Preaseisiúint

In 2010, fuair an tOmbudsman Eorpach, P. Nikiforos Diamandouros, an líon is mó gearán faoi riarachán AE ó shaoránaigh, cuideachtaí, eagraíochtaí neamhrialtasacha agus comhlachais na Gearmáine (375) agus na Spáinne (349). I gcoibhneas leis an daonra, áfach, tháinig an cion is mó de na gearáin ó Lucsamburg, ón gCipir agus ón mBeilg.

San iomlán, fuair an tOmbudsman 2 667 gearán in 2010, i gcomparáid le 3 098 in 2009. Tháinig laghdú níos mó ná 400 ar líon na ngearán a fuarthas, ar gearáin iad a bhí lasmuigh dá shainordú. Baineadh an laghdú sin amach a bhuí leis an Treoir Idirghníomhach ar shuíomh gréasáin an Ombudsman, a thugann comhairle d'úsáideoirí faoin áit ar féidir leo sásamh a lorg, bíodh sin ar an leibhéal Eorpach, náisiúnta nó réigiúnach.

I níos mó ná 70% de na cásanna go léir, bhí an tOmbudsman in ann cabhrú leis na gearánaigh trí fhiosrúchán a oscailt, cás a aistriú chuig an gcomhlacht inniúil, nó comhairle a thabhairt maidir le cá háit le dul. D'fhan líon na bhfiosrúchán oscailte (335) agus líon na bhfiosrúchán dúnta (326) cobhsaí in 2010 i gcomparáid leis an mbliain roimhe sin.

Ba é an t-ábhar fiosrúcháin ba choitianta a dhún an tOmbudsman in 2010 ná easpa trédhearcachta i riarachán an AE (33%), lena n-áirítear diúltú doiciméid nó faisnéis a scaoileadh. Bhain cásanna eile le fadhbanna maidir le forghníomhú chonarthaí an Aontais nó glaonna ar thairiscintí, éagóir, mí-úsáid cumhachta, nó idirdhealú.

Agus a Thuarascáil Bhliantúil 2010 á cur i láthair aige sa Bhruiséil, dúirt an tUasal Diamandouros: "Is é príomhthosaíocht an Ombudsman cabhrú le riarachán an AE a bheith níos oscailte, níos réamhghníomhaí, níos cuntasaí agus níos fabhraí do shaoránaigh, d'fhonn muinín na saoránach as seirbhís phoiblí na hEorpa a mhéadú. Tá go leor le déanamh fós maidir leis seo. Tá ríméad orm, áfach, gur ghlac an institiúid lena mbaineann le moladh maidir le réiteach cairdiúil nó gur shocraigh sí an t-ábhar i níos mó ná leath de na cásanna a dhún mé in 2010.

In 2010, d’eisigh an tOmbudsman 33 ráiteas chriticiúla (35 in 2009) agus sheol sé Tuarascáil Speisialta amháin chuig Parlaimint na hEorpa maidir le mainneachtain an Choimisiúin comhoibriú go dílis agus de mheon macánta leis i gcás rochtana ar dhoiciméid (féach samplaí cáis).

Bhain formhór na bhfiosrúchán a osclaíodh in 2010 leis an gCoimisiún Eorpach (65 %), agus ina dhiaidh sin leis an Oifig Eorpach um Roghnú Foirne (10 %), le Parlaimint na hEorpa (7 %), agus leis an gComhairle (2 %). I dteannta a chéile, b’ionann Gníomhaireachtaí an Aontais agus 10 % de na fiosrúcháin ar fad a osclaíodh in 2010.

Tá Forbhreathnú an Ombudsman 2010 (i 23 teanga oifigiúil an AE) agus Tuarascáil Bhliantúil iomlán 2010 (i mBéarla) ar fáil ag: http://www.ombudsman.europa.eu/activities/annualreports.faces

Foilseofar Tuarascáil Bhliantúil 2010 i ngach teanga oifigiúil de chuid an AE i mí Iúil.

