L-Ombudswoman Ewropew Teresa Anjinho fetħet inkjesta dwar il-miżuri li jirregolaw l-użu tal-intelliġenza artifiċjali (IA) minn esperti esterni fl-evalwazzjoni tal-proposti ta’ finanzjament tal-UE. L-inkjesta se tiffoka fuq jekk l-istituzzjonijiet ikkonċernati stabbilewx biżżejjed salvagwardji fir-rigward tal-użu tal-IA.

Wara lment minn kumpanija Pollakka relatat mal-evalwazzjoni ta’ proposta għal finanzjament taħt il-programm tal-Aċċelleratur tal-EIC ta’ Orizzont Ewropa, l-Ombudswoman talbet għadd ta’ mistoqsijiet lill-Kummissjoni Ewropea u lill-Aġenzija Eżekuttiva Ewropea għall-Kunsill Ewropew tal-Innovazzjoni u għall-SMEs (EISMEA).

Il-mistoqsijiet jindirizzaw kwistjonijiet bħal liema regoli huma fis-seħħ dwar l-użu tal-IA minn evalwaturi esperti, kif il-Kummissjoni u l-EISMEA jivvalutaw ir-riskji u l-opportunitajiet tal-evalwaturi li jużaw għodod tal-IA ta’ partijiet terzi, u jekk l-evalwaturi humiex meħtieġa jiżvelaw l-użu tagħhom tal-IA.

Bħala parti mill-inkjesta, l-Ombudswoman qed tippjana wkoll li tispezzjona xi dokumenti li l-EISMEA u l-Kummissjoni jista’ jkollhom fir-rigward tal-użu tal-IA minn esperti esterni.

Sfond

Il-kumpanija Pollakka li ppreżentat l-ilment allegat li l-esperti esterni li jevalwaw il-proposta tagħha għall-EISMEA kienu użaw sistemi ta’ intelliġenza artifiċjali (IA) ta’ partijiet terzi b’mod li kien għamel l-evalwazzjoni inġusta.

Argumenta wkoll li jenħtieġ li jiġu stabbiliti regoli aktar ċari li jirregolaw l-użu tas-sistemi tal-IA mill-evalwaturi tal-proġetti.