Strasbourg, 09.04.2013

A Laitinen, a chara,

Faighim i gceangal leis seo mo dhréachtmholadh sa chás thuas ina ndéanaim moltaí áirithe do Frontex, d’fhonn cur chun feidhme na gceart bunúsach a neartú a thuilleadh.

Is é seo a leanas mo dhréachtmholadh:

D’fhéadfadh Frontex machnamh a dhéanamh ar an ngníomhaíocht bhreise seo a leanas a dhéanamh:

Maidir leis an Straitéis

A. soiléiriú a dhéanamh ar (i) an measann sé go bhfuil sé freagrach as sáruithe ar chearta bunúsacha laistigh dá ghníomhaíochtaí agus, má mheasann, cad iad na téarmaí faoina bhfuil sé freagrach; agus (ii) sa Chód Iompair, an creat dlíthiúil is infheidhme maidir le hiompar na rannpháirtithe uile in oibríochtaí Frontex (pointe 61 de mheasúnú an Ombudsman);

B. coimircí sonracha cosanta sonraí a shainiú d’imircigh idircheaptha, chomh maith le sásraí sásaimh d’ábhair sonraí a sáraítear a gcearta. De rogha air sin, d’fhéadfaí an Plean Gníomhaíochta a fhorlíonadh ina leith sin (pointe 66 de mheasúnú an Ombudsman);

A mhéid a bhaineann leis an bPlean Gníomhaíochta

C. bearta a shainaithint a thugann gné nithiúil don chuspóir dá bhforáiltear i bpointe 17 den Straitéis, is é sin, tar éis d'fhoireann Frontex nó d'oifigigh rannpháirteacha iad a thuairisciú, gur féidir "gníomhú ar aon teagmhais nó rioscaí tromchúiseacha maidir le cearta bunúsacha" (pointe 62 de mheasúnú an Ombudsman);

D. ina sonrófar (i) dáta foilsithe na tuarascála bliantúla ar dhul chun cinn maidir le cur chun feidhme na Straitéise, agus (ii) na modhanna trína bpoibleofar í (pointe 63 de mheasúnú an Ombudsman);

E. soiléiriú a dhéanamh ar na smachtbhannaí atá le cur i bhfeidhm maidir le rannpháirtithe in oibríochtaí Frontex nach baill dá fhoireann féin iad (pointe 64 de mheasúnú an Ombudsman);

F. treoirlínte sonracha a leagan síos do rannpháirtithe in oibríochtaí comhpháirteacha um fhilleadh maidir le conas déileáil le cásanna anacra ina bhféadfadh imircigh idircheaptha teacht orthu féin (pointe 65 de mheasúnú an Ombudsman);

A mhéid a bhaineann leis na Cóid Iompair

G. cineál dlíthiúil an Chóid Iompair a shoiléiriú tuilleadh (pointe 68 de mheasúnú an Ombudsman);

H. Airteagail 19(2) agus 20(2) den Chód Iompair a shoiléiriú (pointe 70 de mheasúnú an Ombudsman);

I. foráil a chur san áireamh sa Chód Comhpháirteach um Fhilleadh atá le teacht maidir leis an ngaol idir an Cód seo agus an Cód Iompair (ginearálta) (pointe 71 de mheasúnú an Ombudsman);

A mhéid a bhaineann le hoibríochtaí a fhoirceannadh/a chur ar fionraí

J. treoir nithiúil a sholáthar maidir le brí iarbhír na bhfoirmlithe amhail "mura gcomhlíontar na coinníollacha chun na comhoibríochtaí nó na treoirthionscadail sin a sheoladh a thuilleadh" agus sáruithe ar chearta bunúsacha nó ar oibleagáidí cosanta idirnáisiúnta "atá de chineál tromchúiseach nó ar dócha go leanfar díobh" (pointe 76 de mheasúnú an Ombudsman);

K. breithniú a dhéanamh an bhféadfaí rialacha a leagan síos, mar shampla sa Chód Comhpháirteach um Fhilleadh, maidir le comhoibríochtaí um fhilleadh a fhoirceannadh agus a chur ar fionraí (pointe 77 de mheasúnú an Ombudsman);

A mhéid a bhaineann leis an bhFóram Comhchomhairleach

L. aon ghníomh is féidir a dhéanamh chun dlúthchomhar agus tacaíocht an Fhóraim leis an Oifigeach um Chearta Bunúsacha a spreagadh chun a cúraimí a chomhlíonadh go héifeachtach (pointe 78 de mheasúnú an Ombudsman);

A mhéid a bhaineann leis an Oifigeach um Chearta Bunúsacha

M. (i) aon ghníomh féideartha a dhéanamh chun a chur ar chumas an Oifigigh um Chearta Bunúsacha breithniú a dhéanamh ar dhéileáil le gearáin maidir le sáruithe ar chearta bunúsacha i ngníomhaíochtaí uile Frontex arna gcur isteach ag daoine a ndéanann na sáruithe difear dóibh ina n-aonar agus ar mhaithe le leas an phobail freisin, agus (ii) tacaíocht riaracháin leordhóthanach a sholáthar chun na críche sin (pointe 83 de mheasúnú an Ombudsman).

I gcomhréir le mo Reacht, seolfaidh Frontex tuairim mhionsonraithe roimh an 31 Iúil 2013. D’fhéadfadh sé gurb é a bheadh sa tuairim mhionsonraithe glacadh le mo dhréachtmholadh agus tuairisc ar an gcaoi ar cuireadh chun feidhme é.

Le dea-mhéin,

P. Nikiforos Diamandouros

Imfhálú:

• Dréachtmholadh do Frontex