistri huma differenti ħafna fin-natura u l-iskop tagħhom. L-ewwel nett, ir-Reġistru tal-gruppi ta’ esperti huwa l-portal uniku li jiġbor l-informazzjoni rilevanti kollha dwar il-gruppi ta’ esperti tal-Kummissjoni u entitajiet simili oħra, filwaqt li r-Reġistru tat-Trasparenza jelenka organizzazzjonijiet u individwi li jaħdmu għal rashom li jwettqu attivitajiet bl-objettiv li jinfluwenzaw il-formulazzjoni jew l-implimentazzjoni tal-politiki tal-UE, jiġifieri attivitajiet li normalment jissejħu “lobbying”. It-tieni, il-gruppi ta’ esperti mhumiex stabbiliti biex jillobbjaw lill-Kummissjoni, iżda biex jipprovdulha pariri u għarfien espert fir-rigward ta’ kompiti speċifiċi. It-tielet, il-membri tal-gruppi ta’ esperti mhumiex biss organizzazzjonijiet u individwi li jaħdmu għal rashom li jirrappreżentaw interess komuni kondiviż mill-partijiet ikkonċernati li jistgħu jiġu elenkati fir-Reġistru tat-Trasparenza, iżda wkoll l-awtoritajiet tal-gvern tal-Istati Membri – li huma esklużi b’mod espliċitu mir-Reġistru tat-Trasparenza – u esperti indipendenti maħtura f’kapaċità personali.

Il-Kummissjoni se ttejjeb id-disponibbiltà u l-affidabbiltà tad-data fir-Reġistru tal-gruppi ta’ esperti, b’mod partikolari billi tagħmel it-tipi ta’ organizzazzjoni aktar preċiżi, anke sabiex jiġi evitat tikkettar inkonsistenti tal-organizzazzjonijiet; fejn xieraq, għadd ta’ kategoriji li bħalissa qed jintużaw fir-Reġistru tat-Trasparenza jistgħu jintużaw fir-Reġistru tal-gruppi ta’ esperti.

2. Il-ħtieġa ta’ reġistrazzjoni fir-Reġistru ta’ Trasparenza għall-ħatra fi gruppi ta’ esperti

L-opinjoni tal-Kummissjoni

Sabiex tissaħħaħ it-trasparenza, il-Kummissjoni taqbel li tirrikjedi reġistrazzjoni fir-Reġistru tat-Trasparenza fil-każ ta’ żewġ kategoriji ta’ membri tal-grupp ta’ esperti: i) organizzazzjonijiet (membri tat-tip C[5]) u ii) dawk l-individwi li jaħdmu għal rashom maħtura fi gruppi ta' esperti bħala rappreżentanti ta' interess komuni kondiviżi mill-partijiet ikkonċernati (membri tat-tip B). Il-membri attwali tal-gruppi ta’ esperti li jappartjenu għal tali kategoriji li għadhom ma rreġistrawx fir-Reġistru ta’ Trasparenza għandhom jintalbu jagħmlu dan, sabiex ikomplu jipparteċipaw fil-ħidma tal-grupp inkwistjoni.

Ir-reġistrazzjoni fir-Reġistru tat-Trasparenza ta’ individwi li jaħdmu għal rashom minħabba l-ħatra unika tagħhom fi grupp ta’ esperti partikolari fil-kapaċità personali tagħhom (membri tat-tip A) ma tkunx xierqa, minħabba li dawn l-esperti huma meħtieġa jaġixxu b’mod indipendenti u fl-interess pubbliku. Madankollu, l-individwi li jaħdmu għal rashom għandhom jirreġistraw jekk ikunu nħatru bħala membri tat-tip B fi gruppi ta’ esperti oħra. Il-Kummissjoni se tipprovdi għal aktar informazzjoni fir-Reġistru tal-gruppi ta’ esperti dwar l-interessi rappreżentati kemm mill-membri tat-tip B kif ukoll tat-tip C. Aktar informazzjoni dettaljata dwar l-organizzazzjonijiet u l-individwi li jaħdmu għal rashom maħtura fi gruppi ta’ esperti bħala rappreżentanti ta’ interess komuni tista’ tinstab fir-Reġistru tat-Trasparenza.

Il-Kummissjoni tqis li r-reġistrazzjoni obbligatorja ta’ dawk l-organizzazzjonijiet li l-interessi komuni tagħhom huma rrappreżentati minn membri tat-tip B ma tkunx xierqa, minħabba li dawn l-esperti ma jirrappreżentawx partijiet ikkonċernati individwali.

