Tar éis líon suntasach gearán maidir leis an úsáid a bhaineann an Oifig Eorpach um Roghnú Foirne (EPSO) as ciantástáil i nósanna imeachta roghnúcháin chun státseirbhísigh AE a earcú, rinne an tOmbudsman fiosrúchán féintionscnaimh chun na saincheisteanna a ardaíodh a fhiosrú.

Sainaithníodh i bhfiosrúchán an Ombudsman saincheisteanna éagsúla maidir leis an gcaoi ar eagraigh agus ar mhaoirsigh EPSO na ciantrialacha, lena n-áirítear maidir leis na riachtanais a chuir sé i bhfeidhm. Sainaithníodh san fhiosrúchán freisin easnaimh san fhaisnéis a chuir EPSO ar fáil d’iarratasóirí agus d’iarrthóirí, chomh maith leis an gcaoi ar dhéileáil sé le gearáin agus le hathsceidealú trialacha. Chun aghaidh a thabhairt orthu sin, rinne an tOmbudsman moltaí a bhí dírithe ar rialacha agus cleachtais riaracháin EPSO a fheabhsú.

Dhún an tOmbudsman an fiosrúchán, toisc nach raibh údar le tuilleadh fiosrúchán. Mar sin féin, d’áitigh sí ar EPSO a chinntiú go gcuirfeadh sé faisnéis shoiléir chomhsheasmhach ar fáil maidir le ‘comórtais’ agus próisis roghnúcháin amach anseo chun státseirbhísigh an Aontais a earcú. Tá tábhacht ar leith ag baint leis sin toisc go bhféachann sé leis an gcur chuige nua seo maidir le hearcaíocht agus tástálacha a bhrú ar aghaidh. Trí fhaisnéis shoiléir a chur ar fáil d’iarrthóirí, is féidir muinín an phobail as cinntí agus ceanglais ghaolmhara agus glacadh leo a fheabhsú.

Breithneoidh an tOmbudsman filleadh ar na saincheisteanna sin amach anseo, chun measúnú a dhéanamh ar an dul chun cinn.