Is eagraíocht neamhrialtasach chomhshaoil é an gearánach a d’iarr ar an gCoimisiún Eorpach rochtain phoiblí a thabhairt ar dhoiciméid a bhaineann le tionscadal taighde taiscéalaíochta mianraí a fuair cistí ón Aontas faoin gclár Fís 2020. Shainaithin an Coimisiún cúig dhoiciméad mar dhoiciméid a thagann faoi raon feidhme iarraidh an ghearánaigh. Dhiúltaigh sé doiciméad amháin a nochtadh agus thug sé rochtain pháirteach ar cheithre dhoiciméad. Mar thaca lena chinneadh, d’agair sé eisceachtaí éagsúla faoi reachtaíocht an Aontais maidir le rochtain phoiblí ar dhoiciméid, agus d’áitigh sé go bhféadfadh nochtadh an bonn a bhaint de leasanna tráchtála duine nádúrtha nó dhlítheanaigh agus de chosaint sonraí pearsanta.

Tar éis dó athbhreithniú a dhéanamh ar na doiciméid, mheas an tOmbudsman go bhfuil faisnéis iontu ar féidir a thuiscint gur ‘faisnéis chomhshaoil’ í de réir bhrí Rialachán Aarhus AE, ar cheart go mbainfeadh sí tairbhe as trédhearcacht níos fearr. D’iarr sí ar an gCoimisiún athbhreithniú a dhéanamh ar a sheasamh d’fhonn an rochtain phoiblí is leithne is féidir a dheonú.

Choimeád an Coimisiún a sheasamh nach féidir aon rochtain bhreise a dheonú. Cé gur chuir an tOmbudsman in iúl gur oth léi cinneadh an Choimisiúin gan tuilleadh codanna de na doiciméid atá i gceist a nochtadh, d’admhaigh sí go bhfuil faisnéis ar fáil go poiblí cheana féin faoin tionscadal taighde agus, go háirithe, faoi na gníomhaíochtaí sa mhianach atá i gceist. I bhfianaise an mhéid sin, mheas an tOmbudsman nach raibh údar le tuilleadh fiosrúchán ar an ábhar sin.

Chuir sí in iúl, áfach, go raibh imní uirthi faoin gcaoi a ndéileálann an Coimisiún le hiarrataí ar rochtain ar dhoiciméid ina bhfuil faisnéis faoin gcomhshaol. Chuir sí i dtábhacht nach mór na heisceachtaí maidir le rochtain phoiblí a dheonú a léirmhíniú ar bhealach sriantach a mhéid a bhaineann le faisnéis faoin gcomhshaol agus mheabhraigh sí don Choimisiún go bhfuil trédhearcacht sa réimse sin ríthábhachtach chun dlisteanacht ghníomhaíochtaí an Aontais agus muinín an phobail astu a fheabhsú.