A Dhochtúir X, a chara,

Táim ag scríobh chun réiteach a lorg ar an gcás seo ^[1], atá bunaithe ar ghearán a fuair mé an 4 Iúil 2024.

Chuir an gearánach iarraidh ar rochtain phoiblí ar dhoiciméid [2] faoi bhráid na Gníomhaireachta Eorpaí um an nGarda Teorann agus Cósta (Frontex) i mí Aibreáin 2024. Bhain a hiarraidh le “aon chomhfhreagras maidir le cruthú na bhfoilseachán seo a leanas: "Leabhar Gníomhaíochta" maidir le tuairisceáin do dhaoine idir 4-11 bhliain d'aois agus "Mo threoirleabhar maidir le filleadh (Leagan Leanaí)"”. Chláraigh Frontex iarraidh an ghearánaigh faoin uimhir thagartha PAD-2024-00201.

I mí na Bealtaine 2024, d’eisigh Frontex a fhreagra tosaigh ar an iarraidh. Chuir sé in iúl don ghearánach gur shainaithin sé 76 dhoiciméad, nach bhféadfaí aon rochtain a dheonú orthu. Rinne an gearánach agóid i gcoinne chinneadh Frontex trí iarratas dearbhúcháin a dhéanamh, a chláraigh Frontex faoin uimhir thagartha PAD-2024-00249. D’áitigh an gearánach gur cheart do Frontex liosta de na doiciméid a sainaithníodh a chur ar fáil di agus an rochtain is leithne is féidir a thabhairt dóibh.

I mí an Mheithimh 2024, dheimhnigh Frontex a sheasamh tosaigh nach bhféadfadh sé rochtain a thabhairt ar na doiciméid. Bhí Frontex ag brath ar roinnt eisceachtaí a leagtar amach i Rialachán 1049/2001, eadhon cosaint na slándála poiblí, an phríobháideachais, leasanna tráchtála, agus an próiseas cinnteoireachta inmheánach.[3] Dhiúltaigh sé liosta doiciméad a chur ar fáil, ag áitiú gurbh ionann é sin a dhéanamh de facto agus doiciméad nua a chruthú, nach oibleagáid é faoi Rialachán 1049/2001.

D’oscail mé fiosrúchán ar an ngearán seo agus d’iarr mé ar Frontex cóipeanna de na doiciméid atá i gceist a chur ar fáil do m’fhoireann fiosrúcháin. Chuir Frontex a thuairimí breise ar an ngearán ar fáil freisin.

Ar bhonn na cigireachta ar dhoiciméid a rinneadh, is é mo thuairim gur cheart rochtain pháirteach leathan a bheith tugtha ag Frontex ar na 76 dhoiciméad atá i gceist.

Is éard atá sna doiciméid ríomhphoist a malartaíodh idir mí an Mheithimh 2022 agus mí Mheán Fómhair 2023 maidir le tionscadal a rinne Frontex chun bosca uirlisí a chruthú do leanaí a bhfuil baint acu le hoibríochtaí um fhilleadh. Sna doiciméid tá aiseolas ó bhaill foirne Frontex nó ó shaineolaithe seachtracha maidir le dréachtleaganacha de na foilseacháin nach cosúil go bhfuil siad íogair tríd síos. Is de chineál eagarthóireachta nó teicniúil iad formhór mór na mbarúlacha agus na moltaí a dhéantar. Tá an leagan deiridh den fhoilseachán ar fáil go poiblí.[4] I mo thuairimse, theip ar Frontex a léiriú conas a bhainfeadh nochtadh na ndoiciméad, ina n-iomláine, an bonn de leas an phobail maidir leis an tslándáil phoiblí. Níor mhínigh sé go diongbháilte ach oiread conas a d’fhéadfadh rochtain ar na doiciméid an bonn a bhaint dá phróiseas cinnteoireachta i ndáiríre agus go sonrach.

Ní léir ach oiread conas a bhainfí an bonn de leasanna tráchtála na saineolaithe seachtracha, nó de chumas Frontex a bheith rannpháirteach sa mhargadh, trí na doiciméid a nochtadh agus tugaim faoi deara nach ndeachaigh Frontex i gcomhairle leis na saineolaithe seachtracha maidir leis an iarraidh ar rochtain phoiblí. Is de chineál eagarthóireachta den chuid is mó an t-aiseolas a fhaightear ó na saineolaithe seachtracha maidir le dréachtleaganacha de na foilseacháin.  Dá dtiocfadh aon chuid de na doiciméid faoin eisceacht maidir le leas tráchtála, d’fhéadfadh Frontex iad a fholú go héasca. Baineann an argóint chéanna le haon sonraí pearsanta sna doiciméid.