3. Ivverifika b’mod sistematiku jekk ir-reġistranti jiffirmawx għat-taqsima tal-lemin tar-Reġistru ta’ Trasparenza. Dan x’aktarx ikun jeħtieġ żieda fir-riżorsi għas-Segretarjat Konġunt tar-Reġistru tat-Trasparenza.

L-opinjoni tal-Kummissjoni

Bil-verżjoni l-ġdida tar-Reġistru tat-Trasparenza mnedija fis-27.01.2015, is-Segretarjat Konġunt tar-Reġistru tat-Trasparenza (JTRS) ħa passi ulterjuri biex jiżgura li r-reġistranti jagħżlu l-aktar taqsima u subtaqsima xierqa abbażi tal-profil tagħhom. Dan huwa ffaċilitat permezz tad-dispożizzjoni ta’ Linji Gwida aktar ċari u proċess ta’ reġistrazzjoni u aġġornament aktar faċli għall-utent li jinkludi pariri prattiċi għall-utenti. Barra minn hekk, il-JTRS sistematikament jiskrinja r-reġistrazzjonijiet ġodda kollha li jidħlu u jirreaġixxi meta jidentifika r-reġistrazzjonijiet sottomessi fit-taqsima l-ħażina. Il-mekkaniżmu tat-twissijiet u tal-ilmenti marbut mar-Reġistru jippermetti lil kwalunkwe ċittadin iġib għall-attenzjoni tal-JTRS kwistjonijiet marbuta mal-kwalità tad-data. Jitwettqu wkoll kontrolli tal-kwalità fuq inizjattiva proprja (madwar 900 fl-2014).

4. Tillinkja kull membru ta’ grupp ta’ esperti mal-profil tiegħu/tagħha fir-Reġistru tat-Trasparenza.

Il-pożizzjoni tal-Kummissjoni

Sabiex tissaħħaħ it-trasparenza, il-Kummissjoni se tgħaqqad l-organizzazzjonijiet maħtura bħala membri tat-tip C u l-individwi li jaħdmu għal rashom maħtura bħala membri tat-tip B ta’ gruppi ta’ esperti mal-profil tagħhom fir-Reġistru tat-Trasparenza.

5. Ara l-intestatura D. hawn taħt għal individwi li ma jaħdmux għal rashom u li jinħatru fi gruppi ta’ esperti bħala esperti individwali fil-kapaċità personali tagħhom.

Il-pożizzjoni tal-Kummissjoni

Ara l-fehmiet tal-Kummissjoni taħt l-intestatura D.

D. Politika dwar il-kunflitt ta’ interess għal esperti individwali maħtura fil-kapaċità personali tagħhom:

Il-Kummissjoni għandha tirrevedi l-politika tagħha dwar il-kunflitt ta’ interess u tieħu l-miżuri li ġejjin:

1. Ivvaluta bir-reqqa l-isfondi tal-individwi bil-ħsieb li tidentifika kwalunkwe kunflitt ta’ interess attwali, potenzjali jew apparenti.

2. Jiżguraw li l-ebda individwu b’xi kunflitt ta’ interess attwali, potenzjali jew apparenti ma jinħatar fi grupp ta’ esperti fil-kapaċità personali tiegħu/tagħha.

3. Jikkunsidraw, f’sitwazzjoni ta’ kunflitt ta’ interess, il-possibbiltà li jaħtru individwu bħala rappreżentant ta’ interess komuni kondiviż mill-partijiet ikkonċernati jew li jaħtru l-organizzazzjoni ta’ affiljazzjoni tiegħu/tagħha fil-grupp ta’ esperti.

4. IppubblikaCV dettaljat biżżejjed ta’ kull espert maħtur fil-kapaċità personali tiegħu/tagħha fir-reġistru tal-gruppi ta’ esperti.

5. Tippubblika dikjarazzjoni tal-interessi ta’ kull espert maħtur fil-kapaċità personali tiegħu/tagħha fir-reġistru tal-gruppi ta’ esperti.

L-opinjoni tal-Kummissjoni

Il-Kummissjoni qed tħejji dispożizzjonijiet ġodda dwar il-ġestjoni tal-kunflitti ta’ interess ta’ individwi maħtura bħala membri ta’ gruppi ta’ esperti f’kapaċità personali, u qed tikkomplementa r-Regoli orizzontali.

