Tá imscrúdú oscailte ag an Ombudsman Eorpach, Emily O'Reilly, ar a tionscnamh féin maidir le comhdhéanamh agus trédhearcacht shainghrúpaí an Choimisiúin. Mar chéad chéim, tá sí ag iarraidh aiseolas ar dhaoine agus ar eagraíochtaí leasmhara maidir le cé chomh cothrom agus atá ionadaíocht na réimsí ábhartha saineolais agus spéise i ngrúpaí éagsúla, cé chomh trédhearcach agus atá na grúpaí agus cé chomh maith agus a oibríonn na nósanna imeachta iarratais.

Dúirt Emily O'Reilly: "Tá an Coimisiún ag brath go mór ar chomhairle na gcéadta grúpaí saineolaithe chun reachtaíocht agus beartas a tharraingt suas, lena gcumhdaítear réimsí ó sheirbhísí cánach agus baincéireachta, go sábháilteacht ar bhóithre agus cógaisíocht. Tá sé ríthábhachtach go mbeadh na grúpaí sin cothrom agus go n-oibreoidís ar bhealach chomh trédhearcach agus is féidir ionas gur féidir leis an bpobal muinín a bheith acu as a gcuid oibre agus grinnscrúdú a dhéanamh uirthi.”

Úsáid straitéiseach imscrúduithe féintionscnaimh

Nuair a chuaigh Emily O'Reilly i mbun oifige mar Ombudsman Eorpach i mí Dheireadh Fómhair 2013, d'fhógair sí go n-úsáidfeadh sí a cumhacht tionscnaimh féin chun fadhbanna sistéamacha i riarachán an AE a imscrúdú ar bhealach níos straitéisí. Chuige sin, cheap sí comhordaitheoir inmheánach le haghaidh fiosrúcháin féintionscnaimh. Is é imscrúdú na ngrúpaí saineolaithe an chéad cheann i sraith fiosrúchán straitéiseach féintionscnaimh a osclófar sna míonna amach romhainn.

Le cabhair ón gcomhairliúchán poiblí, déanfaidh an tOmbudsman imscrúdú ar na grúpaí saineolaithe a bhféadfadh sé nach mbeadh ionadaíocht chothrom acu ar leasanna, an bhfuil fadhbanna ag baint le comhaltaí a cheapadh "i gcáil phearsanta" agus an n-oibríonn grúpaí saineolaithe ar bhealach chomh trédhearcach agus is féidir. Tá an cuireadh chun an chomhairliúcháin phoiblí ar fáil anseo: http://www.ombudsman.europa.eu/en/cases/correspondence.faces/en/54300/html.bookmark

Imscrúdú sonrach ar ghrúpaí saineolaithe don chomhbheartas talmhaíochta

Tá 14 "ghrúpa idirphlé shibhialta" á mbunú ag an gCoimisiún (AS AGRI) faoi láthair a fheidhmeoidh mar chomhlachtaí comhairleacha don chomhbheartas talmhaíochta. Téann níos mó ná aon trian de bhuiséad an Aontais isteach sa réimse beartais ríthábhachtach sin. Dá bhrí sin, d'oscail an tOmbudsman imscrúdú ar chomhdhéanamh na ngrúpaí sin chun ionadaíocht chothrom ar an raon leathan grúpaí sainleasa eacnamaíocha agus neamheacnamaíocha a ráthú. Is féidir leat an litir tosaigh don imscrúdú sonrach seo a fháil anseo:  http://www.ombudsman.europa.eu/en/cases/correspondence.faces/en/54297/html.bookmark