D'oscail an tOmbudsman Eorpach, P. Nikiforos Diamandouros, imscrúdú ar "Chóras Luathrabhaidh" (EWS) an Choimisiúin Eorpaigh. Liostaítear sa chóras faisnéise ríomhairithe seo cuideachtaí, eagraíochtaí neamhrialtasacha, comhlachais nó páirtithe eile a mheastar, de réir an Choimisiúin, a bheith ina mbagairt ar leasanna airgeadais an Aontais Eorpaigh. Féadfaidh institiúidí agus comhlachtaí uile an Aontais conarthaí nó íocaíochtaí le heintitis atá liostaithe faoi leibhéil rabhaidh EWS áirithe a bhlocáil nó a chur ar fionraí.

Faoi láthair, ní chuirtear rannpháirtithe i dtionscadail de chuid an Aontais ná iarratasóirí ar an eolas go córasach má tá siad san áireamh san EWS. Ní léir ach oiread conas is féidir le páirtithe leasmhara achomharc a dhéanamh i gcoinne liostú den sórt sin. Dúirt an tUasal Diamandouros: “Níl aon amhras ach go bhfuil sé an-tábhachtach go ndéanfadh an Coimisiún gach iarracht leasanna airgeadais an Aontais a chosaint. Mar sin féin, ní mór caitheamh go cothrom le cuideachtaí, le heagraíochtaí neamhrialtasacha agus le comhlachais eile agus urraim chuí á tabhairt do bhunphrionsabal dlíthiúil thoimhde na neamhchiontachta.”

Cúlra

Le blianta beaga anuas, tá roinnt gearán faighte ag an Ombudsman faoin EWS. I gcás amháin, diúltaíodh dá hiarratas ar chlár de chuid an Aontais toisc go raibh sé faoi réir réamhfhiosrúchán breithiúnach sa Spáinn agus go raibh sé, mar thoradh air sin, san áireamh san EWS. Cháin an tOmbudsman an Coimisiún toisc nár léirigh sé go raibh cothromaíocht chóir bainte amach aige idir an gá atá le bainistíocht fhónta airgeadais a dhéanamh ar a dheontais agus cearta bunúsacha na heagraíochta.

San imscrúdú reatha, iarrann an tOmbudsman ar an gCoimisiún sonraí a sholáthar maidir le líon na bpáirtithe leasmhara atá san áireamh san EWS, chomh maith leis an mbunús dlí do na catagóirí éagsúla rabhaidh EWS. Iarrann sé ar an gCoimisiún freisin soiléiriú a dhéanamh ar a bheartas faisnéise i leith na bpáirtithe lena mbaineann agus ar na sásraí achomhairc atá ar fáil i gcoinne liostú san EWS.

Faoi láthair, is féidir leis an gCoimisiún rochtain a fháil ar an EWS. Tugtar rochtain áirithe freisin d’institiúidí eile de chuid an Aontais agus, ag brath ar thionscadal an Aontais, don Bhallstát lena mbaineann. D’iarr an tOmbudsman ar an gCoimisiún a thuairimí a thabhairt maidir leis an damáiste a d’fhéadfadh a bheith i gceist leis an gcóras reatha do chlú geallsealbhóra atá san áireamh san EWS.

D'iarr an tOmbudsman ar an gCoimisiún freagra a thabhairt faoin 28 Feabhra 2009.

Chun litir thosaigh an imscrúdaithe a léamh, téigh chuig:

http://www.ombudsman.europa.eu/cases/correspondence.faces/en/3673/html.bookmark

Chun faisnéis a fháil faoin imscrúdú: Fergal O'Regan, Ceann an Aonaid Dlí, teil: +32 2 2843548