L-Ombudsman Ewropew, P. Nikiforos Diamandouros, talab lill-Kummissjoni Ewropea tikkoreġi żball amministrattiv fir-rigward tal-kwoti tas-sajd fil-Punent tal-Iskozja. Dan seħħ wara lment minn assoċjazzjoni tas-sajjieda Skoċċiżi dwar Regolament tal-UE dwar il-kwoti tas-sajd għas-sena 2007. Matul l-investigazzjoni tiegħu, l-Ombudsman ikkonferma li l-Kummissjoni kienet skambjat b'mod żbaljat id-data f'żewġ kolonni ta' dokument li serva bħala bażi għar-Regolament. Dan l-iżball wassal għal tnaqqis fl-għadd ta’ jiem tas-sajd allokati għal gruppi speċifiċi ta’ bastimenti fil-Punent tal-Iskozja. L-Ombudsman talbet lill-Kummissjoni tikkoreġi l-iżball tagħha sabiex ma tirriskja l-ebda effett indirett għas-snin sussegwenti.

Sfond

Kull sena, il-Kunsill tal-UE jadotta pjan tas-sajd għall-ilmijiet tal-UE li jalloka ċertu għadd ta’ jiem tas-sajd lil gruppi speċifiċi ta’ bastimenti. Dan jinkludi "Pjan għall-Irkupru tal-Merluzz" għall-protezzjoni tal-merluzz fil-Punent tal-Iskozja u fil-Baħar tat-Tramuntana.

F'Marzu 2008, assoċjazzjoni tas-sajjieda Skoċċiża ressqet ilment quddiem l-Ombudsman dwar l-allokazzjoni ta' jiem ta' sajd għall-2007. L-assoċjazzjoni allegat li l-Kummissjoni kienet skambjat b’mod żbaljat data f’żewġ kolonni ta’ dokument li serva bħala bażi għar-Regolament tal-Kunsill. Fil-każ tal-Punent tal-Iskozja, dan l-iżball wassal għal tnaqqis fil-jiem tas-sajd allokati għall-kategorija rilevanti ta’ bastimenti minn 280 għal 252. Skont l-assoċjazzjoni, it-tnaqqis fl-għadd ta’ jiem tas-sajd kellu minflok jiġi applikat għall-Baħar tat-Tramuntana.

Fl-opinjoni tagħha, il-Kummissjoni spjegat li kienet ivverifikat iċ-ċifri u adottat il-fehma li ma kien sar l-ebda żball.

Matul l-investigazzjoni tiegħu dwar l-ilment, l-Ombudsman sab li l-Kummissjoni kienet tabilħaqq għamlet żball amministrattiv fid-dokument rilevanti dwar l-allokazzjoni tal-jiem tas-sajd. Skont l-Ombudsman, id-data fil-kolonni għall-Punent tal-Iskozja u l-Baħar tat-Tramuntana kienet ġiet skambjata bi żball, kif allegaw l-ilmentaturi. Peress li l-iżball ma ġiex innutat, ġie inkluż fir-Regolament finali tal-Kunsill dwar l-allokazzjoni tal-jiem tas-sajd għall-2007.

L-Ombudsman ħeġġet lill-Kummissjoni biex tikkoreġi l-iżball tagħha, filwaqt li indikat li l-iżball jista' jkollu effetti sekondarji għas-snin sussegwenti. Il-Kummissjoni għandha tagħti opinjoni dettaljata dwar il-kwistjoni sat-30 ta' April 2009.

Biex taqra l-każ sħiħ, jekk jogħġbok mur fuq: http://www.ombudsman.europa.eu/cases/draftrecommendation.faces/en/3778/html.bookmark