L-Ombudswoman Ewropew Teresa Anjinho fetħet inkjesta biex teżamina kif il-Kummissjoni Ewropea tiżgura li l-laqgħat tagħha ta’ “kontrolli tar-realtà” mal-partijiet ikkonċernati jsegwu r-rekwiżiti ta’ trasparenza għat-teħid tad-deċiżjonijiet.

Il-kontrolli tar-realtà huma għodda ta’ konsultazzjoni ġdida li taħtha l-Kummissjoni tfittex informazzjoni direttament mill-partijiet ikkonċernati li hija stess identifikat biex titgħallem dwar kwalunkwe ostaklu li jiffaċċjaw meta jimplimentaw ir-regoli tal-UE.   

Il-Kummissjoni tgħid li peress li l-kontrolli tar-realtà huma għall-ġbir ta’ informazzjoni fattwali, data, jew għarfien espert, huma għalhekk eżentati mir-regoli ta’ trasparenza li normalment jirregolaw il-laqgħat bejn il-Kummissjoni u r-rappreżentanti ta’ gruppi ta’ interess.

L-ilmentatur, organizzazzjoni tas-soċjetà ċivili, jargumenta li l-istadji kollha tat-teħid tad-deċiżjonijiet tal-UE jridu jkunu koperti minn miżuri ta’ trasparenza sinifikanti.

Bħala l-ewwel pass fl-inkjesta, l-Ombudswoman ippreżentat sensiela ta’ mistoqsijiet lill-Kummissjoni dwar il-kontrolli tar-realtà.

Dawn jinkludu kif tiżgura li tali laqgħat jibqgħu fil-kamp ta’ applikazzjoni tal-ġbir ta’ informazzjoni fattwali u ma jsirux konsultazzjonijiet usa’, li huma soġġetti għal miżuri standard ta’ trasparenza applikabbli għal laqgħat mal-lobbisti.

L-Ombudswoman talbet ukoll lill-Kummissjoni tipprovdi lista tal-kontrolli kollha tar-realtà li wettqet fl-2025 u fl-2026, kif ukoll informazzjoni dwar kif tiżgura li l-interessi tan-negozju ma jiddominawx id-diskussjonijiet, u kif tiżgura li l-organizzazzjonijiet tas-soċjetà ċivili jkollhom aċċess f’waqtu għal dak li ġie diskuss fil-laqgħat ta’ kontroll tar-realtà.  

 Hija talbet lill-Kummissjoni twieġeb sat-18 ta’ Settembru 2026.

Sfond

Il-miżuri ta’ trasparenza għal-laqgħat bejn il-Kummissarji u r-rappreżentanti ta’ gruppi ta’ interess, u għal-laqgħat bejn il-persunal għoli tal-Kummissjoni u r-rappreżentanti ta’ gruppi ta’ interess huma stabbiliti f’żewġ Deċiżjonijiet tal-Kummissjoni (2024/3081 u 2024/3082).

L-Artikolu 3 ta’ kull deċiżjoni jistabbilixxi eżenzjonijiet mill-miżuri ta’ trasparenza, filwaqt li jinnota li d-deċiżjoni ma għandhiex tkopri “laqgħat organizzati għall-finijiet ta’ sottomissjonijiet: bi tweġiba għal talbiet diretti u speċifiċi mill-Kummissjoni, mir-rappreżentanti jew mill-persunal tagħha, għal informazzjoni fattwali, data jew għarfien espert.