Strasburgu, 08/05/2018

Ilment 488/2018/KR u 514/2018/KR

Suġġett: Ħatra tas-Segretarju Ġenerali l-ġdid

Għażiż Sur President,

Irċevejt żewġ ilmenti minn delegazzjonijiet tal-Parlament Ewropew[1] li jallegaw li l-ħatra tas-Segretarju Ġenerali l-ġdid tal-Kummissjoni ma kinitx konformi mar-Regolamenti tal-Persunal tal-UE u mal-prinċipji ta' amministrazzjoni tajba. Ftaħt inkjesta konġunta dwar dawn l-ilmenti.

Il-Parlament diġà wettaq eżami estensiv tal-kwistjoni[2], b'żewġ kwestjonarji u dibattiti dettaljati kemm fil-kumitat kif ukoll fil-plenarja, li laħqu l-qofol tagħhom f'riżoluzzjoni komprensiva tat-18 ta' April 2018.

Sabiex ma jkunx hemm duplikazzjoni tax-xogħol diġà mwettaq mill-Parlament, se nikkunsidra, għall-finijiet tal-inkjesta tiegħi, li t-tweġibiet ipprovduti mill-Kummissjoni lill-Parlament huma, sakemm ma tinfurmanix mod ieħor, il-pożizzjoni finali tal-Kummissjoni dwar dawk il-kwistjonijiet. Nissottolinja wkoll li se neżamina l-kwistjonijiet li jinqalgħu fl-inkjesta tiegħi skont il-mandat indipendenti mogħti lill-Ombudsman permezz tat-Trattati tal-UE. L-inkjesta tiegħi se tinkludi spezzjoni tad-dokumenti kollha meħtieġa miżmuma mill-Kummissjoni.

F’dak il-kuntest, inkun grat jekk tkun tista’ tipprovdi tweġibiet bil-miktub għall-mistoqsijiet li ġejjin qabel il-15 ta’ Ġunju 2018:

1. Ir-riżoluzzjoni tal-Parlament tiddikjara li l-ħatra "tista' titqies bħala azzjoni li tixbah il-kolp ta' stat li ġġebbdet u possibbilment saħansitra qabżet il-limiti tal-liġi". Il-Kummissjoni kif irriflettiet dwar din il-karatterizzazzjoni tal-mod li bih saret il-ħatra u x'tagħlimiet ħadet, jekk kien hemm, mill-kwistjoni b'mod ġenerali?

2. Il-Kummissjoni ma weġbitx diversi mistoqsijiet tal-Parlament dwar kif din il-ħatra setgħet għamlet ħsara lill-fiduċja fl-UE kollha kemm hi. Il-Kummissjoni issa, meta tħares lura, tixtieq tirrifletti u tagħti l-fehma tagħha dwar jekk għamlitx ħsara lill-fiduċja fl-UE? Hija tqis li l-kritika mifruxa tal-mod kif saret il-ħatra kienet iġġustifikata?

3. Filwaqt li huwa importanti li l-pożizzjonijiet maniġerjali superjuri tal-Kummissjoni ma jkunux is-suġġett ta’ negozjati bejn l-Istati Membri jew il-partiti politiċi, iżda pjuttost deċiżjonijiet għall-Kulleġġ tal-Kummissarji, il-Kummissjoni kif se tiżgura fil-futur li dawn id-deċiżjonijiet ikunu bbażati fuq il-prinċipji tat-trasparenza, l-ugwaljanza, il-kwalifiki u l-mertu?

4. Il-Kummissjoni taqbel mad-dikjarazzjoni fir-riżoluzzjoni tal-Parlament li "l-ħatrietgħal karigi ta' livell għoli bħal dak tas-Segretarju Ġenerali għandhom isiru indipendentement minn ħatriet oħra, biex b'hekk jiġi evitat kwalunkwe suspett ta' ftehimiet ta' pakkett mhux trasparenti jew kompromessi bbażati fuq informazzjoni privileġġata"? Il-Kummissjoni tista' tikkummenta dwar din id-dikjarazzjoni?

5. Il-Kummissjoni Juncker hija eżekuttiva politika, li tikseb il-leġittimità tagħha mill-elezzjonijiet tal-Parlament Ewropew, u hija appoġġjata minn servizz ċivili indipendenti. Filwaqt li dan huwa komparabbli ma’ kemm-il gvern tal-Istati Membri tal-UE huma strutturati, il-Kummissjoni tista’ tikkummenta dwar kif timmaniġġja r-relazzjoni ta’ ħidma bejn in-naħat politiċi (jiġifieri, il-Kummissarji u l-kabinetti tagħhom) u tas-servizz ċivili f’livelli għolja?

