Thug an tOmbudsman Eorpach, P. Nikiforos Diamandouros, cuireadh do dhaoine aonair, d’eagraíochtaí neamhrialtasacha agus d’eagraíochtaí eile atá gníomhach i réimse chosaint na gceart bunúsach barúlacha a chur isteach ina fhiosrúchán leanúnach maidir le Gníomhaireacht Teorainneacha an Aontais Eorpaigh, Frontex. Comhordaíonn Frontex an comhar oibríochtúil idir na Ballstáit i réimse na slándála teorann. I mí an Mhárta 2012, chuir an tOmbudsman roinnt ceisteanna ar Frontex faoi chur chun feidhme a oibleagáidí maidir le cearta bunúsacha. D’fhreagair Frontex i mí na Bealtaine 2012. Is féidir tuairimí maidir le freagra Frontex a chur faoi bhráid an Ombudsman go dtí an 30 Meán Fómhair 2012.

Eagraíochtaí um chearta bunúsacha agus eagraíochtaí neamhrialtasacha ar iarradh orthu barúlacha a chur isteach

In 2009, bhí an Chairt um Chearta Bunúsacha ceangailteach ó thaobh dlí ar Frontex, atá lonnaithe i Vársá. Ó shin i leith, cheistigh roinnt eagraíochtaí sochaí sibhialta an bhfuil Frontex ag déanamh go leor chun an Chairt a chomhlíonadh, mar shampla, agus gardaí teorann AE á n-imscaradh aige chun na Gréige áit ar coinníodh daoine faoi choinneáil in ionaid choinneála faoi choinníollacha a cháin an Chúirt Eorpach um Chearta an Duine.

I mí Dheireadh Fómhair 2011, ghlac Parlaimint na hEorpa agus an Chomhairle Rialachán lena leagtar amach oibleagáidí sonracha breise maidir le cearta bunúsacha do Frontex. I mí an Mhárta 2012, chuir an tOmbudsman roinnt ceisteanna ar Frontex faoin gcaoi a bhfuil na hoibleagáidí sin á gcomhlíonadh aige, lena n-áirítear an oibleagáid straitéis um chearta bunúsacha a tharraingt suas, chomh maith le cóid iompair is infheidhme maidir lena chuid oibríochtaí.

Thíolaic Frontex a thuairim i mí na Bealtaine 2012. Mhínigh sé go bhfuil straitéis um chearta bunúsacha forbartha aige ó 2010 i leith, chomh maith le cód iompair ceangailteach dóibh siúd atá rannpháirteach ina ghníomhaíochtaí. Ina theannta sin, liostaigh Frontex bearta eile atá á ndéanamh aige faoi láthair chun a áirithiú go n-urramófar cearta bunúsacha ina n-iomláine.

Measann an tOmbudsman go mbeadh sé úsáideach, sula leanfaí ar aghaidh tuilleadh, faisnéis agus tuairimí a lorg ó eagraíochtaí neamhrialtasacha agus ó eagraíochtaí eile atá gníomhach i réimse chosaint na gceart bunúsach. Dá bhrí sin, iarrann sé ar pháirtithe leasmhara barúlacha a thabhairt maidir le tuairim Frontex. Thug an tOmbudsman cuireadh freisin do Ghníomhaireacht an Aontais Eorpaigh um Chearta Bunúsacha a tuairimí a thabhairt.

Tá gach doiciméad a bhaineann leis an bhfiosrúchán, lena n-áirítear tuairim Frontex, ar fáil ag: http://www.ombudsman.europa.eu/en/cases/correspondence.faces/en/11757/html.bookmark