Strasbourg, 12.05.2014

Fiosrúchán féintionscnaimh OI/7/2014/BEH maidir le comhdhéanamh na ngrúpaí idirphlé shibhialta arna n-óstáil ag Ard-Stiúrthóireacht na Talmhaíochta

A Uachtaráin, a chara,

I mí na Nollag 2013, ghlac an Coimisiún Cinneadh 2013/767/AE lena mbunaítear creat nua le haghaidh idirphlé sibhialta in ábhair a chumhdaítear leis an gcomhbheartas talmhaíochta (dá ngairtear ‘Cinneadh an Choimisiúin’ anseo feasta). De réir shuíomh gréasáin AS AGRI, cruthófar 14 ghrúpa idirphlé shibhialta lena gcumhdófar gnéithe éagsúla den chomhbheartas talmhaíochta ar an mbonn sin.

An 1 Aibreán 2014, chuir an Coimisiún tús le glaonna ar bhallraíocht eagraíochtaí neamhrialtasacha i 14 ghrúpa idirphlé shibhialta, lenar leagadh síos spriocdháta le haghaidh iarratas an 30 Aibreán 2014. Leis an gCinneadh ón gCoimisiún agus leis na 14 ghlao ar bhallraíocht eagraíochtaí neamhrialtasacha araon, leagtar béim ar an gceanglas maidir le ballraíocht chothrom sna 14 ghrúpa sin.

Ós rud é go gcuirtear de chúram ar ghrúpaí idirphlé shibhialta cúnamh agus comhairle a thabhairt don Choimisiún maidir le gach ábhar a bhaineann leis an gcomhbheartas talmhaíochta, beidh siad gníomhach i réimse an-íogair a mbeidh tionchar aige ar sciar suntasach de bhuiséad an Aontais. Ina theannta sin, agus é á chur san áireamh gur ar feadh seacht mbliana a cheapfar comhaltaí, tá sé ríthábhachtach don Choimisiún éifeacht a thabhairt don cheanglas sin maidir le comhdhéanamh cothrom agus comhaltaí á gceapadh aige.

I bhfianaise an mhéid sin, measaim go bhfuil sé ríthábhachtach freisin go ndéanfadh an tOmbudsman faireachán an-chúramach ar an bpróiseas roghnúcháin.

Ós rud é go bhfuil an próiseas sin ar siúl faoi láthair agus go bhfuil aon chinneadh maidir le ceapachán do-ghlactha leis an gCoimisiún, ní bheadh sé iomchuí dom iarracht a dhéanamh athbhreithniú a dhéanamh ar chur chuige an Choimisiúin sula mbeidh an próiseas roghnúcháin curtha i gcrích.

Mar sin féin, ní chuireann sé sin cosc orm súil ghéar a choinneáil ar an bpróiseas roghnúcháin, go háirithe a mhéid a bhaineann leis an gceanglas ionadaíocht chothrom a dhéanamh ar na leasanna uile a chuirtear in iúl dá dtagraítear in Airteagal 4(2) den Chinneadh ón gCoimisiún.

Ba mhaith liom a chur in iúl go bhfuilim réidh chun tacú leis an bpróiseas sin agus comhairle a thabhairt, má iarrann an Coimisiún amhlaidh. Maidir leis seo, meabhraím taithí shaibhir an Ombudsman maidir le déileáil le cásanna a bhaineann le comhdhéanamh sainghrúpaí arna n-óstáil ag an gCoimisiún agus ag comhlachtaí nó gníomhaireachtaí eile (féach, mar shampla, gearáin 1682/2010/BEH agus 1966/2011/LP).

Ina theannta sin, tá sé ar intinn agam athbhreithniú cúramach a dhéanamh ar thoradh an roghnúcháin, a luaithe is eol dó.

I bhfianaise na mbreithnithe sin, chinn mé fiosrúchán féintionscnaimh a sheoladh ar an tsaincheist maidir le comhdhéanamh cothrom na ngrúpaí idirphlé shibhialta arna n-óstáil ag AS AGRI. Measaim go ndealraíonn sé go bhfuil idirghabháil réamhghníomhach an Ombudsman tríd an bhfiosrúchán féintionscnaimh reatha a sheoladh ag an gcéim seo chun leasa na bpáirtithe uile lena mbaineann agus gur dócha go neartóidh sí muinín na saoránach i dtoradh an roghnúcháin, ag cur san áireamh freisin go mairfidh an ceapachán ar feadh seacht mbliana.

Comhlánaíonn an fiosrúchán seo m’fhiosrúchán féintionscnaimh maidir le comhdhéanamh ghrúpaí saineolaithe an Choimisiúin i gcoitinne (OI/6/2014/BEH), atá á sheoladh go comhuaineach agus lena bhforáiltear do chomhairliúchán poiblí le páirtithe leasmhara.

Tá muinín iomlán agam, agus comhdhéanamh na ngrúpaí idirphlé shibhialta á chinneadh aige, go gcuirfidh an Coimisiún an ceanglas maidir le comhdhéanamh cothrom chun feidhme i gceart. Bheadh sé stuama, áfach, go bhfágfadh an Coimisiún an deis aige féin gníomhaíocht chuí a dhéanamh mar fhreagairt ar thorthaí a d'fhéadfadh a bheith ar fhiosrúchán an Ombudsman amach anseo. Dá bhrí sin, ar mhaithe le dea-riarachán, iarraim ar an gCoimisiún breithniú a dhéanamh ar chomhaltaí roghnaithe a chur ar an eolas go bhféadfar athbhreithniú a dhéanamh ar a gceapachán i bhfianaise thorthaí an Ombudsman amach anseo maidir le cé acu atá nó nach bhfuil an ceapachán i gcomhréir leis an gceanglas ionadaíocht chothrom ar na leasanna léirithe uile dá dtagraítear in Airteagal 4(2) den Chinneadh ón gCoimisiún a áirithiú.

Tabhair do d’aire, ag an gcéim seo de m’fhiosrúchán, nach gá don Choimisiún tuairim a chur isteach . Bheinn buíoch díot, áfach, dá bhféadfá mé a chur ar an eolas a luaithe a bheidh an roghnú do na 14 ghrúpa idirphlé shibhialta curtha i gcrích. Ina theannta sin, ba mhór agam dá bhféadfá, i gcomhréir le hAirteagal 3(2) de Reacht an Ombudsman Eorpaigh, cead a thabhairt do mo sheirbhísí iniúchadh a dhéanamh ar an gcomhad ábhartha tar éis roghnú na gcomhaltaí de ghrúpaí idirphlé shibhialta a bheith curtha i gcrích. Bheinn buíoch díot dá bhféadfadh do sheirbhísí teagmháil a dhéanamh leis an Uasal Bernhard Hofstötter (+33 388 17 81 05) de m’Oifig chun teacht ar chomhaontú maidir le dáta áisiúil chun na doiciméid a iniúchadh.

Le dea-mhéin,

Emily O'Reilly