Il-fatti li wasslu għall-ilment

1. L-ilmentatur huwa membru tal-persunal irtirat tal-Kummissjoni, li jgħix fil-Brażil. Kemm l-ilmentatur kif ukoll martu huma koperti mir-Reġim Komuni tal-Assigurazzjoni tal-Mard tal-istituzzjonijiet Ewropej (JSIS)[1]. Fl-2014, l-ilmentatur kellu inċident serju. Huwa ġie rikoverat l-isptar u kien jeħtieġ kura medika sussegwenti. Fl-2015, il-mara tal-ilmentatur kellha wkoll inċident serju u kienet teħtieġ kura medika fit-tul.

2. Għaż-żewġ inċidenti, l-ilmentatur għamel talba lill-JSIS għal fatturazzjoni diretta[2] biex jiġu koperti l-ispejjeż mediċi mġarrba. It-talba ntlaqgħet. Sussegwentement, l-Uffiċċju tal-Amministrazzjoni u l-Ħlas tal-Intitolamenti Individwali (PMO)[3] tal-Kummissjoni ddetermina li l-ilmentatur kien responsabbli għal EUR 38 505.28 tal-kostijiet li kien kopra bil-quddiem, li kien ikollu jħallas lura.

3. Fl-2015, f’konformità mar-regoli applikabbli[4], il-PMO fittex li jnaqqas ammont fiss mill-pensjoni ta’ kull xahar tal-ilmentatur biex ikopri d-dejn pendenti tal-ilmentatur lill-JSIS. Il-PMO informa wkoll lill-ilmentatur li kien intitolat li jibbenefika minn “faċilità speċjali ta’ rimborż”[5] li tista’ tnaqqas id-dejn b’mod sinifikanti.

4. Bejn l-2015 u l-2017, kien hemm korrispondenza sinifikanti bejn l-ilmentatur u l-PMO. Fl-2017, huwa ressaq ilment amministrattiv biex jikkontesta l-irkupru tal-ispejjeż mediċi u kif il-fajl tiegħu kien ġie ttrattat. L-ilment ġie miċħud. Madankollu, il-Kummissjoni reġgħet infurmat lill-ilmentatur li huwa seta’ jibbenefika mill-faċilità speċjali ta’ rimborż.

5. L-ilmentatur irrikorra għand l-Ombudsman. Huwa kkontesta l-fatt li l-PMO kien bagħat formoli applikabbli għall-faxxitità speċjali tar-rimborż bil-Franċiż, lingwa li ma jafx biha. Huwa argumenta wkoll li ma kienx ra l-kontijiet oriġinali tal-isptarijiet (li l-JSIS kienet ħallset direttament), u għalhekk ma kienx f’pożizzjoni li jivvaluta l-preċiżjoni tal-kontijiet. Bħala tali, huwa ma setax jaċċetta d-deċiżjoni tal-Kummissjoni li tirkupra ammont li huwa ma setax jivverifika. Fl-aħħar nett, l-ilmentatur kien tal-fehma li l-PMO kien għamel dikjarazzjonijiet mhux xierqa li jimplikaw li hu u martu kienu involuti f’attivitajiet frodulenti.

L-inkjesta

6. L-Ombudsman fetħet inkjesta dwar kif il-Kummissjoni ttrattat il-proċedura ta’ rimborż u d-dikjarazzjonijiet magħmula mill-PMO. 

7. Matul l-inkjesta, l-Ombudsman irċieva t-tweġiba tal-Kummissjoni u l-kummenti tal-ilmentatur bi tweġiba għal dik it-tweġiba.

8. Fit-tweġiba tagħha, il-Kummissjoni esprimiet dispjaċir dwar kif l-ilmentatur u martu kienu pperċepiti d-dikjarazzjoni mill-PMO, u ddikjarat li ma kellhiex l-intenzjoni li timplika attivitajiet frodulenti minnhom.