Ar bhonn níos ginearálta, táim den tuairim go bhféadfadh nochtadh na ríomhphost don phobal saoránaigh a chur ar a suaimhneas faoin obair ardcháilíochta agus faoi na hiarrachtaí cúramacha atá déanta ag Frontex i ndréachtú an bhosca uirlisí do leanaí a bhfuil baint acu le hoibríochtaí um fhilleadh.

Tá measúnú níos mionsonraithe ó m’fhoireann fiosrúcháin ar fáil in Iarscríbhinn a ghabhann leis an litir seo.

Ina theannta sin, tugaim faoi deara nár chuir Frontex liosta doiciméad ar fáil don ghearánach a shainaithin sé mar dhoiciméid a thagann faoi raon feidhme a hiarrata ar rochtain. D’áitigh Frontex, ina thuairimí breise, nach raibh aon oibleagáid air liosta den sórt sin a chur ar fáil don ghearánach. Sa chás sin, mheas Frontex gur leor líon na ndoiciméad sainaitheanta a thabhairt don ghearánach, agus na cúiseanna lena neamhnochtadh, chun a chur ar a cumas iarraidh eolasach a dhéanamh ar athbhreithniú.

Tá mé den tuairim go seasta gur ábhar dea-riaracháin é liostaí de dhoiciméid shainaitheanta a sholáthar, toisc go n-éascaíonn sé tuiscint an iarrthóra ar chinneadh na hinstitiúide agus ar fhoirmliú iarrata ar athbhreithniú, más gá. I bhfiosrúchán comhthreomhar,[5] chinn mé gur dhrochriarachán a bhí i ndiúltú córasach Frontex liostaí doiciméad a sholáthar a shainaithníonn sé mar dhoiciméid a thagann faoi raon feidhme na n-iarrataí ar rochtain phoiblí ar dhoiciméid agus mhol mé gur cheart do Frontex liostaí den sórt sin a sholáthar. I mí na Bealtaine 2024, chuir Frontex in iúl dom go ndéanfadh sé machnamh ar liostaí a chur ar fáil d’iarratasóirí ‘i gcás ina meastar gur gá’ agus ‘ar bhonn cás ar chás’, chun ‘feabhas breise a chur ar chumas na n-iarratasóirí achomharc éifeachtach eolasach a dhéanamh’. Sa chás sin, ar an drochuair, dhréachtaigh Frontex a fhreagra tosaigh ar bhealach nár lig don ghearánach cineál na ndoiciméad a shainaithin Frontex a thuiscint. Tá an cinneadh daingniúcháin chomh beag céanna sna sonraí a sholáthraíonn sé faoi chineál agus ábhar na ndoiciméad. Is léir go mbeadh liosta de dhoiciméid shainaitheanta riachtanach don ghearánach chun seasamh Frontex a thuiscint. Dá bhrí sin, is deacair a thuiscint cén fáth nár roinneadh liosta na ndoiciméad, a cuireadh ar fáil do m’fhoireann fiosrúcháin, leis an ngearánach mar fhreagra ar a hiarraidh ar rochtain.

I bhfianaise an mhéid thuas, ba mhaith liom an réiteach seo a leanas a mholadh sa chás seo:

Ba cheart do Frontex athmhachnamh a dhéanamh ar a sheasamh maidir le hiarraidh an ghearánaigh, d’fhonn an rochtain is leithne is féidir a thabhairt ar na doiciméid atá i gceist.

Ba cheart do Frontex liosta de dhoiciméid shainaitheanta a chur ar fáil don ghearánach.

Bheinn buíoch díot as do fhreagra ar mo thogra a fháil laistigh de 2 mhí, is é sin faoin 20 Nollaig 2024.

