L-Ombudsman Ewropew, Emily O'Reilly, laqgħet il-progress li sar s’issa matul l-inkjesta tagħha iżda talbet lill-Kummissjoni Ewropea tkompli ttejjeb it-trasparenza tal-gruppi ta’ esperti tagħha ta’ 800 kif ukoll billi tippubblika minuti komprensivi tal-laqgħat tagħhom.

L-inkjesta strateġika tal-Ombudsman ikkonkludiet li l-Kummissjoni għandha tippubblika minn qabel l-aġendi tal-laqgħat u d-dokumenti ta' sfond, filwaqt li l-minuti għandhom normalment jinkludu l-pożizzjonijiet espressi mill-membri tal-grupp u jiġu ppubblikati fil-ħin. Dan se jippermetti liċ-ċittadini jaraw b’mod aktar ċar kif il-pariri esperti jikkontribwixxu għat-tfassil tal-politika tal-UE. Id-deliberazzjonijiet ta' grupp ta' esperti jistgħu jinżammu kunfidenzjali iżda biss jekk ikunu ġustifikati b'mod oġġettiv.

Emily O'Reilly qalet: "Il-Kummissjoni Ewropea għandha raġun tikkonsulta b'mod wiesa' meta tfassal proposti għal politika u leġiżlazzjoni, u tfittex l-aħjar għarfien espert possibbli. Sar ħafna progress minn meta bdejna l-inkjesta tagħna; madankollu, iċ-ċittadini għandhom id-dritt li jkunu jafu bis-sħiħ kif il-pariri esperti jikkontribwixxu għat-teħid tad-deċiżjonijiet tal-UE. Dan ifisser li wieħed ikun jaf x’kontribut ingħata u minn min, kemm jekk minn rappreżentanti nazzjonali, mill-industrija, mis-soċjetà ċivili jew minn oħrajn. Li din it-tip ta’ informazzjoni ssir pubblika se jgħin biex jiġi żgurat li l-gruppi ta’ esperti jitqiesu bħala leġittimi.”

Filwaqt li l-Kummissjoni ħabbret ħafna passi importanti u milqugħa biex ittejjeb il-ġestjoni tal-gruppi ta' esperti tagħha matul din l-inkjesta - bħal li tagħmel il-proċedura tal-għażla għall-membri tal-grupp ta' esperti aktar trasparenti u tirrevedi l-politika tagħha dwar il-kunflitt ta' interess -, l-Ombudsman għandha diversi suġġerimenti biex tkompli tibni fuq dan il-progress.

Dawn jinkludu li l-Kummissjoni tfassal definizzjoni ta’ bilanċ fir-rigward tal-kompożizzjoni tal-grupp ta’ esperti. Dan se jiżgura approċċ intern rigoruż għall-kompożizzjoni tal-gruppi kif ukoll jippermetti lill-pubbliku jara r-raġunament wara l-għażla tal-membri ta’ grupp. Hija tissuġġerixxi wkoll li l-esperti individwali jagħmlu dikjarazzjonijiet annwali tal-interessi u li d-dokumenti dwar il-ħidma tal-- tal-gruppi ta' esperti u l-- tas-sottogruppi tagħhom jiġu ppubblikati b'mod sistematiku u f'waqtu.

L-Ombudsman talbet lill-Kummissjoni tispjega sat-30 ta' April 2016 kif biħsiebha tindirizza r-rakkomandazzjonijiet tagħha.

Sfond

L-Ombudsman fetħet inkjesta strateġika dwar il-kompożizzjoni tal-gruppi ta' esperti f'Mejju 2014. Hija bbażat ruħha fuq ir-riżultati ta’ konsultazzjoni pubblika sussegwenti biex tagħmel sensiela ta’ proposti inizjali lill-Kummissjoni. Ir-rakkomandazzjonijiet ippubblikati llum ifittxu li jindirizzaw it-tħassib li fadal dwar it-trasparenza fir-rigward tal-iskrutinju pubbliku tal-gruppi ta’ esperti.

Hemm aktar minn 800 grupp ta’ esperti li jagħtu pariri lill-Kummissjoni Ewropea. Dawn il-gruppi jistgħu jikkonsistu minn individwi, organizzazzjonijiet, Stati Membri u awtoritajiet pubbliċi oħra. Il-Kummissjoni tista' tiddeċiedi li tuża l-kontribut tal-esperti meta tħejji proposti leġiżlattivi jew inizjattivi ta' politika, kif ukoll fir-rigward tal-implimentazzjoni ta' leġiżlazzjoni, programmi u politiki jew it-tħejjija ta' atti delegati. Ir-rakkomandazzjoni sħiħa tista’ tinstab hawnhekk.