Strasbourg, 17/06/2015

Fiosrúchán féintionscnaimh OI/10/2015/NF maidir le nós imeachta EPSO chun déileáil le hiarrataí ar athbhreithniú arna ndéanamh ag iarrthóirí i gcomórtais oscailte

A Uasail Bearfield, a chara,

De réir Airteagal 228 den Chonradh ar Fheidhmiú an Aontais Eorpaigh, tá sé de chumhacht ag an Ombudsman Eorpach fiosrúcháin a dhéanamh ar a tionscnamh féin. Tá sé i gceist go mbeadh na fiosrúcháin sin ina gcuidiú do na hinstitiúidí lena mbaineann trí dhea-chleachtas riaracháin a chur chun cinn.

Chinn mé fiosrúchán féintionscnaimh a oscailt maidir le nós imeachta na hOifige Eorpaí um Roghnú Foirne (EPSO) chun déileáil le hiarrataí ar athbhreithniú arna ndéanamh ag iarrthóirí i gcomórtais oscailte [1]. Is ábhar é seo a cuireadh in iúl dom trí roinnt gearán a cuireadh faoi mo bhráid in 2014 agus sa chéad leath de 2015. Tugann na gearáin sin le fios go bhfuil deacrachtaí tromchúiseacha ag EPSO iarrataí ar athbhreithniú a láimhseáil laistigh de thréimhse réasúnta ama. Is cosúil go n-eascraíonn na deacrachtaí sin as fadhbanna sistéamacha a d’fhéadfadh a bheith ann sa nós imeachta um iarraidh ar athbhreithniú. Dá bhrí sin, féachann m'fhiosrúchán le cuidiú le EPSO feabhsuithe córasacha féideartha a shainaithint agus a dhéanamh sa nós imeachta um iarraidh ar athbhreithniú agus ina chur i bhfeidhm, d'fhonn líon na ngearán agus na n-iarrataí ar fhaisnéis chuig EPSO agus chuig an Ombudsman a laghdú agus, níos tábhachtaí fós, an tseirbhís d'iarrthóirí a fheabhsú.

Clúdaítear san fhiosrúchán dearadh an nós imeachta atá ag EPSO faoi láthair maidir le hiarraidh ar athbhreithniú chomh maith lena chur i bhfeidhm. Is ábhar imní dom na saincheisteanna sonracha seo a leanas, atá grúpáilte i dtrí chatagóir:

1. An ghné ama

a. Moilleanna ar fhreagra a thabhairt ar iarrataí ar athbhreithniú

Is cosúil go bhfuil moilleanna rófhada ar EPSO maidir le freagraí a thabhairt ar iarrataí ar athbhreithniú. I gcásanna áirithe, thóg sé suas le hocht nó naoi mí ar EPSO freagraí a thabhairt d’iarrthóirí. Tá sé sin i gcodarsnacht leis an ráiteas ó EPSO, sna rialacha ginearálta, go bhféadfadh roinnt seachtainí a bheith i gceist leis an nós imeachta ".

I mí Eanáir 2015, chinn Binse na Seirbhíse Sibhialta go raibh tréimhse ama níos faide ná ceithre mhí chun freagra a thabhairt ar iarraidh ar athbhreithniú de chineál a chuirfeadh an t-iarrthóir i staid éiginnteachta suntasaí.[3]

b. Freagraí ar iarrataí ar athbhreithniú tar éis liostaí ionadaithe a fhoilsiú

Cuireadh in iúl dom gur foilsíodh painéil d’iarrthóirí ar éirigh leo sular thug EPSO freagraí ar gach iarratas ar athbhreithniú a bhaineann leis na comórtais oscailte lena mbaineann. Ní léir conas a bheadh EPSO in ann an fíoras sin a réiteach lena ghealltanas, i gcás freagra dearfach ar iarraidh ar athbhreithniú, an t-iarrthóir a athimeascadh sa chomórtas ag an gcéim inar eisiadh é chun cearta an iarrthóra a chosaint. I gcás ar bith, maidir le hiarrthóirí nach bhfuair freagra ar a n-iarraidh ar athbhreithniú go fóill, tráth foilsithe na bpainéal, is mó fós an éiginnteacht a bhaineann leo ná mar a d’admhaigh Binse na Seirbhíse Sibhialta.

