A Uachtaráin, a chara,

I gcomhthéacs an scannail éillithe leanúnaigh a bhaineann le Feisirí reatha agus iar-Fheisirí agus tíortha nach Ballstáit den Aontas iad, tá grinnscrúdú athnuaite déanta ar ról na dtríú páirtithe agus ar an gcaoi a bhféachann siad le tionchar a imirt ar oifigigh phoiblí an Aontais, mar is eol duit.

Thug mé faoi deara cheana féin, i gcomhfhreagras le Parlaimint na hEorpa (PE), gur bronntanas é scannal mar seo dóibh siúd ar mian leo damáiste a dhéanamh don AE ar fad nó é a dhíspeagadh. Déanfaidh mé obair leantach le Parlaimint na hEorpa maidir le cúrsaí riaracháin ábhartha.

Chun ardleibhéal muiníne poiblí a choinneáil, leag mé béim ar an ngá atá le rialacha láidre eitice agus trédhearcacht láidir sna hidirghníomhaíochtaí idir oifigigh an Aontais agus ionadaithe leasa. Leanaim d’fhaireachán a dhéanamh ar riarachán an Aontais i ndáil leis sin.

Thug mé faoi deara níos luaithe an tseachtain seo [1] gur thaistil Ard-Stiúrthóir roinn iompair an Choimisiúin (AS MOVE) roinnt uaireanta idir 2015 agus 2021 ar chostas rialtas Chatar nó eagraíochtaí atá gar dó.[2] Bhí dlúthbhaint aige sin le caibidlíocht an chomhaontaithe aeriompair idir an tAontas agus Catar [3], a síníodh an 18 Deireadh Fómhair 2021. Eascraíonn ceisteanna dlisteanacha maidir leis an tionchar míchuí a d’fhéadfadh a bheith ag cinnteoireacht an Aontais sa réimse sin as rialtas Chatar agus as eagraíochtaí atá gar dó a íocann as speansais taistil don oifigeach is sinsearaí de chuid AS MOVE.

Thug mé faoi deara freisin, agus imní orm, an míniú ón gCoimisiún, ós rud é nach raibh an tArd-Stiúrthóir mar chuid den fhoireann chaibidlíochta, nach raibh aon choinbhleacht leasa ann maidir le glacadh le híoc a speansas taistil ag rialtas Chatar. Ní fhéadfaidh an pobal an t-idirdhealú sin a dhéanamh, ós rud é go nglacann an tArd-Stiúrthóir freagracht as na caibidlíochtaí sin ar deireadh.

D’fhógair an Coimisiún anois go bhfuil a rialacha maidir le fóirdheonú a misean gnó ag tríú páirtithe á ngéarú aige.

Cé go bhféadfadh misin den sórt sin leas an Aontais a chur chun cinn, tá sé ríthábhachtach go ndéanfar grinnscrúdú ar na socruithe sin chun na rioscaí a bhaineann le coinbhleachtaí leasa a bhainistiú, bíodh siad fíor, féideartha nó braite.

Táim tiomanta cabhrú le hinstitiúidí agus comhlachtaí an Aontais feabhas a chur ar a gcreataí cuntasachta, trédhearcachta agus eiticiúla. Ní mór córas eitice láidir a bheith ina dhlúthchuid d’institiúidí agus de chomhlachtaí uile an Aontais.

Dá réir sin, bheinn buíoch dá bhféadfadh an Coimisiún freagra a thabhairt ar na ceisteanna atá san iarscríbhinn faoin 3-6-2023.

 Gabhaim buíochas leat roimh ré as do chomhoibriú cineálta.

Tusa ó chroí,

Emily OАReilly An tOmbudsman
Eorpach

Strasbourg, 03/03/2023

Iarscríbhinn

Ceisteanna don Choimisiún:

I. Is féidir le trédhearcacht teacht roimh amhantraíocht maidir le cé acu a fhreastalaíonn nó nach bhfreastalaíonn idirghníomhaíochtaí le hionadaithe sainleasa ar leas an phobail. Tá sé d’oibleagáid ar Ard-Stiúrthóirí na sonraí faoina n-idirghníomhaíochtaí le heagraíochtaí nó le daoine féinfhostaithe maidir le saincheisteanna a bhaineann le ceapadh agus cur chun feidhme beartas san Aontas a phoibliú laistigh de thréimhse dhá sheachtain tar éis an chruinnithe.[4]

Tugaim
faoi deara nach ndéantar tagairt i gclár na gcruinnithe arna dtionól ag Ard-Stiúrthóir AS MOVE do roinnt comhdhálacha ar íoc tríú páirtithe as costais taistil ina leith.[5] Tugaim faoi deara freisin go bhféadfadh sé nach é sin an t-aon uair amháin nach ndéantar cruinnithe a bhaineann leis an Ard-Stiúrthóir sin a thaifeadadh sa chlár.[6]

An bhféadfá, dá bhrí sin, tuairisc a thabhairt ar an sásra atá i bhfeidhm chun a sheiceáil agus a áirithiú go gcuirfidh Ard-Stiúrthóirí an Choimisiúin faisnéis ar fáil go poiblí faoi na cruinnithe uile a thionólann siad le heagraíochtaí nó le daoine féinfhostaithe maidir le saincheisteanna a bhaineann le ceapadh agus cur chun feidhme beartas san Aontas?

II. Thug an Coimisiún freagra ar thuarascálacha ó na meáin maidir le misin an Ard-Stiúrthóra ar íoc tríú páirtithe astu trína rá gur tharla gach rud laistigh de na rialacha atá ann faoi láthair. Dá bhrí sin, an bhféadfá an próiseas trínar údaraíodh na cuairteanna sin laistigh den Choimisiún a shonrú?

III. An bhféadfá sonraí a chur ar fáil maidir leis na hathruithe atá beartaithe a mhéid a bhaineann le húdarú misean arna bhfóirdheonú ag tríú páirtithe.

IV. An bhféadfá líon na gcásanna inar íoc tríú páirtithe as costais taistil agus costais eile a bhaineann le misin a rinne Coimisinéirí agus oifigigh shinsearacha sna blianta 2021, 2022 agus 2023 go dtí seo a dheimhniú agus sonraí a thabhairt ina leith?

[1] Féach: https://www.politico.eu/article/eu-transport-chief-henrik-hololei-flew-free-qatar-airways-negotiate-aviation-deal-doha-qatargate-corruption/

[2] Féach: https://www.politico.eu/wp-content/uploads/2023/02/24/2023-02-15_EASE-2023-0098-ANNEX-I83.pdf

[3] Féach: https://ec.europa.eu/commission/presscorner/detail/en/ip_21_5344.

[4] Cinneadh ón gCoimisiún an 25 Samhain 2014 maidir le foilsiú faisnéise faoi chruinnithe arna dtionól idir Ard-Stiúrthóirí an Choimisiúin agus eagraíochtaí nó daoine féinfhostaithe, 2014/838/AE, Euratom: http://data.europa.eu/eli/dec/2014/838/oj.

[5] Mar shampla, an 59ú Tionól d’Uachtaráin Chumann Asia Pacific Airlines, chomh maith leis an 52ú agus an 54ú Cruinniú Ginearálta Bliantúil d’Eagraíocht na nAeriompróirí Arabacha (AACO). Féach: http://ec.europa.eu/transparencyinitiative/meetings/meeting.do?host=ed82401c-d412-44bd-bdbc-3d0c5d051337.

[6] Féach: https://www.politico.eu/newsletter/politico-eu-influence/politico-eu-influence-presented-by-mcdonalds-dg-move-lobby-mishap-council-transparency-stalled-commission-delayed/.