L-Ombudsman Ewropew, P. Nikiforos Diamandouros, talab lill-Bank Ewropew tal-Investiment (BEI) biex jirrevedi l-impatt ambjentali ta’ linja ferrovjarja ta’ veloċità għolja ppjanata li tgħaddi minn Barċellona, Spanja. Dan isegwi lment minn resident ta’ Barċellona, li allega li l-proġett tal-mina għall-ferrovija jikkawża ħsara ambjentali serja. Fil-fehma tal-ilmentatur, il-qbil tal-BEI li jikkofinanzja dan is-segment tal-proġett kien żbaljat. Matul l-investigazzjoni tiegħu, l-Ombudsman ma seta' jsib l-ebda rekord ta' rieżami xieraq mill-BEI tal-valutazzjoni tal-impatt ambjentali għas-segment tal-proġett li għaddej minn Barċellona. Għalhekk huwa talab lill-BEI biex ma jipprovdi l-ebda assistenza finanzjarja qabel ma jwettaq u jiddokumenta bis-sħiħ tali rieżami.

Sfond

Fl-1994, l-assi Madrid-Barċellona-Perpignan-Montpellier ġie identifikat bħala wieħed mill-proġetti prijoritarji tan-Netwerk trans-Ewropew fl-UE. Fi Spanja, dan il-proġett jinkludi l-iżvilupp tal-konnessjoni ferrovjarja ta’ veloċità għolja bejn Madrid u l-fruntiera Franċiża (Madrid-Barċellona-Figueres). Il-BEI għandu jipprovdi finanzjament ta' EUR 2 500 miljun, li jirrappreżenta aktar minn kwart tal-ispiża totali. L-ispiża li jifdal se tkun koperta mill-Fond ta’ Koeżjoni Ewropew u mill-awtoritajiet Spanjoli.

F'Jannar 2006, l-ilmentatur irrikorra għand l-Ombudsman, u argumenta li s-segment ferrovjarju ppjanat miċ-ċentru ta' Barċellona jista' jikkawża ħsara ambjentali serja lill-bini tal-madwar, kemm jekk pubbliku (eż.," Sagrada Familia" ta' Gaudí) kif ukoll jekk privat. Huwa kkritika lill-awtoritajiet Spanjoli talli ma vvalutawx kif xieraq l-impatt ambjentali tal-proġett u talli naqsu milli jeżaminaw rotot ferrovjarji alternattivi possibbli. Fil-fehma tiegħu, il-BEI għandu jeżamina mill-ġdid il-proġett u jikkunsidra mill-ġdid id-deċiżjoni tiegħu li jiffinanzjah.

Fl-opinjoni tiegħu, il-BEI enfasizza li kien irreveda bir-reqqa l-valutazzjoni tal-impatt ambjentali mwettqa mill-awtoritajiet Spanjoli għal dan is-segment tal-proġett. Skont il-BEI, il-valutazzjoni saret skont l-istandards għoljin tal-BEI stess.

Matul l-investigazzjoni tiegħu tal-ilment, l-Ombudsman eżamina l-fajls rilevanti. Huwa ma seta' jsib l-ebda evidenza dokumentarja tar-rieżami tal-BEI tal-valutazzjoni tal-impatt ambjentali tal-awtoritajiet Spanjoli. Għalhekk, l-Ombudsman talbet lill-BEI jirrieżamina u jiddokumenta bis-sħiħ il-valutazzjoni qabel ma jagħti kwalunkwe assistenza finanzjarja lil din il-parti tal-proġett. Huwa talab lill-BEI jibgħatlu l-opinjoni dettaljata tiegħu qabel it-30 ta' Settembru 2008.

Biex taqra l-abbozz ta' rakkomandazzjoni tal-Ombudsman, jekk jogħġbok mur fuq: http://www.ombudsman.europa.eu/recommen/en/060244.htm

Għal informazzjoni dwar l-investigazzjoni: Is-Sur José Martínez-Aragón, Konsulent Legali Prinċipali, tel: +33 3 88 17 2401