2. Faisnéis d’iarrthóirí

a. Faisnéis faoin nós imeachta um iarraidh ar athbhreithniú

Is cosúil go bhfuil go leor iarrataí ar fhaisnéis á bhfáil ag EPSO ó iarrthóirí a chuir isteach iarrataí ar athbhreithniú agus ar mian leo fiosrú a dhéanamh faoi stádas a n-iarrataí. Tá an fhaisnéis ábhartha maidir leis an nós imeachta um iarratais ar athbhreithniú leagtha amach sna rialacha ginearálta agus, dá bhrí sin, tá sí ar fáil go ginearálta d’iarrthóirí. Mar sin féin, is cosúil nach mbíonn iarrthóirí a chuireann iarraidh ar athbhreithniú isteach ar an eolas faoin bhfaisnéis sin i gcónaí. D’fhonn acmhainní EPSO a chur ar fáil a mhéid is féidir chun iarrataí ar athbhreithniú a láimhseáil go hiarbhír, dealraíonn sé, ar an gcéad amharc, go mbeadh sé úsáideach do EPSO an fhaisnéis a leagtar amach sna rialacha ginearálta, nó achoimre uirthi, a chur san áireamh le nasc chuig an bhfaisnéis iomlán, agus san admháil fála a seoladh chuig iarrthóirí a bhfuil athbhreithniú á iarraidh acu freisin.

b. Inneachar na bhfreagraí sealbhaithe

Is minic a thugann EPSO, ina chuid freagraí maidir le hiarrataí ar athbhreithniú, neas-amchlár d’iarrthóirí ina gcuirtear in iúl d’iarrthóirí gur féidir leo a bheith ag súil le freagra. Mar sin féin, is minic a chailltear na tréimhsí ama seo, uaireanta roinnt seachtainí nó fiú míonna. Is é an toradh a bhíonn ar mhainneachtain EPSO na tréimhsí ama a shonraítear a chomhlíonadh ná tuilleadh iarrataí ar fhaisnéis ó iarrthóirí agus, ar an gcaoi sin, bíonn cur i bhfeidhm an nós imeachta um athbhreithniú níos anásta.

c. Faisnéis maidir le féidearthachtaí achomhairc tar éis athbhreithnithe

Ní leagann EPSO amach go sainráite na féidearthachtaí achomhairc ina fhreagraí ar iarrataí ar athbhreithniú. Ceanglaítear le hAirteagal 19 den Chód Eorpach um Dhea-Iompar Riaracháin, áfach, go mbeidh léiriú i gcinneadh a d’fhéadfadh dochar a dhéanamh do chearta nó do leasanna duine phríobháidigh ar na féidearthachtaí achomhairc atá ar fáil chun agóid a dhéanamh i gcoinne an chinnidh.

3. Rialacha agus nósanna imeachta

Ní féidir tuiscint iomlán a fháil ar na saincheisteanna thuas, a cuireadh in iúl dom trí ghearáin, gan tuilleadh faisnéise a fháil faoi na rialacha agus na nósanna imeachta is infheidhme. Tuigim go bhfuil athruithe déanta ag EPSO ar a rialacha maidir leis an nós imeachta um iarraidh ar athbhreithniú. Go háirithe, cuireadh in iúl dom go bhfuil EPSO tar éis a shreabhadh oibre a atheagrú chun iarrataí ar athbhreithniú a láimhseáil. Ba mhaith liom tuilleadh eolais a fháil faoin tsraith nua rialacha seo.

Thairis sin, measaim gur fiú níos mó a fhoghlaim faoin gcaoi a ndéanann boird roghnúcháin a gcúraimí sa nós imeachta um iarraidh ar athbhreithniú. D’fhéadfadh saincheisteanna de chineál eagraíochtúil maidir leis an gcaoi a n-oibríonn boird roghnúcháin a bheith ina gcúis le streachailt EPSO freagraí a thabhairt go tráthúil ar iarrataí ar athbhreithniú.

Ar bhonn an mhéid thuas, agus mar chéad chéim san fhiosrúchán, iarraim ar EPSO cruinniú a eagrú le mo sheirbhísí, i gcomhréir le hAirteagal 3(2) de Reacht an Ombudsman Eorpaigh, ionas go mbeidh siad in ann cigireacht a dhéanamh ar na doiciméid seo a leanas:

• Leagan reatha de rialacha inmheánacha EPSO maidir le hiarrataí ar athbhreithniú a láimhseáil, lena n-áirítear faisnéis faoi athruithe a rinneadh le déanaí ar na rialacha sin.
• Na dréachtlitreacha caighdeánacha ar a bhfuil freagraí EPSO ar iarrataí ar athbhreithniú bunaithe.
• Treoir nua do bhoird roghnúcháin.
• Eolas faoi 'mheitheal iarratais ar athbhreithniú' EPSO agus doiciméid a d'fhéadfadh an mheitheal sin a tharraingt suas.

