Malli għalqet inkjesta relatata ma’ mudelli tal-IA bi skop ġenerali u mal-konsum tal-enerġija, l-Ombudswoman Ewropew Teresa Anjinho ħeġġet lill-Kummissjoni Ewropea tkompli ttejjeb is-soluzzjonijiet tekniċi biex il-fornituri tal-IA jkunu jistgħu jistmaw aħjar l-użu tal-enerġija tal-mudelli tagħhom u jilħqu l-objettivi stabbiliti fl-Att tal-UE dwar l-IA.

L-inkjesta tal-Ombudswoman segwiet ilment minn Membru tal-Parlament Ewropew li kien qajjem tħassib dwar diskrepanzi possibbli rigward il-konsum tal-enerġija bejn l-Att dwar l-IA u l-linji gwida maħsuba biex jassistu l-implimentazzjoni tiegħu għal mudelli tal-IA bi skop ġenerali – il-Kodiċi ta’ Prattika.

Fis-sejbiet tagħha, l-Ombudswoman irrikonoxxiet li l-Kodiċi ta’ Prattika huwa biss miżura temporanja biex tiġi żgurata l-konformità mal-Att dwar l-IA. Hija enfasizzat li l-Kummissjoni għandha obbligu li timmonitorja u tevalwa regolarment il-prestazzjoni tal-Kodiċi u li tħeġġeġ ir-rieżami u l-adattament tiegħu jekk ikun meħtieġ. Fl-aħħar mill-aħħar, il-Kodiċi jista’ jiġi sostitwit bi strumenti mmirati bħal standards armonizzati.

L-isfond

L-Att dwar l-IA jirrikjedi li l-fornituri tal-IA bi skop ġenerali jżommu dokumentazzjoni teknika aġġornata dwar il-mudelli tagħhom, inkluża informazzjoni dwar il-konsum tal-enerġija. Jekk fornitur ta’ mudell ma jkollux l-informazzjoni meħtieġa biex jistma l-konsum tal-enerġija, il-Kodiċi ta’ Prattika attwali jippermettilhom jispjegaw liema informazzjoni ma għandhomx. L-Uffiċċju għall-IA tal-Kummissjoni mbagħad jagħmel il-valutazzjoni tiegħu stess abbażi tal-ispjegazzjonijiet li jirċievi mill-fornitur tal-mudell rigward l-informazzjoni li ma jkollux, kif ukoll data oħra għad-dispożizzjoni tiegħu.