L-ilmentatur, Membru tal-Parlament Ewropew, qajjem tħassib mal-Kummissjoni Ewropea dwar id-dispożizzjonijiet fil-Kodiċi ta’ Prattika għall-implimentazzjoni tal-Att dwar l-IA fir-rigward tal-IA bi skop ġenerali, speċifikament dwar il-konsum tal-enerġija. B’mod partikolari, huwa indika l-allegati diskrepanzi bejn ir-rekwiżiti imposti mill-Att fuq il-fornituri ta’ sistemi tal-IA bi skop ġenerali u d-dispożizzjonijiet korrispondenti tal-Kodiċi ta’ Prattika, li huwa maħsub biex jassisti lil dawn il-fornituri fl-implimentazzjoni tal-Att.

Wara inkjesta, l-Ombudsman sabet li l-Kummissjoni kienet spjegat b’mod raġonevoli kif l-Uffiċċju għall-IA tagħha biħsiebu jivvaluta l-konsum tal-enerġija tas-sistemi tal-IA bi skop ġenerali f’sitwazzjonijiet fejn il-fornitur tagħhom ma jkollux l-informazzjoni meħtieġa biex jagħmel stima. Hija sabet li l-Kummissjoni għalhekk kienet ipprovdiet l-assigurazzjonijiet meħtieġa li se tissodisfa l-objettiv sottostanti tal-Att dwar l-IA f’dan ir-rigward. L-Ombudsman innotat ukoll li l-Kodiċi ta’ Prattika huwa maħsub biex ikun soluzzjoni temporanja, li tista’ tittejjeb aktar u li x’aktarx tiġi sostitwita minn strumenti mmirati, bħal standards armonizzati. B'riżultat ta' dan, l-Ombudsman għalqet l-inkjesta.