Dawn id-dispożizzjonijiet se jispeċifikaw it-tifsira ta’ “kunflitt ta’ interess” u jipprovdu valutazzjoni speċifika tal-kunflitt ta’ interess li għandha titwettaq mis-servizzi kollha tal-Kummissjoni. Huma se jidentifikaw meta espert maħtur f’kapaċità personali jrid jimla formola ta’ dikjarazzjoni tal-interessi (“formola DOI”), jispjega kif is-servizzi tal-Kummissjoni għandhom jivvalutaw l-informazzjoni żvelata u jiddeskrivi l-azzjonijiet li għandhom jittieħdu meta jiġi identifikat kunflitt ta’ interess. Il-Kummissjoni qed taħdem ukoll fuq dikjarazzjoni standard tal-interessi u dokument ta’ gwida għall-mili tal-formoli tad-DOI bbażati fuq sistemi komparabbli użati fil-qafas tal-UE (aġenziji deċentralizzati tal-UE) kif ukoll fuq linji gwida żviluppati mill-Organizzazzjoni Dinjija tas-Saħħa u l-OECD. Kif issuġġerit mill-Ombudsman, il-formoli tad-DOI għandhom ikunu disponibbli għall-pubbliku fir-Reġistru tal-gruppi ta' esperti, soġġett għad-dispożizzjonijiet rilevanti dwar il-protezzjoni tad-data.

L-Ombudsman issuġġeriet li d-dikjarazzjonijiet ta' interess għandhom jiġu ppreżentati fuq bażi annwali. Il-Kummissjoni tqis li l-esperti jenħtieġ li jkunu meħtieġa jinfurmaw lis-servizzi kompetenti tal-Kummissjoni jekk ikun hemm xi bidla fl-informazzjoni pprovduta qabel, f’liema każ ikunu meħtieġa jissottomettu minnufih formola DOI mimlija ġdida li tiddeskrivi l-bidliet rilevanti. Il-Kummissjoni tqis li dan ir-rekwiżit huwa inqas ta’ piż għall-esperti u d-DĠ, mingħajr ma jkun inqas effettiv.

Fit-12 ta' Frar 2015, il-Kummissjoni kkonsultat lill-Kontrollur Ewropew għall-Protezzjoni tad-Data (KEPD) dwar id-dispożizzjonijiet il-ġodda dwar il-kunflitt ta' interessi. Fl-20 ta' April 2015, il-KEPD wieġeb billi ppreżenta għadd ta' rakkomandazzjonijiet dwar punti speċifiċi. Il-Kummissjoni bħalissa qed tivvaluta dawn ir-rakkomandazzjonijiet.

E. Titjib tad-disponibbiltà tad-data fir-Reġistru:

1. Iddisinja mill-ġdid it-tab “statistika” fuq ir-Reġistru tal-gruppi ta’ esperti, f’konformità mar-Reġistru tat-Trasparenza.

L-opinjoni tal-Kummissjoni

Il-Kummissjoni ma tqisx li huwa xieraq li tirreplika l-kategorizzazzjoni tar-Reġistru tat-Trasparenza biex tikkategorizza l-membri fi gruppi ta’ esperti. Madankollu, il-Kummissjoni se tivvaluta jekk l-aġġustamenti tekniċi humiex possibbli u ġġustifikati, filwaqt li jenħtieġ li jinstab bilanċ bejn it-tħassib dwar it-trasparenza u l-proporzjonalità. B’mod partikolari, il-Kummissjoni se tivvaluta jekk it-tab tal-istatistika tistax tiġi definita mill-ġdid biex turi informazzjoni addizzjonali u biex tipprovdi stampa aħjar dwar il-kompożizzjoni tal-grupp.

2. Jippubblikaw dokumenti dwar il-ħidma tal-gruppi ta’ esperti u tas-sottogruppi tagħhom fuq ir-reġistru tal-gruppi ta’ esperti b’mod sistematiku u f’waqtu.

Il-pubblikazzjoni għandha ssir billi jittellgħu d-dokumenti fuq ir-reġistru tal-gruppi ta’ esperti, mhux billi jiġu ospitati fuq sit web differenti, pereżempju tad-DĠ rilevanti.

L-opinjoni tal-Kummissjoni

Il-Kummissjoni hija impenjata li tiżgura li d-dokumenti rilevanti jiġu ppubblikati b’mod sistematiku u f’waqtu. Il-Kummissjoni tfakkar li eċċezzjonijiet għall-pubblikazzjoni huma possibbli fejn l-iżvelar ta' dokument idgħajjef il-protezzjoni ta' interess pubbliku jew privat kif definit fl-Artikolu 4 tar-Regolament (KE) Nru 1049/2001[6].

