Chuir an tOmbudsman Eorpach, Jacob Söderman, fáilte inniu roimh nuacht ó thrí institiúid agus comhlacht déag de chuid an AE, lena n-áirítear an Banc Ceannais Eorpach agus Europol, nach n-úsáideann siad teorainneacha aoise ina nósanna imeachta earcaíochta. Tháinig an t-eolas mar fhreagra ar fhiosrúchán tionscnaimh an Ombudsman féin a seoladh i mí na Bealtaine seo caite maidir le húsáid teorainneacha aoise in earcaíocht d'institiúidí an AE.

Luaigh na hinstitiúidí agus na comhlachtaí sin (1) prionsabal ginearálta an chomhionannais, fiúntas na foghlama ar feadh an tsaoil agus luach an tsaineolais ghairmiúil agus na taithí pearsanta mar chúiseanna lena mbeartas. Thagair siad freisin do Chairt um Chearta Bunúsacha an Aontais Eorpaigh, a ráthaíonn do gach duine an "ceart chun obair a dhéanamh" agus "an tsaoirse chun obair a lorg" (Airteagal 15) agus a chuireann cosc ar idirdhealú aoise (Airteagal 21). D'fhógair Uachtarán Pharlaimint na hEorpa, Uachtarán na Comhairle agus Uachtarán an Choimisiúin an Chairt ag cruinniú mullaigh Nice i mí na Nollag 2000.

D’admhaigh cúig institiúid agus comhlacht go leanann siad de theorainneacha aoise a chur i bhfeidhm ina nósanna imeachta earcaíochta: an Chúirt Iniúchóirí, an Chúirt Bhreithiúnais, an Chomhairle, an Coiste Eacnamaíoch agus Sóisialta agus an Oifig um Chomhchuibhiú sa Mhargadh Inmheánach. Maíonn a nArd-Rúnaí go bhfuil údar le teorainneacha aoise ar fhorais bainistíochta fónta airgeadais. Áitíonn siad, i measc nithe eile, go bhfuil oibrithe óga níos táirgiúla agus níos inoiriúnaithe, níos toilteanach taisteal agus gur lú seans go mbeidh siad as láthair ón obair.

Níor thug Parlaimint na hEorpa, an Coimisiún Eorpach ná Coiste na Réigiún freagra go fóill ar litir an Uasail Söderman, in ainneoin spriocdháta an 31 Iúil 2001. Cé gur gheall an Coimisiún deireadh a chur le teorainneacha aoise ón 1 Iúil 2001, leanann sé d’fhógraí iomaíochta ina bhfuil teorainneacha aoise a fhoilsiú.

Sheol an tUasal Söderman an fiosrúchán féintionscnaimh chun a áirithiú go mbeidh na cearta a leagtar síos sa Chairt um Chearta Bunúsacha ina bhfíorú do shaoránaigh na hEorpa. "Is ionann mainneachtain na cearta sa Chairt a urramú agus drochriarachán" a dúirt an tOmbudsman. “Is é an cúram atá orm an drochriarachán a chomhrac. Scrúdóidh mé anois na cúiseanna atá tugtha ag líon beag institiúidí chun leanúint de theorainneacha aoise a chur i bhfeidhm le fáil amach an bhfuil údar dlíthiúil leo.

Chun tuilleadh eolais a fháil, glaoigh ar Benita Broms, Príomhoifigeach Dlí, teil. +32 (0) 2 284 2543.

(1) An Banc Ceannais Eorpach, an Banc Eorpach Infheistíochta, Europol, an Foras Eorpach chun Dálaí Maireachtála agus Oibre a Fheabhsú, an Ghníomhaireacht Eorpach Chomhshaoil, an Lárionad Faireacháin Eorpach um Dhrugaí agus um Andúil i nDrugaí, an Oifig Chomhphobail um Chineálacha Plandaí, an Ghníomhaireacht Eorpach um Shábháilteacht agus Sláinte ag an Obair, an Fhondúireacht Eorpach Oiliúna, an Lárionad Faireacháin Eorpach um Chiníochas agus Seineafóibe, an Ghníomhaireacht Eorpach um Meastóireacht ar Tháirgí Íocshláinte, Ionad Aistriúcháin Chomhlachtaí an Aontais Eorpaigh, an Lárionad Eorpach um Fhorbairt na Gairmoiliúna