Il-każ kien jikkonċerna l-għeluq mill-Kummissjoni Ewropea ta’ lment ta’ ksur dwar l-applikazzjoni mill-awtoritajiet Franċiżi tad-Direttiva dwar il-promozzjoni tal-użu tal-enerġija minn sorsi rinnovabbli [1]. L-Ombudsman staqsiet dwar il-kwistjoni u sabet li ma kien hemm l-ebda amministrazzjoni ħażina mill-Kummissjoni Ewropea.  

Il-fatti li wasslu għall-ilment

1.  L-ilmentatur, ċittadin Olandiż residenti fi Franza, għandu kumpanija li tipproduċi enerġija nadifa minn pannelli fotovoltajċi.  L-ilmentatur talab permess mill-awtoritajiet lokali (“prefettura”) biex jinstalla transformer attwali li jippermettilu jipprovdi enerġija lin-network ġenerali tal-enerġija. L-awtoritajiet lokali ċaħdu t-talba tiegħu. L-ilmentatur għalhekk ilmenta mal-Kummissjoni Ewropea, fejn allega li l-awtoritajiet Franċiżi kienu kisru l-liġi tal-UE [2], jiġifieri d-Direttiva dwar il-promozzjoni tal-użu tal-enerġija minn sorsi rinnovabbli [3]. L-ilmentatur argumenta li Franza ma rrispettatx l-obbligi tagħha skont id-dispożizzjonijiet tad-Direttiva, b’mod partikolari dawk li jikkonċernaw il-ħruġ ta’ liċenzji għall-produzzjoni tal-elettriku minn sorsi ta’ enerġija rinnovabbli u l-aċċess għan-network tal-enerġija għall-elettriku prodott minn sorsi ta’ enerġija rinnovabbli.

2. Il-Kummissjoni Ewropea għalqet l-ilment ta' ksur tal-´s li ressaq l-ilment f'Awwissu 2016. Il-Kummissjoni tqis li Franza qed tirrispetta l-obbligi li jirriżultaw mid-Direttiva dwar il-promozzjoni tal-użu tal-enerġija minn sorsi rinnovabbli. Il-Kummissjoni sabet li d-deċiżjoni tal-awtoritajiet lokali Franċiżi li jirrifjutaw l-awtorizzazzjoni tal-ilmentatur biex jinstalla transformer attwali kienet fil-kompetenza tagħhom fi kwistjonijiet ta’ ppjanar tal-bliet, li huwa qasam li jaqa’ barra mill-kompetenza tal-Kummissjoni Ewropea.

3. Peress li ma kienx sodisfatt bit-trattament tal-kwistjoni mill-Kummissjoni, l-ilmentatur irrikorra għand l-Ombudsman Ewropew f’Settembru 2016.

L-inkjesta

4. L-Ombudsman fetħet inkjesta dwar l-ilment li l-Kummissjoni Ewropea kienet żbaljata meta għalqet l-ilment ta’ ksur tal-ilmentatur u li l-Kummissjoni Ewropea għandha terġa’ tiftaħ l-ilment ta’ ksur u tibda azzjoni kontra Franza quddiem il-Qorti Ewropea tal-Ġustizzja.

5. Matul l-inkjesta, it-tim ta’ inkjesta tal-Ombudsman qies kif xieraq l-informazzjoni pprovduta fl-ilment. B’mod partikolari, it-tim ta’ inkjesta wettaq analiżi bir-reqqa tal-korrispondenza li kienet saret bejn il-Kummissjoni u l-ilmentatur qabel ma l-ilmentatur irrikorra għand l-Ombudsman. It-tim ta' inkjesta tal-Ombudsman wettaq ir-riċerka tiegħu stess fir-rigward tal-kwistjoni li dwarha sar l-ilment.

L-għeluq tal-ilment ta’ ksur

Argumenti magħmula mill-ilmentatur

6. Fl-ilment tiegħu lill-Ombudsman, l-ilmentatur isostni li Franza mhijiex qed tirrispetta l-obbligi li jirriżultaw mid-Direttiva dwar il-promozzjoni tal-użu tal-enerġija minn sorsi rinnovabbli. L-ilmentatur jargumenta li l-Kummissjoni kienet żbaljata fl-evalwazzjoni tagħha tal-ilment ta’ ksur tiegħu.