Deimhnigh, le do thoil, i gcomhréir le hAirteagal 5(2), Airteagal 13(3) agus Airteagal 14(2) d'Fhorálacha Cur Chun Feidhme an Ombudsman Eorpaigh, nach mbeidh de thoradh ar chigireacht an Ombudsman go bhfaighidh tríú páirtithe ná aon duine eile rochtain ar aon doiciméid a shainaithníonn EPSO a bheith rúnda le linn na cigireachta, ná ar aon fhaisnéis atá sna doiciméid sin.

Ba cheart go dtabharfaí deis leis an gcruinniú freisin tuairimí a mhalartú agus soiléirithe a thabhairt ag an gcéim luath sin. Ag brath ar EPSO a bheith ar fáil, bheinn ag súil leis an gcruinniú a bheidh ar siúl sa chéad seachtain de mhí Iúil.

Bheinn buíoch díot dá bhféadfá an fhaisnéis seo a leanas a ullmhú le cur ar fáil do mo sheirbhísí ag an gcruinniú:

• Líon na n-iarrthóirí a chinneann, tar éis dóibh úsáid a bhaint as an nós imeachta um iarraidh ar athbhreithniú, gearán riaracháin a thaisceadh faoi Airteagal 90(2) de na Rialacháin Foirne ar na forais chéanna; líon na ngearán riaracháin sin in 2014 agus sa chéad ráithe de 2015 i gcomparáid le 2013.[4]
• An t-am a thóg sé, ar an meán, ar EPSO déileáil le hiarrataí ar athbhreithniú in 2014 agus sa chéad ráithe de 2015.
• Cé mhéad (agus cé na) cás cúirte a tionscnaíodh in aghaidh EPSO, maidir leis an gcaoi ar láimhseáil sé iarrataí ar athbhreithniú in 2014 agus sa chéad ráithe de 2015, i gcomparáid le 2013.

Bheinn buíoch díot dá bhféadfadh do sheirbhísí teagmháil a dhéanamh le Nastasja Fuxa (teil. + 32 (0)2 283 07 84 ), atá freagrach as an bhfiosrúchán seo, chun teacht ar chomhaontú maidir le dáta áisiúil don chruinniú.

Cinnfidh mé mo chéad chéim eile san fhiosrúchán ar bhonn na faisnéise agus na ndoiciméad a fuarthas ag an gcruinniú. Dá bhrí sin, ní iarraim ar EPSO, ag an gcéim seo, tuairim a thabhairt ar an ábhar.

Tabhair do d’aire, le do thoil, nach bhfuil sé i gceist agam aon fhiosrúcháin atá bunaithe ar ghearáin a oscailt maidir leis na saincheisteanna ar tugadh aghaidh orthu san fhiosrúchán féintionscnaimh seo, fad a bheidh an fiosrúchán seo ar siúl. Féadfaidh mé cinneadh a dhéanamh eisceachtaí a dhéanamh ar an gcur chuige seo i gcásanna eisceachtúla.

Le dea-mhéin,

Emily O'Reilly

[1] Pointe 3.4.3. ‘Nós imeachta um athbhreithniú inmheánach’ rialacha ginearálta EPSO maidir le comórtais oscailte, IO 2014 C 60 A, lch. 1.

[2] San Iarscríbhinn a ghabhann lena tuarascáil dar teideal ‘Putting it Right?’ le haghaidh 2013, chinn an tOmbudsman, maidir leis an obair leantach ar chás 2518/2011/MHZ, gur chosúil go raibh iarraidh EPSO ar nós imeachta athbhreithnithe, a cuireadh i bhfeidhm in 2012, dea-cheaptha chun a áirithiú go bhfaighidh iarrthóirí a dhéanann iarraidh ar athbhreithniú freagra tráthúil agus dea-réasúnaithe. Bhí measúnú an Ombudsman bunaithe ar dhearadh nós imeachta iarratais EPSO ar athbhreithniú ag an bpointe ama sin, agus ba í 2013 an bhliain tagartha. Tá an fiosrúchán féintionscnaimh seo bunaithe ar fhorbairtí fíorasacha agus ar fhorbairtí nós imeachta, ar cosúil gur tháinig siad chun cinn in 2014.

[3] Breithiúnas Bhinse na Seirbhíse Sibhialta an 22 Eanáir 2015 i gCásanna F-1/14 agus F-48/14, Kakol v an Coimisiún, EU:F:2015:3, mír 86.

[4] Chuir EPSO figiúirí ábhartha ar fáil - don bhliain 2013 i gcomparáid le 2012 - ina obair leantach ar fhiosrúchán an Ombudsman ar chás 2518/2011/MHZ.