Ag an gcéim seo, tá an togra maidir le réiteach agus an iarscríbhinn a ghabhann leis faoi rún. Chuir m’fhoireann fiosrúcháin in iúl don ghearánach, áfach, go bhfuil sé ar intinn agam réiteach a lorg sa chás seo.^[6] Tabhair do d’aire gurb é an gnáthchleachtas atá againn cóip den togra réitigh a sheoladh chuig an ngearánach le haghaidh barúlacha, mar aon le cóip de fhreagra na hinstitiúide air, a luaithe a bheidh an freagra sin faighte againn. Foilseoimid freisin an togra réitigh agus freagra Frontex ar ár suíomh gréasáin ag deireadh an fhiosrúcháin. Dá bhrí sin, iarraim ar Frontex a chur in iúl dúinn nár cheart aon fhaisnéis atá sa togra réitigh, nó ina fhreagra, a roinnt leis an ngearánach.^[7]

Le dea-mhéin,

Emily O'Reilly An tOmbudsman
Eorpach

Strasbourg, 28/10/2024

Iarscríbhinn: Measúnú mionsonraithe a bhaineann le togra an Ombudsman maidir le réiteach i gcás 1259/2024/NH

Tuairisc ar na doiciméid atá i gceist

Is éard atá sna 76 dhoiciméad atá i gceist ríomhphoist a malartaíodh idir mí an Mheithimh 2022 agus mí Mheán Fómhair 2023 maidir le tionscadal a rinne Frontex chun bosca uirlisí a chruthú do leanaí a bhfuil baint acu le hoibríochtaí um fhilleadh. Tá sé dhoiciméad sa bhosca uirlisí:

1. Mo Threoirleabhar maidir le Filleadh (Leagan do leanaí)

2. Mo Threoirleabhar maidir le Filleadh (Leagan don óige)

3. My Guidebook on Return [Mo Threoirleabhar maidir le Filleadh] (Leagan do leanaí neamhthionlactha)

4. Lámhleabhar do thuismitheoirí agus do chaomhnóirí

5. Leabhar gníomhaíochta (4-11 bhliain)

6. Lámhleabhar d’oifigigh imirce.

Foilsítear an leagan deiridh de dhoiciméid 1 go 5 a liostaítear thuas ar shuíomh gréasáin Oifig na bhFoilseachán. Níl an séú doiciméad, ‘Lámhleabhar d’Oifigigh Imirce ’, ar fáil go poiblí.

Baineann gach ríomhphost le dréachtú na ndoiciméad (le cabhair ó bheirt saineolaithe seachtracha) agus leis an bpróiseas aiseolais trínar thug na saineolaithe seachtracha agus roinnt ball foirne Frontex barúlacha agus/nó trína ndearna siad moltaí maidir leis na doiciméid. Tá malartú ríomhphoist amháin ar a laghad ann freisin idir Frontex agus Aireacht Gnóthaí Baile na hÍsiltíre.

Príobháideachas agus sláine an duine aonair a chosaint (Airteagal 4(1)(b) de Rialachán 1049/2001)

Chuir an gearánach in iúl go soiléir san iarratas dearbhúcháin nach bhfuil suim aici sonraí pearsanta a fháil. Measann an tOmbudsman nach ualach riaracháin díréireach ar Frontex a bheadh i gceist le sonraí pearsanta a fholú.

Leas an phobail a chosaint maidir leis an tslándáil phoiblí (Airteagal 4(1)(a) an chéad fhleasc de Rialachán 1049/2001)

Tar éis dó na doiciméid a iniúchadh, níl an tOmbudsman cinnte go bhféadfadh Frontex an eisceacht ar rochtain phoiblí a agairt, a bhaineann le leas an phobail a chosaint maidir le slándáil phoiblí, chun rochtain ar na 76 dhoiciméad ina n-iomláine a dhiúltú. Áirítear sna doiciméid, mar shampla, malartuithe ríomhphoist ina bhfuil aiseolas ar an Leabhar Gníomhaíochta agus/nó ar an Treoirleabhar maidir le Filleadh (Leagan do leanaí). Tá na doiciméid seo dírithe ar leanaí idir 4 agus 11 bliana d'aois. Is de chineál eagarthóireachta iad an t-aiseolas agus na barúlacha, toisc go mbaineann siad le hathruithe aeistéitiúla (lena n-athraítear líníocht, dath, etc.) nó le hoiriúnuithe atá dírithe ar an spriocghrúpa sonrach. Is deacair a thuiscint conas a d’fhéadfadh an t-aiseolas a sholáthraítear a bheith bainteach le faisnéis oibríochtúil nó íogair, amhail modus operandi na ngardaí teorann le linn oibríochtaí um fhilleadh. Cé go dtagraíonn roinnt barúlacha do shamplaí praiticiúla d’oibríochtaí um fhilleadh, bunaithe ar thaithí roinnt ball foirne Frontex, ní chiallaíonn sé sin go mbainfeadh a nochtadh an bonn de leas an phobail maidir le slándáil phoiblí an Aontais.

