L-Ombudsman Ewropew, Emily O'Reilly, jiddispjaċiha li l-Kunsill Governattiv tal-Bank Ċentrali Ewropew (BĊE) imblukka l-iżvelar ta' ittra li l-President tal-BĊE ta' dak iż-żmien, Jean-Claude Trichet, kiteb lill-Ministru tal-Finanzi Irlandiż f'Novembru 2010. Dan isegwi lment minn ġurnalist Irlandiż, li kien talab aċċess għall-ittra. L-ittra, mibgħuta fl-eqqel tal-kriżi finanzjarja, appellat lill-gvern Irlandiż biex jieħu azzjoni rapida biex jipproteġi l-istabbiltà tas-sistema finanzjarja Irlandiża.

Emily O'Reilly spjegat: "Jiddispjaċini li l-Kunsill Governattiv tal-BĊE ħali l-opportunità li japplika l-prinċipju li, f'demokrazija, it-trasparenza għandha tkun ir-regola u s-segretezza l-eċċezzjoni. Fi żmien meta tant nies kienu u qed ibatu minħabba l-awsterità li rriżultat mill-kriżi ekonomika, tal-inqas ċittadin jista' jistenna li jkun miftuħ u trasparenti minn dawk li jieħdu deċiżjonijiet li għandhom impatt dirett fuq ħajjithom u fuq il-ħajja tal-familji tagħhom. Wara spezzjoni tal-ittra, m'iniex konvint mill-ispjegazzjoni tal-Kunsill Governattiv talli kompla jżommha sigrieta."

Ġurnalist Irlandiż issuspetta li l-BĊE pprova jagħmel pressjoni fuq l-Irlanda biex issalva

Il-ġurnalist Irlandiż talab aċċess għall-ittra tal-BĊE f'Diċembru 2011. Huwa ssuspetta li dan kien jinkludi pressjoni fuq il-gvern Irlandiż biex jidħol fil-programm ta' salvataġġ tal-UE.

Il-BĊE ġġustifika r-rifjut tiegħu li jiżvela l-ittra fl-2011 bil-ħtieġa li tiġi protetta l-istabbiltà finanzjarja tal-Irlanda. Skont il-BĊE, din l-ittra ntbagħtet fil-kuntest ta’ pressjoni sinjifikattiva tas-suq u ta’ inċertezza estrema fir-rigward tal-prospetti għall-ekonomija Irlandiża.

Wara li spezzjona l-ittra, l-Ombudsman ikkonkluda li l-BĊE kellu d-dritt li jirrifjuta l-aċċess għad-dokument fiż-żmien tat-talba għal aċċess. Madankollu, peress li għaddew aktar minn tliet snin minn meta ntbagħtet l-ittra, hija pproponiet li l-BĊE issa jiżvela l-ittra sabiex jenfasizza l-impenn tiegħu għat-trasparenza.

Madankollu, il-Kunsill Governattiv tal-BĊE mblokka l-iżvelar tal-ittra, għar-raġuni li l-protezzjoni tal-interess pubbliku fir-rigward tal-politika monetarja fl-Unjoni Ewropea u l-istabbiltà finanzjarja fl-Irlanda tkompli tiġġustifika l-kunfidenzjalità. Il-Kunsill Governattiv huwa l-korp deċiżjonali ewlieni tal-BĊE u jikkonsisti mis-sitt membri tal-Bord Eżekuttiv tiegħu u l-gvernaturi tal-banek ċentrali nazzjonali tat-18-il pajjiż taż-żona tal-euro.