L-Ombudsman Ewropew, Emily O'Reilly, filwaqt li laqgħet il-progress reali mill-Kummissjoni Ewropea, għamlet sensiela ta' rakkomandazzjonijiet dwar kif tista' tkompli tiżdied it-trasparenza tan-negozjati li għaddejjin dwar is-Sħubija Trans-Atlantika ta' Kummerċ u ta' Investiment (TTIP) mal-Istati Uniti. Ir-rakkomandazzjonijiet huma relatati mal-aċċess pubbliku għal testi ta’ negozjar konsolidati, żvelar proattiv akbar tad-dokumenti tat-TTIP u aktar trasparenza fir-rigward tal-laqgħat li l-uffiċjali tal-Kummissjoni jkollhom dwar it-TTIP ma’ organizzazzjonijiet tan-negozju, gruppi ta’ lobbying jew NGOs.

Emily O'Reilly qalet: "Il-Kummissjoni għamlet sforzi reali biex tagħmel in-negozjati tat-TTIP aktar trasparenti. Jiena konxju li l-Kummissjoni xi drabi teħtieġ li titkellem mal-Istati Uniti b’mod kunfidenzjali biex tkun tista’ tinnegozja b’mod effettiv. Madankollu, ir-reżistenza tal-Istati Uniti għall-pubblikazzjoni ta’ ċerti dokumenti tat-TTIP fiha nnifisha mhijiex biżżejjed biex iżżommhom mill-pubbliku Ewropew. Il-Kummissjoni għandha tiżgura f'kull ħin li l-eċċezzjonijiet għad-dritt fundamentali taċ-ċittadini tal-UE li jiksbu aċċess għad-dokumenti jkunu fondati sew u ġġustifikati bis-sħiħ."

Il-lobbying tat-trasparenza wkoll għad-diretturi tal-Kummissjoni, il-kapijiet tal-unitajiet, in-negozjaturi

L-investigazzjoni tal-Ombudsman dwar it-trasparenza tan-negozjati tat-TTIP, li nfetħet f'Lulju 2014, ġiet skattata minn tħassib dwar dokumenti ewlenin li ma ġewx żvelati u dwar l-allegat għoti ta' aċċess privileġġat lil ċerti partijiet ikkonċernati.  Hija rċeviet aktar minn 6000 email bi tweġiba għall-konsultazzjoni pubblika tagħha dwar din il-kwistjoni. Ir-rapport dwar din il-konsultazzjoni huwa disponibbli hawnhekk.

Filwaqt li qieset l-ewwel passi tal-Kummissjoni biex iżżid it-trasparenza tat-TTIP, kif ukoll il-kontribuzzjonijiet għall-konsultazzjoni pubblika tagħha, l-Ombudsman ikkonkludiet li huma meħtieġa aktar passi biex tiżdied il-leġittimità tan-negozjati f'għajnejn il-pubbliku. Għalhekk, hija tistieden lill-Kummissjoni tistabbilixxi lista komprensiva ta' dokumenti pubbliċi u mhux pubbliċi tat-TTIP u għal proattività akbar fir-rigward tal-pubblikazzjoni ta' dokumenti, inklużi l-aġendi u l-minuti tal-laqgħat mal-lobbisti.

L-Ombudsman tistieden ukoll lill-Kummissjoni testendi l-obbligi ta’ trasparenza fir-rigward tal-laqgħat mal-partijiet ikkonċernati għal-livelli tad-diretturi, tal-kapijiet tal-unitajiet u tan-negozjaturi tal-Kummissjoni. L-uffiċjali tal-UE involuti fin-negozjati tat-TTIP għandhom jiltaqgħu biss ma’ rappreżentanti ta’ gruppi ta’ interess li huma rreġistrati fir-Reġistru tat-Trasparenza.

Id-deċiżjoni sħiħa tal-Ombudsman hija disponibbli hawnhekk.