Ní chlaonann na dréachtleaganacha de na foilseacháin atá i gceangal le cuid de na ríomhphoist ach beagán ó na leaganacha deiridh, atá ar fáil go poiblí.[8] Dá bhrí sin, is deacair glacadh leis go bhfuil aon fhaisnéis oibríochtúil nó íogair iontu sin.

Leasanna tráchtála duine nádúrtha nó dhlítheanaigh a chosaint, lena n-áirítear maoin intleachtúil (Airteagal 4(2), an chéad fhleasc, de Rialachán 1049/2001)

D’áitigh Frontex ina chinneadh daingniúcháin go bhfuil faisnéis mhionsonraithe sna doiciméid atá i gceist, lena n-áirítear maoin intleachtúil, a dhéanfadh difear do Bheartas Cóipchirt Frontex. Chuirfeadh nochtadh bac freisin ar chumas Frontex a bheith rannpháirteach sa mhargadh faoi láthair agus amach anseo.

Is deacair a thuiscint conas a d’fhéadfadh nochtadh na ndoiciméad difear a dhéanamh do chóipcheart Frontex agus/nó dá chearta a dhíorthaítear ó mhaoin intleachtúil. Níor tháinig aon athrú suntasach ar dhearadh ná ar ghnéithe dílseánaigh na ndoiciméad idir céim an dréachtaithe agus an foilseachán deiridh. Ós rud é go bhfuil na doiciméid ar fáil go poiblí, agus go n-áirítear iontu an séanadh caighdeánach a bhaineann le cosaint cóipchirt,[9] is deacair a fheiceáil conas a bhainfeadh nochtadh na ndréachtfhoilseachán atá i gceangal an bonn de chosaint maoine intleachtúla.

Ina thuairimí breise, d’áitigh Frontex freisin go bhfuil faisnéis dhílsithe atá íogair ó thaobh an gheilleagair de sna doiciméid, lena n-áirítear na hiarrachtaí foilsithe atá ar siúl faoi láthair, a sháródh, dá scaoilfí go haontaobhach iad, cearta dílseánaigh an tríú páirtí a sholáthraíonn an tseirbhís. Thairis sin, bhainfí an bonn go mór de chumas Frontex a bheith rannpháirteach sa mhargadh, rud a eascraíonn as prionsabal na muiníne frithpháirtí idir na páirtithe conarthacha agus a bhfuil dlúthbhaint aige leis an bprionsabal sin, dá nochtfaí doiciméid ina bhfuil faisnéis a bhaineann go sonrach leis an ngnóthas sin agus lena nochtfaí an saineolas agus an cineál sonrach comhair a sholáthair an conraitheoir, a bhfuair Frontex a sheirbhísí. Mar thoradh ar nochtadh den sórt sin, bheadh impleachtaí díobhálacha ann do sheasamh Frontex maidir le conarthaí a thabhairt i gcrích le haghaidh foilseacháin chomhchosúla, go háirithe rud a d’fhágfadh go mbeadh seasamh na Gníomhaireachta níos deacra i gcaibidlíochtaí amach anseo le haghaidh conarthaí den chineál céanna.

Sna doiciméid atá i gceist tá aiseolas a fuarthas ó (i) saineolaithe seachtracha ar conradh chun cuidiú leis na foilseacháin atá i gceist a dhréachtú agus (ii) baill foirne Frontex. D’fhéadfadh roinnt de na barúlacha a rinne na saineolaithe seachtracha, dá nochtfaí iad, an saineolas a chuir an conraitheoir ar fáil a nochtadh agus d’fhéadfaidís timpeallacht na muiníne idir na saineolaithe sin agus Frontex a shárú. Mar a luadh thuas, áfach, is cosúil gur de chineál eagarthóireachta agus neamhshubstaintiúil cuid mhór de na barúlacha agus den aiseolas a thug na saineolaithe seachtracha, agus dá bhrí sin ní chumhdaítear iad leis an eisceacht maidir le leas tráchtála. In aon chás, is cosúil nach ndeachaigh Frontex i gcomhairle leis na saineolaithe ábhartha maidir leis an iarraidh ar rochtain phoiblí chun a thuiscint an ndéanfadh nochtadh na ndoiciméad difear dá leasanna tráchtála.

