Strasbourg, 11/02/2021

Gearán 253/2021/MIG

Ábhar an cháis: Cinneadh an Choimisiúin Eorpaigh síneadh a chur leis an spriocdháta dá fhreagra ar iarraidh ar rochtain phoiblí maidir le hiompar eallaí pórúcháin chuig tíortha nach Ballstáit den Aontas iad (do thagairt: GestDem 2021/0046)

A Uasail Linder, a chara,

Fuair an tOmbudsman gearán ón X a ndearna an tUasal X ionadaíocht air i gcoinne an Choimisiúin Eorpaigh. D'iarr sí orm déileáil leis an gcás ar a son.

Baineann an gearán le hiarraidh ar rochtain phoiblí, dar dáta an 28 Nollaig 2020, ar liosta onnmhairí eallaí pórúcháin ón nGearmáin chuig tíortha nach Ballstáit den Aontas iad sa bhliain 2020. An 25 Eanáir 2021, chuir an Coimisiún in iúl don ghearánach go raibh air síneadh 15 lá oibre a chur leis an sprioc-am chun déileáil leis an iarraidh, is é sin, go dtí an 16 Feabhra 2021. D’áitigh sé go raibh gá le teorainn ama fhadaithe toisc gur tháinig an doiciméad a iarradh ó thríú páirtithe, a ndeachthas i gcomhairle leo.

 An 26 Eanáir 2021, thug an gearánach freagra ar an gCoimisiún, ag cur i gcoinne síneadh a chur leis an spriocdháta agus ag iarraidh an fhaisnéis a iarradh a fháil faoin 29 Eanáir 2021. Áitíonn an gearánach nár comhlíonadh na ceanglais dhlíthiúla atá ar an gCoimisiún síneadh a chur lena spriocdháta. Áitíonn sé nach raibh an cás “eisceachtúil” agus nár thug an Coimisiún “cúiseanna mionsonraithe” le síneadh a chur leis an teorainn ama.

Tar éis don ghearánach gan aon fhreagra a fháil ón gCoimisiún, chuaigh sé i dteagmháil leis an Ombudsman an 30 Eanáir 2021. An 10 Feabhra 2021, dheimhnigh an gearánach dár nOifig nach bhfuair sé freagra fós ón gCoimisiún, ná ní dhearna sé agóid i gcoinne síneadh a chur leis an teorainn ama ná i gcoinne a iarrata ar rochtain.

Chinneamar fiosrúchán a oscailt maidir leis an ngearán i gcoinne chinneadh an Choimisiúin síneadh 15 lá oibre a chur leis an teorainn ama dá fhreagra ar iarraidh an ghearánaigh ar rochtain an 28 Nollaig 2020.

Luaitear i Rialachán 1049/2001 gur cheart iarratais ar rochtain a láimhseáil go pras. Tá sé i gcomhréir leis an bprionsabal sin go bhféachaimid freisin le déileáil le cásanna den sórt sin a luaithe is féidir.

Mar chéad chéim, measaimid gur gá athbhreithniú a dhéanamh ar na malartuithe idir an Coimisiún agus údaráis na Gearmáine (ar thagair an Coimisiún dóibh ina ríomhphost chuig an ngearánach an 25 Eanáir 2021). Bheimis buíoch dá bhféadfadh an Coimisiún cóipeanna de na doiciméid sin a chur ar fáil dúinn, i bhformáid leictreonach más féidir (trí ríomhphost criptithe), faoin Déardaoin, an 18 Feabhra 2021.

Aon ábhar a roghnaíonn an Coimisiún a roinnt linn a léiríonn go bhfuil sé faoi rún, déileálfar leis faoi rún. Déanfar ábhar den sórt sin a láimhseáil agus a stóráil i gcomhréir leis an stádas rúnda sin agus scriosfar é ó chomhaid an Ombudsman go gairid tar éis dheireadh an fhiosrúcháin.

Leagadh amach réasúnaíocht an Choimisiúin maidir leis an síneadh ar an teorainn ama ina ríomhphost an 25 Eanáir 2021. Mar sin féin, más mian leis an gCoimisiún tuairimí breise a chur ar fáil, a chuirfidh an tOmbudsman san áireamh le linn an fhiosrúcháin seo, bheinn buíoch dá bhféadfaí iad a chur ar fáil dúinn laistigh de chúig lá oibre dhéag ón litir seo a fháil, is é sin, faoin Déardaoin, an 4 Márta 2021. Go sonrach, bheadh sé úsáideach dá bhféadfadh an Coimisiún a mhíniú cén fáth ar mheas sé go raibh an cás seo eisceachtúil de réir bhrí Airteagal 7(3) de Rialachán 1049/2001.

Tuigimid gurb é seo an tríú huair laistigh de bhliain amháin go bhfuil iarraidh den chineál céanna déanta ag an ngearánach ar rochtain phoiblí agus é ag iarraidh faisnéis thráthúil a fháil ón gCoimisiún.^[1] Dá bhrí sin, iarraimid ar an gCoimisiún a chinntiú go bhfaighidh an gearánach freagra ar a iarraidh ar rochtain laistigh den spriocdháta sínte, is é sin, faoin 16 Feabhra 2021 ar a dhéanaí, agus cóip den fhreagra sin a roinnt linn.

Is é Michaela Gehring an láimhseálaí cásanna atá freagrach as an bhfiosrúchán seo.

Le dea-mhéin,

Rosita Hickey
Stiúrthóir Fiosrúcháin

[1] Tagairtí: GestDem 2020/1339 agus 2020/3359 (faoi réir fhiosrúchán 73/2021/MIG ón Ombudsman).