1. L-ilmentatur jirrappreżenta soċjetà ċivili stabbilita fi Stat Membru tal-Unjoni Ewropea (UE). Huwa kkuntattja lil Europe Direct ^[1] dwar il-possibbiltà li ssir "Konferenza dwar ir-Rwanda".  Fid-9 ta’ Jannar 2019, Europe Direct wieġbet li l-Kummissjoni Ewropea ma torganizzax avvenimenti jew konferenzi f’dawn il-binjiet u stiednet lill-ilmentatur jikkuntattja lill-Istati Membri permezz tar-Rappreżentanzi Permanenti tagħhom għall-Unjoni Ewropea fi Brussell sabiex jorganizza konferenza. 

2. L-ilmentatur imbagħad ikkuntattja lil Europe Direct għal darb’oħra biex jesprimi n-nuqqas ta’ qbil tiegħu mat-tweġiba. Peress li ma rċeviex tweġiba għal din it-tieni ittra, l-ilmentatur irrefera l-kwistjoni lill-Ombudsman Ewropew fid-9 ta' Jannar 2019.

3. It-tim investigattiv tal-Ombudsman ikkuntattja lill-Kummissjoni. Europe Direct imbagħad wieġbet lill-ilmentatur fid-9 ta’ April 2019. Europe Direct spjegat li, bħala regola ġenerali, l-organizzazzjonijiet mhux governattivi (NGOs) ma jistgħux jużaw il-bini tal-istituzzjonijiet tal-UE għal konferenza, sakemm l-istituzzjonijiet ma jkunux l-organizzaturi tal-avveniment. Is-soċjetà ċivili u r-rispett għad-drittijiet tal-bniedem huma parti integrali mir-relazzjonijiet bejn l-UE u r-Rwanda. L-UE qed tipprovdi appoġġ finanzjarju biex issaħħaħ il-kapaċità tal-organizzazzjonijiet tas-soċjetà ċivili fir-Rwanda ^[2]. Madankollu, il-possibbiltajiet għas-Servizz Ewropew għall-Azzjoni Esterna biex jorganizza avveniment mal-NGOs huma limitati. Europe Direct informa lill-ilmentatur dwar il-possibbiltà li jikkuntattja, minbarra r-Rappreżentanzi Permanenti tal-Istati Membri għall-UE fi Brussell, lill-Parlament Ewropew jew lill-Membri individwali tal-Parlament Ewropew.

4.  Peress li issa ntbagħtet tweġiba li fiha Europe Direct infurmat lill-ilmentatur dwar il-korpi li jkunu l-aktar kapaċi jittrattaw it-talba tiegħu, dan l-ilment ġie solvut u ddeċidejt li nagħlaq il-każ ^[3].

Marta Hirsch-Ziembińska

Kap tal-Unità 1 - Investigazzjonijiet u T.I.C.

Magħmul fi Strasburgu, 12/06/2019

[1] Europe Direct huwa network ta’ ċentri ta’ informazzjoni li jinsabu fl-Istati Membri kollha li jipprovdu lill-pubbliku b’informazzjoni ġenerali dwar l-UE u d-drittijiet taċ-ċittadini Ewropej. L-organizzazzjoni ċentrali tal-Punti ta' Kuntatt Europe Direct hija r-responsabbiltà tal-Kummissjoni u l-investigazzjoni kienet diretta kontra l-Kummissjoni.

https://europa.eu/european-union/contact/meet-us_fr

[2] Europe Direct ipprovda link dwar id-Delegazzjoni tal-UE għar-Rwanda u r-rwol tas-Servizz Ewropew għall-Azzjoni Esterna (SEAE). 

[3] Dan l-ilment ġie ttrattat fil-kuntest tad-delega ta’ kompiti relatati mat-trattament tal-ilmenti, f’konformità mal-Artikolu 11 tad-Deċiżjoni tal-Ombudsman Ewropew li tadotta d-dispożizzjonijiet ta’ implimentazzjoni