L-Ombudsman Ewropew, Jacob Söderman, jilqa' d-deċiżjonijiet tal-Kummissjoni u tal-Parlament li jtemmu l-użu tal-limiti tal-età fir-reklutaġġ b'effett immedjat. "Id-deċiżjonijiet juru li huma verament impenjaw ruħhom li jsegwu fil-prattika l-Karta tad-Drittijiet Fundamentali pproklamata f'Nizza f'Diċembru 2000" jgħid l-Ombudsman.

Meta ħabbar l-aħbarijiet, il-President tal-Parlament Pat Cox qal: "Għandi l-pjaċir ninfurmak li l-Bureau tal-Parlament Ewropew iddeċieda, fil-laqgħa tiegħu tat-8 ta' April 2002, li (huwa) mhux se jibqa' japplika l-limiti ta' età għal kwalunkwe proċedura ta' selezzjoni li jniedi."

F'ittra lill-Ombudsman, il-President tal-Kummissjoni Romano Prodi jiddikjara: "L-ebda kompetizzjoni tal-Kummissjoni ppubblikata wara l-lum mhi se tapplika limitu massimu ta' età għall-applikanti."

Iż-żewġ istituzzjonijiet jindikaw li mhumiex se jaqblu li jużaw il-limiti tal-età fi kwalunkwe proċedura tal-għażla organizzata mill-Uffiċċju Ewropew tar-Reklutaġġ. Dan l-Uffiċċju, li se jorganizza kompetizzjonijiet biex jirrekluta uffiċjali għall-istituzzjonijiet u l-korpi kollha ta' l-UE, għandu jitwaqqaf sa l-aħħar ta' l-2002. L-Ombudsman kien irrifjuta li jiffirma deċiżjoni li tistabbilixxi l-Uffiċċju jekk kellhom jintużaw il-limiti tal-età.

Il-biċċa l-kbira tal-istituzzjonijiet u l-korpi tal-UE ma għadhomx jużaw il-limiti tal-età. L-Ombudsman se jkompli l-ġlieda tiegħu biex itemm id-diskriminazzjoni abbażi tal-età f'kull wieħed minnhom. F'ittra reċenti lis-Segretarju Ġenerali tal-Kunsill, is-Sur Javier Solana, is-Sur Söderman ikkritika l-argumenti użati biex jiġġustifikaw il-limiti tal-età. Dawn jinkludu d-dipendenza fuq sentenza tal-Qorti li ngħatat fl-1972.

L-azzjoni tal-Ombudsman hija bbażata fuq l-Artikolu 21 tal-Karta tad-Drittijiet Fundamentali. Dan jipprojbixxi d-diskriminazzjoni bbażata fuq kwalunkwe raġuni bħall-età. L-Ombudsman jargumenta li l-Karta għandha titqiegħed fil-prattika fi ħdan l-istituzzjonijiet u l-korpi tal-UE peress li ġiet ipproklamata solennement f'Nizza mill-Presidenti tat-tliet istituzzjonijiet l-aktar importanti. In-nuqqas li jżommu l-wegħdiet tagħhom żgur li se jkollu effett korrużiv fuq ir-relazzjonijiet diġà fqar bejn l-UE u ċ-ċittadini tagħha.

L-ittri mill-Presidenti Prodi u Cox, u l-ittra tas-Sur Söderman lis-Sur Solana, jinsabu fuq:
http://www.ombudsman.europa.eu/age/en/default.htm