Próiseas cinnteoireachta Frontex a chosaint (Airteagal 4(3) de Rialachán 1049/2001)

D’áitigh Frontex sa chinneadh daingniúcháin go mbainfeadh nochtadh na ndoiciméad atá i gceist an bonn go mór de phróisis chinnteoireachta inmheánacha maidir le gníomhaíochtaí Frontex agus na mBallstát atá ann faoi láthair agus a bheidh ann amach anseo. Go háirithe, dá nochtfaí na doiciméid nochtfaí seasaimh chaibidlíochta na bpáirtithe leasmhara, rud a chreimfeadh an mhuinín fhrithpháirteach i measc na rannpháirtithe uile.

Dúirt Frontex freisin go nochtfadh nochtadh poiblí na ndoiciméad iarrtha tuairimí conspóideacha le haghaidh úsáid inmheánach mar chuid de phléití agus réamhchomhairliúcháin laistigh de Frontex. D'fhéadfaí féinchinsireacht a dhéanamh ar údair na sleachta faoi seach, dá nochtfaí iad.

Sna tuairimí breise, dúirt Frontex ‘go nochtfadh nochtadh poiblí sleachta teoranta de na doiciméid a iarradh seasaimh chonspóideacha Rannán Fillte agus Oifig Cumarsáide Frontex chomh maith le bainistíocht shinsearach Frontex, agus go ndéanfadh sé tagairtí sainráite go páirteach freisin don chomhar le comhairleoirí, conraitheoirí agus na Ballstáit.’ Dúirt Frontex freisin go bhféadfadh tionchar díobhálach a bheith ag rochtain a thabhairt ar an bplé leanúnach agus ar scaipeadh pleanáilte na bhfoilseachán. Liostaíodh ann mar shamplaí obair reatha na Rannóige um Fhilleadh maidir le foilseachán/uirlis don óige atá dírithe ar a bhfolláine mhothúchánach, a bhfuiltear ag súil léi ag deireadh 2024, nó irisí don óige agus do dhaoine fásta lena n-áirítear cleachtaí atá dírithe ar fhaoiseamh struis, a bhfuiltear ag súil leo ag tús 2025. Baineann na tionscadail le páirtithe leasmhara inchomparáide, arb ionann iad den chuid is mó.

Dearbhaíodh go comhsheasmhach i gcásdlí an Aontais go bhfuil sé de dhualgas ar institiúidí an Aontais, i bprionsabal, mínithe a thabhairt ar an gcaoi a bhféadfadh rochtain ar dhoiciméad an bonn a bhaint go hiarbhír agus go sonrach den leas atá á chosaint.^[10] Níor thug Frontex mínithe diongbháilte maidir leis an gcaoi a mbainfeadh nochtadh an aiseolais inmheánaigh atá i gcuid de na doiciméid an bonn de phróiseas cinnteoireachta inmheánach Frontex go hiarbhír agus go sonrach.

Léiríonn an t-iniúchadh ar na doiciméid nach bhfuil an t-ionchur nó an t-aiseolas a chuireann baill foirne Frontex ar fáil do chéimeanna dréachtaithe éagsúla na bhfoilseachán íogair tríd síos. Baineann sé den chuid is mó le hathruithe cosmaideacha nó le scríbhneoireacht níos soiléire atá dírithe ar leanaí. Tá an t-aiseolas, dar leis an Ombudsman, an-chaighdeánach agus níl sé éagsúil ó ‘ghnáthmholtaí’ a dhéanfadh ball foirne de chuid an Aontais maidir le haon chineál doiciméid cumarsáide atá á athbhreithniú. Níor mhínigh Frontex cén fáth a ndéanfadh a bhaill foirne, dá nochtfaí a n-aiseolas don phobal, ‘féinchinsireacht a chleachtadh’ agus ‘deireadh a chur le haon tuairimí a chur ar aghaidh’ amach anseo. In aon chás, dhéanfaí sonraí pearsanta uile bhaill foirne Frontex a fholú agus ní bheadh an pobal in ann a fháil amach cé a rinne barúil shonrach.