6. Iċ-ċittadini jistennew li s-servizz ċivili tal-UE jagħti pariri indipendenti, filwaqt li jkun neċessarjament konxju tal-ambjent politiku li jaħdem fih. Il-Kummissjoni kif tiżgura li, meta xi ħadd jaqleb minn rwol politiku għoli għal maniġment superjuri tas-servizz ċivili indipendenti, iċ-ċittadini jkunu jistgħu jiġu assigurati dwar l-imparzjalità tas-servizz ċivili permanenti?

7. Il-Kummissjoni rrikonoxxiet nuqqasijiet fil-komunikazzjonijiet fir-rigward ta’ din il-ħatra. X’azzjonijiet biħsiebha tieħu l-Kummissjoni fil-futur sabiex ittejjeb it-trattament tagħha ta’ mistoqsijiet validi u leġittimi mill-midja, filwaqt li żżomm f’moħħha li skambji bħal dawn spiss ikunu l-uniku mod li bih iċ-ċittadini jirċievu tweġibiet għat-tħassib tagħhom.

Jekk jogħġbok innota li x’aktarx nibgħat it-tweġiba tiegħek lill-ilmentaturi għall-kummenti. Għalhekk inkun grat jekk il-Kummissjoni tkun tista’ tissottometti traduzzjoni tat-tweġiba tagħha kemm bl-Olandiż kif ukoll bil-Franċiż, li huma l-lingwi tal-ilmenti, qabel id-29 ta’ Ġunju 2018.

Spezzjoni ta' dokumenti

Barra minn hekk, iddeċidejt li huwa meħtieġ skont l-Artikolu 3.2 tal-Istatut tal-Ombudsman li nispezzjona d-dokumenti li ġejjin miżmuma mill-Kummissjoni:

Id-dokumenti kollha, kemm jekk f’format elettroniku jew stampat, inklużi korrispondenza, noti, memos, emails, u l-pariri legali kollha, mill-1 ta’ Settembru 2017 sat-18 ta’ April 2018, relatati mal-ħatra tas-Segretarju Ġenerali l-ġdid. Dan għandu jinkludi dokumenti mibgħuta mill-Kummissarji lill-kabinetti tagħhom, dokumenti fi ħdan u bejn il-kabinetti, kif ukoll dokumenti bejn il-Kummissarji/kabinetti u s-servizzi tal-Kummissjoni. Dan għandu jinkludi d-dokumenti kollha relatati mal-irtirar tas-Segretarju Ġenerali preċedenti, il-ħatra tad-Deputat Segretarju Ġenerali l-ġdid u sussegwentement tas-Segretarju Ġenerali l-ġdid, u l-minuti tal-laqgħa tal-Kapijiet tal-Kabinett tad-19 ta’ Frar 2018.

Inkun grat jekk is-servizzi tiegħek jikkuntattjaw lis-Sur Fergal O’ Regan, Kap tal-Unità, biex jaqblu dwar l-arranġamenti għall-ispezzjoni li għandha ssir qabel it-8 ta’ Ġunju 2018. Jekk jogħġbok innota li jistgħu jintalbu spezzjonijiet sussegwenti kif meħtieġ.

L-informazzjoni jew id-dokumenti li l-istituzzjoni tiegħek tqis li huma kunfidenzjali mhux se jiġu żvelati lill-ilmentatur jew lil kwalunkwe persuna oħra mingħajr il-qbil minn qabel tal-Kummissjoni. Informazzjoni u dokumenti ta’ dan it-tip se jitħassru mill-fajls tal-Ombudsman Ewropew ftit wara li tkun intemmet l-inkjesta [3].

Grazzi tal-kooperazzjoni tiegħek dwar din il-kwistjoni importanti.

Dejjem tiegħek,

Emily O'Reilly

Għeluq: Fuq l-ilmenti

[1] Id-delegazzjoni Netherlandiża D’66 (Grupp ALDE) u d-delegazzjoni tas-Soċjalisti Franċiżi (Grupp S&D)

[2] Ara l-fajl tas-suġġett bid-dokumentazzjoni kollha fuq is-sit web tal-Kumitat għall-Kontroll tal-Baġit //www.europarl.europa.eu/committees/en/cont/subject-files.html?id=20180326CDT02181

[3] F’konformità mal-Artikoli 4.8 u 9.4 tad-Dispożizzjonijiet ta’ Implimentazzjoni tal-Ombudsman Ewropew: https://www.ombudsman.europa.eu/en/resources/provisions.faces