A Uasail X, a chara,

Tá gearán faighte ag an Ombudsman i gcoinne Ghníomhaireacht an Aontais Eorpaigh i ndáil le Comhar i bhForfheidhmiú an Dlí (Europol).

Baineann an gearán le diúltú Europol rochtain phoiblí a thabhairt ar an doiciméad dar teideal ‘Mastodoniser’. Agus rochtain á diúltú aige, bhí Europol ag brath ar an ngá atá le leas an phobail a chosaint maidir le slándáil phoiblí, agus d’áitigh sé go bhféadfadh nochtadh an bonn a bhaint d’imscrúduithe leanúnacha nó amach anseo ar chibearchoireacht. Déanann an gearánach agóid i gcoinne chur i bhfeidhm na heisceachta sin a mheasann sé a bheith díréireach.

Tá cinneadh déanta againn fiosrúchán a oscailt maidir leis an ngearán i gcoinne chinneadh Europol rochtain a dhiúltú faoi Rialachán 1049/2001.

Luaitear i Rialachán 1049/2001 gur cheart iarratais ar rochtain a láimhseáil go pras. Tá sé ag teacht leis an bprionsabal sin go bhféachann an tOmbudsman freisin le déileáil le cásanna den sórt sin chomh tapa agus is féidir.

Mar chéad chéim, measaimid gur gá athbhreithniú a dhéanamh ar an doiciméad atá i gceist sa ghearán. Bheimis buíoch dá bhféadfadh Europol cóip den doiciméad seo a chur ar fáil dúinn, i bhformáid leictreonach más féidir, trí ríomhphost criptithe,[1] faoin 19 Lúnasa 2024.

Déileálfar leis an doiciméad atá faoi réir na hiarrata ar rochtain phoiblí faoi rún, mar aon le haon ábhar eile a roghnaíonn Europol a roinnt linn a léiríonn sé faoi rún. Déanfar doiciméid den chineál sin a láimhseáil agus a stóráil i gcomhréir leis an stádas rúnda sin agus scriosfar iad ó chomhaid an Ombudsman go gairid tar éis dheireadh an fhiosrúcháin.

Leagadh seasamh Europol amach ina fhreagairt deimhniúcháin an 12 Iúil 2024. Mar sin féin, más mian le Europol tuairimí breise a chur ar fáil, atá le cur san áireamh ag an Ombudsman le linn an fhiosrúcháin seo, bheimis buíoch dá bhféadfaí iad a chur ar fáil dúinn laistigh de 15 lá oibre ón litir seo a fháil, is é sin, faoin 2 Meán Fómhair 2024.

Is í Michaela Gehring an t-oifigeach fiosrúcháin atá freagrach as an gcás.

Le dea-mhéin,

Rosita Hickey
Stiúrthóir Fiosrúcháin

Strasbourg, 31/07/2024

[1] Is féidir ríomhphoist chriptithe a sheoladh chuig ár mbosca ríomhphoist tiomnaithe.