28 Deireadh Fómhair 2014

Tá áthas orm gur cosúil go bhfuil athbhreithniú á dhéanamh ag an mBanc Ceannais Eorpach (BCE) ar a dhiúltú rochtain a thabhairt ar an litir a scríobh iar-Uachtarán BCE, Jean-Claude Trichet, chuig Aire Airgeadais na hÉireann i mí na Samhna 2010. D'iarr an litir, a seoladh i lár na géarchéime airgeadais, ar rialtas na hÉireann beart tapa a dhéanamh chun cobhsaíocht chóras airgeadais na hÉireann a chosaint.

Agus mé ag gníomhú ar ghearán ó iriseoir Éireannach, cháin mé Comhairle Rialaithe an BCE cheana féin i mí an Mhárta 2014 as deis trédhearcachta a chur amú trí gan an litir a scaoileadh. Tar éis iniúchadh a dhéanamh ar an litir, tháinig mé ar an gconclúid go raibh sé de cheart ag BCE rochtain ar an doiciméad a dhiúltú tráth na hiarrata ar rochtain. Mar sin féin, ós rud é go bhfuil níos mó ná trí bliana caite ó seoladh an litir, mhol mé do BCE an litir a nochtadh anois chun béim a leagan ar a thiomantas don trédhearcacht.

Ag an am, thug BCE údar lena dhiúltú an litir a nochtadh mar gheall ar an ngá atá le cobhsaíocht airgeadais na hÉireann a chosaint. De réir BCE, seoladh an litir i gcomhthéacs brú suntasach sa mhargadh agus éiginnteacht mhór maidir leis na hionchais do gheilleagar na hÉireann.

Tá súil agam go dtiocfaidh an BCE ar chinneadh go tapa anois an litir a scaoileadh, ós rud é go bhfuil athrú suntasach tagtha ar staid eacnamaíoch agus airgeadais na hÉireann idir an dá linn.