Líomha(i)r

1) Dhiúltaigh an Coimisiún go mícheart rochtain a thabhairt ar na doiciméid a iarradh, agus é ag brath go míchuí ar eisceachtaí Airteagal 4(1)(a), an tríú fleasc (caidreamh idirnáisiúnta a chosaint) agus Airteagal 4(3), an chéad fhomhír (próiseas cinnteoireachta a chosaint) de Rialachán 1049/2001, gan measúnú doiciméad ar dhoiciméad a dhéanamh agus breithniú cuí a dhéanamh ar an bhféidearthacht rochtain pháirteach a thabhairt ar na doiciméid a iarradh.

2) Theip ar an gCoimisiún breithniú ceart a dhéanamh ar a oibleagáidí faoi Rialachán 1367/2006 maidir le forálacha Choinbhinsiún Aarhus a chur i bhfeidhm.

3) Theip ar an gCoimisiún, i gcomhthéacs chaibidlíocht TTIP, trédhearcacht a chur chun feidhme ar bhealach a ligfeadh do shaoránaigh iarrataí fóinteacha ar rochtain ar dhoiciméid a dhéanamh.

4) Níor láimhseáil an Coimisiún an iarraidh ar rochtain ar dhoiciméid go tráthúil.

Éileamh/Éilimh

1) Ba cheart don Choimisiún athmhachnamh a dhéanamh ar a dhiúltú d'iarraidh na ngearánach ar rochtain ar dhoiciméid ar bhonn cás ar chás agus i bhfianaise a ghealltanais le déanaí trédhearcacht a mhéadú.

2) Ba cheart aon eisceacht a agraítear chun nochtadh na ndoiciméad arna n-iarraidh a dhiúltú go hiomlán nó go páirteach a léirmhíniú go sriantach agus leas an phobail a chur san áireamh, agus aird chuí á tabhairt ar réimeas Aarhus i gcás inarb ábhartha.

3) Ba cheart don Choimisiún liosta cuimsitheach doiciméad a fhoilsiú, lena n-áirítear na doiciméid sin a bhfuil a n-inneachar folaithe, maille leis na cúiseanna nach bhféadfaí na doiciméid sin a chur ar fáil go poiblí.