Strasbourg, 13/06/2017

Maidir le: Cur chun feidhme Airteagal 16 de Rialacháin Foirne an Aontais Eorpaigh

A Uasail Ky, a chara,

Mar is eol daoibh, d’fhiosraigh mé le blianta beaga anuas an chaoi a láimhseálann an Coimisiún Eorpach cásanna ina bhfágann baill foirne chun obair a dhéanamh don earnáil phríobháideach agus ina dtagann baill foirne isteach sa Choimisiún tar éis dóibh oibriú san earnáil phríobháideach (ar a dtugtar ‘doras imrothlach’). Mar thoradh ar m’fhiosrúchán, d’eisigh mé moltaí agus treoirlínte chun nósanna imeachta an Choimisiúin a neartú maidir le forálacha ábhartha Rialacháin Foirne an Aontais Eorpaigh a chur chun feidhme [1].

Sheol mé fiosrúchán leantach le déanaí [2] chun deis a thabhairt don Choimisiún mé a chur ar an eolas faoi na gníomhaíochtaí a rinneadh mar fhreagairt ar mo mholtaí agus ar mo threoirlínte.

I measc na bhforálacha lena rialaítear cásanna ‘dorais imrothlaigh’, foráiltear le hAirteagal 16(3) de na Rialacháin Foirne go gcuirfidh an t-údarás ceapacháin toirmeasc, i bprionsabal, ar iaroifigigh shinsearacha, le linn an 12 mhí tar éis dóibh an tseirbhís a fhágáil, dul i mbun brústocaireachta nó abhcóideachta i leith fhoireann a n-iarinstitiúide dá ngnó, dá gcliaint nó dá bhfostóirí maidir le hábhair a raibh siad freagrach astu le linn na dtrí bliana deireanacha sa tseirbhís. Ceanglaítear le hAirteagal 16(4) go bhfoilseoidh gach institiúid faisnéis go bliantúil maidir le cur chun feidhme na hoibleagáide sin, lena n-áirítear liosta de na cásanna a ndearnadh measúnú orthu.

Tá níos mó ná trí bliana caite ó tháinig na Rialacháin Foirne athbhreithnithe a chomhaontaigh na reachtóirí i bhfeidhm. Áirítear sna Rialacháin athbhreithnithe an oibleagáid nua atá ar institiúidí, comhlachtaí, oifigí agus gníomhaireachtaí an Aontais toirmeasc bliana brústocaireachta/abhcóideachta a fhorfheidhmiú d’fhoireann shinsearach an Aontais a d’fhág státseirbhís an Aontais agus faisnéis a fhoilsiú go bliantúil maidir leis na cásanna a ndearnadh measúnú orthu chun na críche sin. Creidim gur tráth maith é seo chun machnamh a dhéanamh ar ár gcleachtais faoi seach maidir leis na hoibleagáidí sin a chomhlíonadh.

Go dtí seo, d'fhoilsigh m'Oifig trí thuarascáil [3] maidir le cur chun feidhme Airteagal 16(3) de na Rialacháin Foirne. Le linn m’fhiosrúcháin maidir leis an gcaoi ar láimhseáil an Coimisiún cásanna inar fhág an fhoireann a bheith ag obair don earnáil phríobháideach agus vice versa, d’fhoilsigh an Coimisiún a chéad tuarascáil don bhliain 2014. Idir an dá linn, d’fhoilsigh an Coimisiún an dara tuarascáil. Cé gur dhíol sásaimh dom an chéad uair a d’fhoilsigh an Coimisiún faisnéis maidir le gníomhaíochtaí gairme na foirne sinsearaí a d’fhág a sheirbhís, choinnigh mé mo mholadh gur cheart don Choimisiún gach cinneadh a fhoilsiú a luaithe is féidir, ar bhealach níos mionsonraithe, agus gur cheart dó na cásanna uile a ndearnadh measúnú orthu a áireamh sa liosta, ní hamháin na hiarratais sin a mheas sé a d’fhéadfadh a bheith ina gcúis le brústocaireacht nó abhcóideacht. Mhol mé freisin gur cheart don Choimisiún mé a chur ar an eolas faoi gach cás ina gcuireann cúiseanna príobháideachais eisceachtúla láidre cosc ar chinneadh aonair a fhoilsiú.

Mar Ombudsman Eorpach, ba mhaith liom cabhrú le hinstitiúidí, comhlachtaí, oifigí agus gníomhaireachtaí uile an Aontais na caighdeáin is airde cuntasachta agus trédhearcachta a fhorbairt agus tacú lena n-iarrachtaí trí chabhrú le dea-chleachtais a shainaithint. Dá bhrí sin, táim ag scríobh freisin chuig institiúidí agus comhlachtaí an Aontais seachas an Coimisiún a chuireann na Rialacháin Foirne i bhfeidhm, agus a ndéantar ionadaíocht orthu sa Choiste Ullmhúcháin um Ábhair a bhaineann leis na Rialacháin Foirne (‘CPQS’)[4], chomh maith le roinnt gníomhaireachtaí díláraithe de chuid an Aontais [5], agus é mar aidhm agam faisnéis a bhailiú maidir leis na cleachtais reatha agus na dúshláin a d’fhéadfadh a bheith ann a bhaineann le cur chun feidhme Airteagal 16(3) agus (4) de na Rialacháin Foirne.