Il-valutazzjoni tal-Ombudsman

7. Skont il-ġurisprudenza stabbilita tal-Qorti tal-Ġustizzja tal-Unjoni Ewropea, il-Kummissjoni tgawdi minn setgħa diskrezzjonali meta tiddeċiedi jekk [4] u meta [5] għandhiex tibda proċedimenti ta' ksur kontra Stat Membru u jekk għandhiex jew le tirreferi każ lill-Qorti [6]. Barra minn hekk, id-diskrezzjoni tal-Kummissjoni tfisser li l-individwi ma għandhom l-ebda dritt li jitolbuha tadotta pożizzjoni speċifika dwar kwistjonijiet ta’ ksur tal-liġi tal-UE [7]. Id-diskrezzjoni tal-Kummissjoni hija żviluppata aktar fil-Komunikazzjoni tagħha “Id-Dritt tal-UE: Riżultati Aħjar permezz ta’ Applikazzjoni Aħjar”[8], li fiha tistabbilixxi “approċċ aktar strateġiku għall-infurzar f’termini tal-ġestjoni tal-ksur”. Dan ifisser li l-Kummissjoni se “tiffoka u tipprijoritizza l-isforzi ta’ infurzar tagħha fuq l-aktar ksur importanti tad-dritt tal-UE li jaffettwa l-interessi taċ-ċittadini u tan-negozji tagħha”. Fil-Komunikazzjoni tagħha, il-Kummissjoni tiddeskrivi wkoll liema każijiet se tinvestiga bħala kwistjoni ta’ prijorità.

8. F’dan il-każ, ma hemm xejn li jissuġġerixxi li l-Kummissjoni aġixxiet lil hinn mill-marġni ta’ diskrezzjoni tagħha fit-trattament tal-ilment ta’ ksur tal-lanjant. Barra minn hekk, il-Kummissjoni żammet lill-ilmentatur infurmat dwar il-passi kollha meħuda fir-rigward tal-ilment tiegħu u stabbiliet ir-raġunijiet għall-għeluq tiegħu. Għalhekk ma kien hemm l-ebda amministrazzjoni ħażina mill-Kummissjoni.

Konklużjoni

Fuq il-bażi tal-inkjesta dwar dan l-ilment, l-Ombudsman għalaqha bil-konklużjoni li ġejja [9]:

Ma kien hemm l-ebda amministrazzjoni ħażina mill-Kummissjoni Ewropea.

L-ilmentatur u l-Kummissjoni Ewropea se jiġu infurmati b’din id-deċiżjoni.

Strasburgu, 02/03/2017

Tina Nilsson
Kap tal-Inkjesti - Unità 4

[1] http://eur-lex.europa.eu/legal-content/EN/TXT/PDF/?uri=CELEX:32009L0028&from=fr

[2] Il-Kummissjoni rreġistrat l-ilment tiegħu taħt CHAP (2014) 03744.

[3] Id-Direttiva 2009/28/KE, http://eur-lex.europa.eu/legal-content/EN/TXT/PDF/?uri=CELEX:32009L0028&from=fr

[4] Ara b’mod partikolari: is-sentenza tas-6 ta’ Diċembru 1989 fil-Kawża C-329/88, il-Kummissjoni vs il-Greċja [1989] Ġabra 4159; is-sentenza tas-27 ta’ Novembru 1990 fil-Kawża C-200/88, il-Kummissjoni vs il-Greċja [1990] Ġabra I 4299; is-sentenza tal-21 ta’ Jannar 1999 fil-Kawża C-207/97, il-Kummissjoni vs il-Belġju [1999] Ġabra I 275; is-sentenza tal-25 ta’ Novembru 1999 fil-Kawża C-212/98 il-Kummissjoni vs l-Irlanda [1999] Ġabra I 8571; Sentenza tas-6 ta’ Lulju 2000 fil-Kawża C-236/99, Il-Kummissjoni vs Ir-Renju tal-Belġju, [2000] Ġabra I-05657. Sentenza tal-14 ta’ Mejju 2002 fil-Kawża C-383/00, Il-Kummissjoni vs Ir-Repubblika Federali tal-Ġermanja, [2002] Ġabra I-04219.

[5] Ara s-sentenza tal-1 ta’ Ġunju 1994 fil-Kawża C-317/92, Il-Kummissjoni vs Il-Ġermanja [1994] Ġabra I 2039; is-sentenza tal-10 ta’ Mejju 1995 fil-Kawża C-422/92, il-Kummissjoni vs il-Ġermanja [1995] Ġabra I 1097

[6] Ara s-sentenza tas-6 ta’ Ottubru 2009 fil-Kawża C-562/07, Il-Kummissjoni vs Spanja [2009] Ġabra I-9553

[7] Ara s-sentenza tal-14 ta’ Settembru 1995 fil-Kawża T-571/93; Lefebvre et vs Il-Kummissjoni [1995] Ġabra II 2379.

[8] https://ec.europa.eu/info/sites/info/files/communication-from-the-commission-eu-law- better-results-through-better-application_en.pdf

[9] L-informazzjoni dwar il-proċedura ta' rieżami tista' tinstab fuq is-sit web tal-Ombudsman: http://www.ombudsman.europa.eu/en/resources/otherdocument.faces/en/70669/html.bookmark