L-ilment kien jikkonċerna t-trasparenza ta’ kif l-Awtorità Ewropea tal-Assigurazzjoni u l-Pensjonijiet tax-Xogħol (EIOPA), u b’mod partikolari l-“Bord tas-Superviżuri” tagħha, tadotta abbozz ta’ standards tekniċi regolatorji (abbozz ta’ RTS). L-ilmentatur fittex aċċess pubbliku għad-dettalji tal-votazzjoni reċenti tal-Bord dwar abbozz ta’ RTS dwar “prodotti aggregati ta’ investiment għall-konsumaturi”. L-EIOPA rrifjutat li tagħmel din l-informazzjoni disponibbli għall-pubbliku. L-ilmentatur huwa mħasseb dwar kif l-EIOPA ttrattat it-talba tiegħu, u n-nuqqas aktar ġenerali li tiġi ppubblikata informazzjoni dwar il-votazzjonijiet u d-dibattiti dwar l-abbozzi tal-RTSs.

Fil-kuntest tal-inkjesta tal-Ombudsman, hija bagħtet il-valutazzjoni preliminari tagħha lill-EIOPA biex titlob il-fehmiet tagħha. L-Ombudsman qieset li dokumenti bħal dawk inkwistjoni fl-ilment għandhom jitqiesu bħala "dokumenti leġiżlattivi" u, f'konformità mar-regoli tal-UE dwar l-aċċess pubbliku għad-dokumenti, l-EIOPA għandha tipprovdi aċċess usa' għal tali dokumenti. Hija qieset li l-EIOPA ma pprovdietx argumenti konvinċenti biex tinvoka l-eċċezzjonijiet skont ir-regoli tal-UE dwar l-aċċess pubbliku għad-dokumenti, biex tiġġustifika ż-żamma tal-aċċess għad-dokumenti, u ħeġġet lill-EIOPA tagħti aċċess għad-dokumenti inkwistjoni f’dan l-ilment.

L-EIOPA wieġbet lill-Ombudsman u indikat li taqbel li l-abbozz tal-istandards inkwistjoni huma relatati mal-proċess leġiżlattiv. L-EIOPA qablet li tagħti lill-ilmentatur aċċess pubbliku għad-dokumenti inkwistjoni u li tiżgura li, fil-futur, il-minuti tagħha dwar il-laqgħat tal-Bord tas-Superviżuri tagħha jkun fihom informazzjoni xierqa dwar il-votazzjonijiet tal-membri dwar kwistjonijiet leġiżlattivi. L-Ombudsman laqgħet it-tweġiba tal-EIOPA u l-passi meħuda, u għalqet l-inkjesta.