9. Sussegwentement, il-Kummissjoni pprovdiet lill-Ombudsman bil-formoli rilevanti biex tippermetti lill-ilmentatur jibbenefika mill-faċilità speċjali ta’ rimborż, kif ukoll informazzjoni dwar il-proċedura li għandha tiġi segwita. L-Ombudsman imbagħad ta parir lill-ilmentatur u lil martu dwar kif għandhom jipproċedu.

10. Il-Kummissjoni pproċessat malajr l-applikazzjoni tal-ilmentatur. Hija kkanċellat id-dejn pendenti u waqqfet it-tnaqqis ta’ kull xahar mill-pensjoni tal-ilmentatur.  

Il-valutazzjoni tal-Ombudsman

11. L-inkjesta tal-Ombudsman iffukat fuq l-assistenza lill-ilmentatur biex jibbenefika mill-faċilità speċjali ta’ rimborż. Din il-faċilità issa ġiet applikata. Il-Kummissjoni wieġbet b’mod pożittiv għall-intervent tal-Ombudsman f’isem l-ilmentaturi, u solviet il-kwistjonijiet l-oħra mqajma mill-ilmentatur.

Konklużjoni

Abbażi tal-inkjesta, l-Ombudsman jagħlaq dan il-każ bil-konklużjoni li ġejja[6]:

Il-Kummissjoni Ewropea solviet il-kwistjonijiet imqajma f’dan l-ilment.

L-ilmentatur u l-Kummissjoni Ewropea se jiġu infurmati b’din id-deċiżjoni.

Marta Hirsch-Ziembińska

Kap tal-Inkjesti u l-ICT - Unità 1

Strasburgu, 11/12/2018

[1] Il-JSIS hija l-iskema tal-assigurazzjoni tal-mard għall-impjegati tal-Unjoni Ewropea. Aktar informazzjoni hija disponibbli hawnhekk: http://ec.europa.eu/pmo/info.sickinsurance_en.htm.

[2] Taħt il-faċilità ta’ fatturazzjoni diretta, il-JSIS tagħmel pagamenti bil-quddiem biex tkopri l-ispejjeż mediċi bil-quddiem imġarrba mill-membri tal-iskema. Sussegwentement, il-JSIS tikkalkola l-ammont tal-ispejjeż mediċi li hija responsabbli għalihom u l-ammont li għandu jiġi kopert mill-persuna assigurata.

[3] Il-PMO jamministra, jikkalkula u jħallas id-drittijiet finanzjarji tal-persunal tal-Unjoni Ewropea.

il-Kummissjoni.

[4] It-Titolu III, il-Kapitolu 4, il-Punt 1 tad-dispożizzjonijiet ġenerali ta’ implimentazzjoni għar-rimborż tal-ispejjeż mediċi:

“L-ispejjeż li għandhom jitħallsu mill-membru, bħala regola, jitnaqqsu minn rimborżi sussegwenti, jew mis-salarju, il-pensjoni jew somom oħra dovuti mill-istituzzjoni. Fuq talba tal-Uffiċċju tal-Ħlasijiet, il-bilanċ jista’ jiġi rimborżat permezz ta’ trasferiment fil-kont bankarju tal-JSIS.”

http://ec.europa.eu/pmo/tender/06_annexe6_dge_en.pdf

[5] Skont l-Artikolu 72(3) tar-Regolament Nru 31 (KEE), 11 (KEEA), li jistabbilixxi r-Regolamenti tal-Persunal għall-Uffiċjali u l-Kondizzjonijiet tal-Impjieg applikabbli għall-Aġenti l-Oħra tal-Komunità Ekonomika Ewropea u tal-Komunità Ewropea tal-Enerġija Atomika (ir-Regolamenti tal-Persunal).

[6] Dan l-ilment ġie ttrattat taħt trattament ta’ każijiet delegati, f’konformità mal-Artikolu 11 tad-Deċiżjoni tal-Ombudsman Ewropew li tadotta Dispożizzjonijiet ta’ Implimentazzjoni