Aithníodh i gcásdlí an Aontais go bhféadfadh cosaint an phróisis cinnteoireachta ar bhrú seachtrach spriocdhírithe a bheith ina fhoras dlisteanach chun rochtain ar dhoiciméid a shrianadh. Mar sin féin, chuir sé i dtábhacht freisin nach mór réaltacht an bhrú sheachtraigh sin ‘a shuí go cinnte’ agus ‘nach mór fianaise a thabhairt ar aird chun a léiriú go raibh riosca measartha intuartha ann’ go ndéanfadh an brú seachtrach sin difear suntasach don chinneadh atá i gceist.^[11] Ní chomhlíonann argóint Frontex maidir le brú seachtrach na ceanglais sin.

Ós rud é go bhfuil Frontex ag obair faoi láthair ar fhoilseacháin chomhchosúla a bhaineann, den chuid is mó, leis na daoine céanna, ní athraítear an measúnú sin.

[1] I gcomhréir le hAirteagal 2(10) de Reacht an Ombudsman Eorpaigh (Rialachán 2021/1163 an 24 Meitheamh 2021 lena leagtar síos na rialacháin agus na coinníollacha ginearálta lena rialaítear comhlíonadh dhualgais an Ombudsman) atá ar fáil ag: https://www.ombudsman.europa.eu/en/legal-basis/statute/en.

[2] Faoi na rialacha a leagtar amach i Rialachán (CE) Uimh. 1049/2001 ó Pharlaimint na hEorpa agus ón gComhairle an 30 Bealtaine 2001 maidir le rochtain phoiblí ar dhoiciméid ó Pharlaimint na hEorpa, ón gComhairle agus ón gCoimisiún, ar fáil ag: https://eur-lex.europa.eu/legal-content/en/TXT/?uri=CELEX%3A32001R1049

[3] Leagtar amach in Airteagal 4(1)(a), an chéad fhleasc, Airteagal 4(1)(b), Airteagal 4(2), an chéad fhleasc, agus Airteagal 4(3) de Rialachán 1049/2001 faoi seach.

[4] Ar fáil ag: https://op.europa.eu/en/publication-detail/-/publication/d6ea7345-9297-11ee-8aa6-01aa75ed71a1/language-en (cé is moite den ‘Lámhleabhar d’oifigigh imirce’).

[5] Féach mo mholadh maidir le diúltú Frontex liostaí doiciméad a sholáthar a shainaithníonn sé mar dhoiciméid a thagann faoi raon feidhme na n-iarrataí ar rochtain phoiblí ar dhoiciméid (cás 1129/2023/OAM), atá ar fáil ag: https://www.ombudsman.europa.eu/en/recommendation/en/182124

[6] I gcomhréir le hAirteagal 2(10) de Reacht an Ombudsman.

[7] Más mian leat doiciméid nó faisnéis a chur isteach a mheasann tú a bheith rúnda, agus nár cheart a nochtadh don ghearánach, déan iad a mharcáil ‘Confidential’. Is féidir ríomhphoist chriptithe a sheoladh chuig ár mbosca ríomhphoist tiomnaithe. Scriosfar faisnéis agus doiciméid den chineál sin ó chomhaid an Ombudsman Eorpaigh go gairid tar éis dheireadh an fhiosrúcháin.

[8] Cé is moite den ‘Lámhleabhar d’oifigigh imirce’.

[9] ‘© An Ghníomhaireacht Eorpach um an nGarda Teorann agus Cósta, 2023.’

[10] Féach Breithiúnas na Cúirte an 21 Iúil 2011, Ríocht na Sualainne v an Coimisiún Eorpach agus MyTravel Group plc, cás C-506/08 P, mír 110, ar fáil ag: https://curia.europa.eu/juris/liste.jsf?language=en&num=C-506/08

[11] Breithiúnas na Cúirte Céadchéime an 18 Nollaig 2008, Pablo Muñiz v Coimisiún na gComhphobal Eorpach, cás T‑144/05, mír 86, ar fáil ag: https://curia.europa.eu/juris/liste.jsf?language=en&num=T-144/05.