Għal raġunijiet ta’ proporzjonalità, il-Kummissjoni temmen li l-arranġamenti attwali fil-mod kif id-dokumenti rilevanti jsiru disponibbli għall-pubbliku għandhom jinżammu, peress li jiżguraw trasparenza suffiċjenti dwar l-attivitajiet tal-gruppi ta’ esperti.

3. Tippubblika, fir-reġistru tal-gruppi ta’ esperti, biżżejjed informazzjoni dwar l-interess li espert individwali jirrappreżenta bħala rappreżentant ta’ interess komuni kondiviż mill-partijiet ikkonċernati.

L-opinjoni tal-Kummissjoni

Dan is-suġġeriment ġie indirizzat fl-opinjoni tal-Kummissjoni dwar is-suġġeriment C2.

4. Tfittex li tiżgura li l-minuti li jiġu prodotti biex jiġu rreġistrati l-laqgħat tal-gruppi ta’ esperti u tas-sottogruppi tagħhom, inklużi d-deliberazzjonijiet, ikunu dettaljati kemm jista’ jkun.

L-opinjoni tal-Kummissjoni

B’definizzjoni, il-ħidma mwettqa mill-gruppi ta’ esperti hija waħda kollettiva, li ħafna drabi twassal għal deċiżjonijiet meħuda b’kunsens, fi spirtu ta’ fiduċja reċiproka. L-esperti għandhom ikunu jistgħu jikkontribwixxu liberament għall-ħidma tal-gruppi, mingħajr ebda riskju ta' pressjoni esterna; huwa importanti li d-deliberazzjonijiet isiru b’mod kunfidenzjali, kif xieraq. L-arranġamenti eżistenti diġà jipprevedu xi flessibbiltà: bi qbil mas-servizzi tal-Kummissjoni, il-grupp jista', b'maġġoranza sempliċi tal-membri tiegħu, jiddeċiedi li jiftaħ id-deliberazzjonijiet tiegħu għall-pubbliku.

Sabiex jiġi ppreservat il-funzjonament bla xkiel tal-gruppi ta’ esperti, il-Kummissjoni hija tal-opinjoni li l-arranġamenti attwali dwar il-pubblikazzjoni tal-minuti jippermettu li l-pubbliku ġenerali jkun infurmat b’mod adegwat u, għalhekk, jenħtieġ li jinżammu.

Anness: Sejħa kontinwament miftuħa fil-qasam tar-Riċerka u l-Iżvilupp; Innovazzjoni.

 

[1] Il-konsultazzjoni pubblika saret bejn nofs Mejju u l-aħħar ta’ Awwissu 2014.

[2] Qafas għall-Gruppi ta’ Esperti tal-Kummissjoni: Regoli Orizzontali u Reġistru Pubbliku", ara C(2010) 7649 finali.

[3] C(2010) 7649 finali, regola 9 (1).

[4] Dan huwa l-każ, pereżempju, tal-grupp "Laqgħat ta' Koordinazzjoni tal-Kunsilli Konsultattivi" li huwa magħmul minn Kunsilli Konsultattivi, li nħolqu bid-Deċiżjoni tal-Kunsill 2004/585. Il-Kunsilli Konsultattivi huma organizzazzjonijiet immexxija mill-partijiet ikkonċernati li jipprovdu lill-Kummissjoni u lill-pajjiżi tal-UE b’rakkomandazzjonijiet dwar kwistjonijiet ta’ ġestjoni tas-sajd. Ir-rwol tal-Kunsilli Konsultattivi ġie kkonfermat u msaħħaħ fl-aħħar riforma tal-Politika Komuni tas-Sajd.

[5] Ta’ min jinnota li għalkemm ikklassifikati bħala membri tat-Tip C, għadd ta’ entitajiet, bħal aġenziji tal-UE, korpi tal-Unjoni u organizzazzjonijiet internazzjonali jaqgħu barra mill-kamp ta’ applikazzjoni tar-Reġistru ta’ Trasparenza.

[6] Dawn l-eċċezzjonijiet huma maħsuba biex jipproteġu s-sigurtà pubblika, l-affarijiet militari, ir-relazzjonijiet internazzjonali, il-politika finanzjarja, monetarja jew ekonomika, il-privatezza u l-integrità tal-individwu, l-interessi kummerċjali, il-proċedimenti tal-qorti u l-pariri legali, l-ispezzjonijiet/l-investigazzjonijiet/l-awditi u l-proċess tat-teħid tad-deċiżjonijiet tal-istituzzjoni.