L-Ombudsman Ewropew, P. Nikiforos Diamandouros, talab lill-Kummissjoni Ewropea biex issegwi l-prinċipji tal-OECD għat-trasparenza u l-integrità fil-lobbying meta tirrevedi r-"Reġistru tat-Trasparenza". Dan jinkludi l-għoti ta’ gwida aħjar għall-kumpaniji u l-organizzazzjonijiet li jirreġistraw lilhom infushom, sabiex jiġi żgurat li l-informazzjoni mogħtija tkun preċiża. L-NGO Friends of the Earth Europe kienet ilmentat dwar il-mod kif il-Kummissjoni ttrattat dikjarazzjonijiet allegatament mhux preċiżi magħmula minn żewġ kumpaniji multinazzjonali. Ir-“Reġistru tat-Trasparenza” jipprovdi informazzjoni dwar min qed jagħmel lobbying mal-istituzzjonijiet tal-UE, liema interessi qed jiġu segwiti, u l-ammonti investiti f’dawn l-attivitajiet.

Allegatament informazzjoni mhux preċiża sottomessa minn żewġ kumpaniji multinazzjonali

Fl-2008, il-Kummissjoni nediet reġistru għal-lobbyists, bl-għan li tagħmel il-proċess tat-teħid tad-deċiżjonijiet tal-UE aktar trasparenti u biex tippermetti lill-pubbliku jkun jaf min qed jipprova jinfluwenza lil dawk li jieħdu d-deċiżjonijiet fl-UE. Fl-2011, ġie sostitwit mir-"Reġistru tat-Trasparenza", li huwa operat b'mod konġunt mill-Kummissjoni u l-Parlament Ewropew. S’issa rreġistraw madwar 5 600 kumpanija, NGOs u lobbyists oħra. Ir-reġistru bħalissa qed jiġi rivedut.

Fl-2010, Friends of the Earth Europe lmentat mal-Kummissjoni li żewġ kumpaniji multinazzjonali ma kinux irrappurtaw biżżejjed l-infiq tagħhom fuq l-attivitajiet ta' lobbying tal-UE. L-NGO aktar tard irrikorriet għand l-Ombudsman billi allegat li l-Kummissjoni ma kinitx ittrattat kif suppost l-ilment tagħha u li kienet irrifjutat l-aċċess għad-dokumenti relatati kollha.

Il-fehma tal-Kummissjoni kienet li l-ilment dwar id-dikjarazzjonijiet tal-kumpaniji ma kienx fondat u li kienet tat l-akbar aċċess possibbli għad-dokumenti inkwistjoni.

Wara li investigat il-każ, l-Ombudsman sabet li l-Kummissjoni kienet għamlet dak kollu li setgħet biex tinvestiga l-ilmenti u li l-konklużjonijiet tagħha kienu raġonevoli. Madankollu, huwa kkritika n-nuqqas tal-Kummissjoni li tispjega b'mod adegwat lill-NGO r-raġunijiet għaċ-ċaħda tal-argumenti tagħha. L-Ombudsman talbet lill-Kummissjoni tqis bis-sħiħ il-prinċipji tal-OECD għat-trasparenza u l-integrità fil-lobbying, meta tirrevedi r-reġistru. Dan jinvolvi mhux biss l-għoti ta’ gwida aħjar għall-kumpaniji jew l-organizzazzjonijiet li jirreġistraw, iżda wkoll it-titjib tal-monitoraġġ u l-komparabbiltà tad-data fir-reġistru.

L-Ombudsman ikkritikat ukoll il-mod kif il-Kummissjoni ttrattat it-talba għall-aċċess għad-dokumenti. Huwa rrakkomanda wkoll li l-Kummissjoni tinforma b’mod sistematiku lil-lobbisti u lil rappreżentanti ta’ gruppi ta’ interess oħra li tiltaqa’ magħhom dwar l-intenzjoni tagħha li toħroġ isimhom, jekk isiru talbiet għal aċċess pubbliku dwar l-attivitajiet ta’ lobbjar tagħhom.

Id-deċiżjoni sħiħa tal-Ombudsman f'dan il-każ hija disponibbli fuq: http://www.ombudsman.europa.eu/en/cases/decision.faces/en/50729/html.bookmark