Strasburgu, 07.05.2012

Segwitu għall-inkjesta fuq inizjattiva proprja OI/9/2010/RT dwar l-Uffiċċju Ewropew għas-Selezzjoni tal-Persunal

Għażiż Sur Bearfield,

Fit-18 ta’ Mejju 2011, infurmajtek bid-deċiżjoni tiegħi li tagħlaq l-inkjesta fuq inizjattiva proprja tiegħi dwar il-politika l-ġdida tal-EPSO fil-kompetizzjonijiet miftuħa rigward il-prenotazzjoni tat-testijiet ta’ ammissjoni, il-komunikazzjoni tagħha mal-kandidati, u l-kundizzjonijiet fid-diversi ċentri tal-ittestjar (numru ta’ referenza OI/9/2010/RT).

Fid-deċiżjoni tiegħi li tagħlaq l-inkjesta fuq inizjattiva proprja msemmija hawn fuq, għamilt żewġ kummenti oħra dwar i) il-prattika li jintbagħtu notifiki bil-posta elettronika lill-kandidati fil-qafas tal-kompetizzjonijiet ġenerali, u ii) is-sitwazzjoni fejn il-kandidati, għalkemm infurmati kif xieraq dwar il-perjodu ta’ prenotazzjoni, ma jkunux jistgħu jaċċessaw l-internet matul dak il-perjodu qasir u għalhekk ma jkunux jistgħu jibbukkjaw is-CBTs tagħhom (pereżempju, minħabba marda ġġustifikata b’mod adegwat).

L-EPSO wieġeb għall-kummenti ulterjuri tiegħi fit-3 ta’ Ottubru 2011. Hija ddikjarat li tejbet il-komunikazzjoni tagħha mal-kandidati. F’dan ir-rigward, il-kandidati jiġu infurmati permezz ta’ email dwar il-ħtieġa li jibbukkjaw it-testijiet ta’ ammissjoni tagħhom. Sabiex jiġi evitat li n-notifiki bl-email jiġu interċettati permezz ta’ filtri tal-ispam, l-EPSO ddeċieda li jibgħat dawn l-emails skont il-kategorija. L-EPSO ddikjara wkoll li f’każijiet debitament ġustifikati, jekk kandidat ma jkunx jista’ jaċċessa l-internet matul il-perjodu previst biex jibbukkja t-testijiet ta’ ammissjoni tiegħu u b’hekk ma jkunx jista’ jibbukkja s-CBTs tiegħu, l-EPSO jikkunsidra ċ-ċirkostanzi individwali tal-każ, sabiex jippermetti l-modifika tal-perjodu ta’ prenotazzjoni għall-kandidat ikkonċernat.

Madankollu, kwistjonijiet simili għal dawk imsemmija fiż-żewġ rimarki l-oħra tiegħi jiffurmaw is-suġġett ta’ lment li ġie ppreżentat reċentement lill-Ombudsman [1].

Iddeċidejt li niftaħ inkjesta dwar l-ilment imsemmi hawn fuq u tlabt lill-ilmentatur jiċċara għaliex iqis li l-pożizzjoni tal-EPSO dwar il-każ tiegħu ma kinitx sodisfaċenti, fid-dawl tal-konklużjonijiet tiegħi fl-inkjesta fuq inizjattiva proprja. Għalhekk, ma nistiedenx lill-EPSO jissottometti opinjoni dwar l-allegazzjoni u t-talba tal-ilmentatur f’dan l-istadju tal-proċedura tiegħi.

Madankollu, inkun grat ħafna jekk l-EPSO jkun jista’ jinformani dwar is-segwitu li jkun ta għall-impenji li jkun ħa fit-tweġiba tiegħu għar-rimarki ulterjuri msemmija hawn fuq, jiġifieri: i) jekk reġgħetx daħħlet il-prattika li tibgħat notifiki bil-posta elettronika lill-kandidati fil-qafas ta' kompetizzjonijiet miftuħa u, ii) jekk tippermettix il-modifika tal-perjodu ta' prenotazzjoni għall-kandidati li ma jistgħux jaċċessaw l-internet matul il-perjodu previst biex jibbukkjaw it-testijiet ta' ammissjoni tagħhom u b'hekk ma jistgħux jibbukkjaw is-CBTs tagħhom f'dak il-perjodu.

Inkun grat jekk l-EPSO jkun jista’ jibgħat it-tweġiba tiegħu sal-31 ta’ Mejju 2012.

Dejjem tiegħek,

P. Nikiforos Diamandouros