Imscrúdaíonn an tOmbudsman Eorpach gearáin faoi dhrochriarachán in institiúidí agus i gcomhlachtaí an AE. Is féidir le haon saoránach AE, cónaitheoir, nó fiontar nó comhlachas i mBallstát, gearán a thaisceadh leis an Ombudsman. Cuireann an tOmbudsman bealach tapa, solúbtha agus saor in aisce ar fáil chun fadhbanna le riarachán an AE a réiteach. Chun tuilleadh eolais a fháil: http://www.ombudsman.europa.eu

Le haghaidh fiosrúcháin phreasa: Gundi Gadesmann, Oifigeach Meán agus Caidrimh Sheachtraigh, teil.: +32 2 284 26 09

Roghnú Cásanna 2010

Tuarascáil Speisialta maidir le "Litreacha Porsche"

Chuir an tOmbudsman Tuarascáil Speisialta faoi bhráid Pharlaimint na hEorpa maidir le diúltú an Choimisiúin litreacha a nochtadh ón monaróir gluaisteán Gearmánach Porsche faoi astaíochtaí CO2 ó ghluaisteáin. Bhain an Tuarascáil le mainneachtain an Choimisiúin comhoibriú go dílis agus de mheon macánta leis an Ombudsman. D'iarr an eagraíocht neamhrialtasach Friends of the Earth Europe rochtain ar na litreacha i 2007 agus ní bhfuair siad a n-ábhar iomlán ach i mí Aibreáin 2011.

http://www.ombudsman.europa.eu/en/press/release.faces/en/4642/html.bookmark

Tuilleadh trédhearcachta sa Ghníomhaireacht Leigheasra Eorpach (EMA)

Ghlac EMA i Londain le dhá mholadh ón Ombudsman chun tuarascálacha ar fhrithghníomhartha díobhálacha ar leigheas frith-acne a scaoileadh, chomh maith le tuarascálacha ar staidéir chliniciúla agus prótacail trialach le haghaidh cógais frith-otracht. Tar éis na gcásanna sin, ghlac EMA rialacha nua maidir le rochtain phoiblí i bhfad níos leithne ar a dhoiciméid. Saoránach Éireannach ab ea duine de na gearánaithe a raibh a mhac tar éis féinmharú a dhéanamh tar éis dó an leigheas frith-acne a ghlacadh.

http://www.ombudsman.europa.eu/en/press/release.faces/en/5498/html.bookmark

Réitíonn an tOmbudsman díospóid idir an Coimisiún agus comhlachas na Gearmáine

Chuidigh an tOmbudsman leis an gCoimisiún díospóid íocaíochta a réiteach le comhlachas cultúrtha Gearmánach. Ar dtús, dhiúltaigh an Coimisiún an tsuim gan íoc de EUR 6 000 a íoc le haghaidh taispeántas maidir le 28 réigiún Eorpacha, agus d’áitigh sé nár tugadh fógra cuí dó faoi ath-leithdháiltí sa bhuiséad. Ar deireadh, ghlac sí le moladh an Ombudsman maidir le réiteach cairdiúil agus d’aontaigh sí an tsuim gan íoc de EUR 6 000, chomh maith le níos mó ná EUR 1 500 in ús, a íoc leis an gcomhlachas.

http://www.ombudsman.europa.eu/en/press/release.faces/en/5490/html.bookmark

Earráid maidir le cuóta iascaireachta trosc glactha ag an gCoimisiún

Tar éis don Ombudsman imscrúdú a dhéanamh ar ghearán ó chomhlachas iascairí Albanach, d'aithin an Coimisiún earráid riaracháin maidir le cuótaí iascaireachta in Iarthar na hAlban. Mar thoradh ar an mbotún sin, bhí laghdú 10 % ar na laethanta iascaireachta a leithdháileadh ar ghrúpa sonrach soithí in Iarthar na hAlban. Mhol an tOmbudsman an Coimisiún as a bhotún a aithint.

http://www.ombudsman.europa.eu/en/press/release.faces/en/4874/html.bookmark

Níl aon chros ar na Ballstáit maidir le doiciméid de chuid an Choimisiúin a scaoileadh

I gcás a bhaineann le doiciméid a bhaineann le calafort tionsclaíoch a thógáil in Tenerife na Spáinne, chuir an tOmbudsman in iúl, má iarrann údaráis na Spáinne ar an gCoimisiún gan doiciméid a fhaigheann sé uathu a scaoileadh, nach mór dóibh argóintí diongbháilte a dhéanamh bunaithe ar rialacha trédhearcachta an Aontais. Mhol an tOmbudsman cinneadh an Choimisiúin sa chás seo a dhoiciméid inmheánacha féin a eisiúint don ghearánach — an Biúró Eorpach Comhshaoil.

http://www.ombudsman.europa.eu/en/press/release.faces/en/5535/html.bookmark