D’iarr an tOmbudsman Eorpach, P. Nikiforos Diamandouros, tuilleadh faisnéise ón gCoimisiún Eorpach maidir leis na gníomhaíochtaí atá déanta aige chun lánpháirtiú daoine faoi mhíchumas a chinntiú. Tagann sé seo sna sála ar an bhfreagra fairsing a thug daoine den phobal, eagraíochtaí neamhrialtasacha agus ombudsmain náisiúnta ar fhiosrúchán féintionscnaimh an Ombudsman ar an tsaincheist. Ba cheart don Choimisiún tuarascáil a chur faoi bhráid an Ombudsman faoin 31 Eanáir 2006, maidir lena ghníomhaíochtaí i réimsí amhail fostaíocht, inrochtaineacht a áitreabh agus beartais faisnéise.

Cúlra

Is sciar suntasach de dhaonra an Aontais iad daoine faoi mhíchumas. Tá raon leathan bacainní rompu a chuireann cosc orthu comhdheiseanna, neamhspleáchas agus lánpháirtiú iomlán eacnamaíoch agus sóisialta a bhaint amach. I mí na Samhna 2003, chuir an tOmbudsman tús le fiosrúchán féintionscnaimh ar bhearta an Choimisiúin chun a chinntiú nach ndéantar idirdhealú ar dhaoine faoi mhíchumas ina gcaidreamh leis na hinstitiúidí Eorpacha.

Ina fhreagairt ar an bhfiosrúchán, leag an Coimisiún béim ar an ardtosaíocht a thug sé do chomhionannas deiseanna a chur chun cinn do dhaoine faoi mhíchumas. Liostaíodh ann roinnt tionscnamh a ghlac sé le blianta beaga anuas, lena n-áirítear an t-athbhreithniú ar an gCód Dea-Chleachtais maidir le Daoine faoi Mhíchumas a Fhostú.

Thug an tOmbudsman cuireadh ansin do thuairimí ón bpobal agus fuair sé 56 aighneacht san iomlán. Glactar anois leis na hábhair imní a cuireadh in iúl sna freagraí sna ceisteanna leantacha ar an gCoimisiún.

Roinnt samplaí: Cé chomh hinrochtana is atá nósanna imeachta earcaíochta d’iarrthóirí faoi mhíchumas? Cad atá déanta chun rochtain ar áitreabh an Choimisiúin a dhéanamh níos éasca? Conas is féidir le daoine faoi mhíchumas an rochtain is fearr is féidir a fháil ar fhaisnéis, ar shuíomhanna gréasáin agus ar dhoiciméid de chuid an Aontais? Conas a chuireann an Coimisiún oiliúint ar a fhoireann chun déileáil le daoine faoi mhíchumas?

Chun achoimre ar an iarraidh is déanaí ón Ombudsman chuig an gCoimisiún a léamh, agus chun féachaint ar dhoiciméid eile a bhaineann leis an bhfiosrúchán, tabhair cuairt ar:

http://www.ombudsman.europa.eu/cases/correspondence.faces/en/3540/html.bookmark

Chun eolas a fháil faoin bhfiosrúchán seo: José Martinez Aragón, Príomhoifigeach Dlí, Teil. +33 3 88 17 24 01