D'fhonn cabhrú liom a chinneadh cad iad na cleachtais reatha, ba mhór agam é dá bhfreagrófá na ceisteanna seo a leanas:

(i) An bhfoilsíonn d’institiúid an fhaisnéis bhliantúil a cheanglaítear le hAirteagal 16(4) de na Rialacháin Foirne cheana féin, nó an bhfuil sé beartaithe aici í a fhoilsiú? Má tá, an bhféadfá cóip den tuarascáil dheireanach nó réamhdhréacht a chur ar fáil dom? An féidir leat seoladh idirlín na tuarascála a thabhairt dom?

(ii) Cad é formáid, raon feidhme agus ábhar iarbhír nó beartaithe na faisnéise seo? Go háirithe, an áirítear sa liosta, nó an n-áireofar ann, na cásanna uile a ndearnadh measúnú orthu, nó na cásanna sin amháin a mheas d’institiúid a bhféadfadh brústocaireacht nó abhcóideacht a bheith i gceist leo?

(iii) Conas a shainíonn d’institiúid ‘oifigigh shinsearacha’, nó conas a bheartaíonn sí ‘oifigigh shinsearacha’ a shainiú?  An luann d’institiúid, nó an bhfuil sé ar intinn aici, ainmneacha na n-oifigeach atá i gceist a lua sa tuarascáil atá ar fáil go poiblí?

(iv) Cathain agus conas a dhéanann d’institiúid measúnú, nó a bheartaíonn sí measúnú a dhéanamh, ar na coincheapa ‘brústocaireacht’ agus ‘abhcóideacht’?

(v) Cad iad sonraí agus uainiú an fhoilseacháin is gá? An raibh aon chásanna ann inar chuir cúiseanna príobháideachais eisceachtúla agus láidre cosc ar chinneadh aonair a fhoilsiú?

Bheinn buíoch díot ach do fhreagra a thabhairt dom laistigh de thrí mhí ó dháta na litreach seo. Ná bíodh drogall ort samplaí den dea-chleachtas a lua i do fhreagra. Tabhair faoi deara le do thoil go mb'fhéidir go measfainn go mbeadh sé úsáideach do fhreagra a chur ar fáil ar mo shuíomh Gréasáin.

Tar éis dom na freagraí uile a fháil agus anailís a dhéanamh orthu, rachaidh mé i dteagmháil leis na hinstitiúidí uile lena mbaineann, chomh maith le Líonra Gníomhaireachtaí an Aontais, chun torthaí mo chuid oibre a chomhroinnt.

Táim ag tnúth le teagmháil chuiditheach a dhéanamh leat maidir leis an ábhar seo. Má theastaíonn tuilleadh eolais nó soiléirithe ó d'fhoireann, féadfaidh siad teagmháil a dhéanamh le Alice Bossière (+ 32 2 283 34 01) i m'Oifig.

Tusa ó chroí,

Emily O' Reilly

An tOmbudsman Eorpach

[1] Cinneadh lena ndúntar an fiosrúchán bunaithe ar ghearáin 2077/2012/TN agus 1853/2013/TN maidir leis an gcaoi a láimhseálann an Coimisiún Eorpach feiniméan na ‘ndoirse imrothlacha’. Ar fáil ag:

https://www.ombudsman.europa.eu/en/cases/decision.faces/en/71136/html.bookmark

[2] Tá mo litir chuig an gCoimisiún ag oscailt an fhiosrúcháin leantaigh ar fáil ag: https://www.ombudsman.europa.eu/en/cases/correspondence.faces/en/77544/html.bookmark

[3] Tá na tuarascálacha do 2014, 2015 agus 2016 ar fáil ag: https://www.ombudsman.europa.eu/en/resources/ethics_and_conduct/home.faces

[4] Parlaimint na hEorpa, Comhairle an Aontais Eorpaigh, Cúirt Bhreithiúnais an Aontais Eorpaigh, Cúirt Iniúchóirí na hEorpa, an tSeirbhís Eorpach Gníomhaíochta Seachtraí, an Coiste Eacnamaíoch agus Sóisialta, Coiste na Réigiún agus an Maoirseoir Eorpach ar Chosaint Sonraí.

[5] EMA, EFSA, ECHA, EASA, ESMA, ÚBE agus ÚEÁPC. Roghnaíodh na gníomhaireachtaí sin de réir a méide agus/nó a róil rialála.