Is é tionscnamh an Choimisiúin Eorpaigh maidir le truailliú plaisteach a laghdú agus feasacht a ardú an buaiteoir foriomlán i nGradam 2019 an Ombudsman Eorpaigh don Dea-Riarachán, a d’fhógair an tOmbudsman Emily O’Reilly ag searmanas sa Bhruiséil.

Bronnadh duaiseanna i sé chatagóir eile – lena n-áirítear cumarsáid agus riarachán oscailte – as 54 ainmniúchán san iomlán ó riarachán an Aontais.

Leis an nGradam don Dea-Riarachán, aithnítear gníomhaíochtaí de chuid riarachán poiblí an Aontais a bhfuil tionchar dearfach infheicthe agus díreach acu ar shaol na saoránach.

“Tá ríméad orm Gradam 2019 a bhronnadh ar na foirne in Ard-Stiúrthóireacht an Fháis agus in Ard-Stiúrthóireacht an Chomhshaoil as a gcuid oibre ar an tsaincheist seo,” a dúirt an tOmbudsman.

“Tá feasacht an phobail ag dul i méid maidir leis na héifeachtaí tubaisteacha a bhaineann le cliseadh aeráide agus maidir leis an ngá atá ann ár nósanna laethúla a athrú chun an comhshaol a chosaint. Is sampla den scoth í straitéis laghdaithe plaistigh an Choimisiúin - arna cur i gcrích ag a stiúrthóireachtaí margaidh inmheánaigh agus comhshaoil - de riarachán poiblí a ghníomhaíonn ar ábhair imní na saoránach.’

I measc bhuaiteoirí na gcatagóirí bhí Europol as a thionscadal nuálach ag baint úsáid as faisnéis slua chun cabhrú le leanaí a ndearnadh dúshaothrú gnéasach orthu a aimsiú, agus EFSA as feasacht a mhúscailt faoi bhagairtí ar bheacha. [1] Bhuaigh baill foirne ó Pharlaimint na hEorpa duais speisialta as a bhfeachtas, tar éis na gluaiseachta domhanda #MeToo, maidir le neamhfhulaingt ar ghnéaschiapadh san ionad oibre.

Áiríodh ar na hainmniúcháin freisin iarratais ar chistiú ón Aontas a dhéanamh níos éasca, coincheapa réasúnta nua a chur i láthair – eitic dhigiteach mar shampla – ar bhealaí nuálacha, beartais ghlasa a thabhairt isteach go hinmheánach, agus daoine a chur ar an eolas go réamhghníomhach faoina gcearta san Aontas.

Thug an tOmbudsman an Gradam don Dea-Riarachán isteach in 2017 chun aitheantas a thabhairt do shármhaitheas i seirbhís phoiblí AE agus chun comhroinnt smaointe agus dea-chleachtais a spreagadh. Is é seo an dara heagrán den duais.

Rinne bord comhairleach neamhspleách measúnú ar na hainmniúcháin agus roghnaigh an tOmbudsman na buaiteoirí.

Chun liosta de na buaiteoirí i ngach catagóir a fháil, féach thíos nó anseo.

Buaiteoirí foriomlána 2019

An Coimisiún Eorpach, Ard-Stiúrthóireacht an Chomhshaoil agus AS GROW

Straitéis chuimsitheach chun truailliú plaisteach a laghdú

Agus

An Coimisiún Eorpach, Ard-Stiúrthóireacht an Chomhshaoil

Feachtas múscailte feasachta faoi phlaistigh aon úsáide

Sármhaitheas trí chomhoibriú

An tÚdarás Eorpach um Shábháilteacht Bia (EFSA)

Feasacht a mhúscailt faoi chruachás na mbeach

Barr feabhais i soláthar seirbhísí atá dírithe ar shaoránaigh

An Coimisiún Eorpach, AS EAC (Aonaid B3 agus R4)

DiscoverEU – An deis a thabhairt do dhaoine óga eolas a chur ar an Eoraip

Barr feabhais sa riarachán oscailte

An Coimisiún Eorpach, DC REGIO (Aonad E1)

Comhshocruithe Sláine - Éilliú a laghdú i dtairiscintí poiblí

Barr feabhais sa nuálaíocht / sa chlaochlú

Europol

Sluafhaisnéis a úsáid chun leanaí a ndéantar dúshaothrú gnéasach orthu a tharrtháil

Sármhaitheas sa chumarsáid (comhbhuaiteoirí)

An Coimisiún Eorpach, AS JUST (aonad D1)

Foirne uirlisí saincheaptha chun feasacht a mhúscailt maidir le cearta LGBTI

Agus

Seirbhís Taighde Pharlaimint na hEorpa

An méid a dhéanann an Eoraip dom

Dámhachtain speisialta

MeTooEP

Neamhfhulaingt ar ghnéaschiapadh san ionad oibre