Ursula von der Leyen

Uachtarán

An Coimisiún Eorpach

Strasbourg, 05/06/2020

Gearán 720/2020/EWM

Ábhar: Diúltú an Choimisiúin Eorpaigh rochtain phoiblí a thabhairt ar an tuarascáil chríochnaitheach ar iniúchadh maidir le coinbhleachtaí leasa a d’fhéadfadh a bheith ag X agus ag Príomh-Aire Phoblacht na Seice - GESTDEM 2020/0663

A Uachtaráin, a chara,

Chuir mé tús le fiosrúchán ar ghearán ón Uasal X i gcoinne an Choimisiúin Eorpaigh maidir le rochtain phoiblí ar an tuarascáil chríochnaitheach ar iniúchadh maidir le coinbhleachtaí leasa X agus Phríomh-Aire Phoblacht na Seice.  

Rinne m’fhoireann fiosrúcháin athbhreithniú ar an doiciméad a iarradh, is é sin, an tuarascáil chríochnaitheach ar iniúchadh Uimh. REGC414CZ0133 a bhaineann leis an tSeicia maidir le feidhmiú na gcóras bainistíochta agus rialaithe atá i bhfeidhm chun coinbhleachtaí leasa a sheachaint.

Baineann an doiciméad seo agus na hiarscríbhinní a ghabhann leis le gníomhaíochtaí an Choimisiúin maidir leis na líomhaintí faoi choinbhleachtaí leasa a d’fhéadfadh a bheith ann lena mbaineann ionadaí poiblí ardleibhéil agus méideanna suntasacha de chistí an Aontais. Le feasacht an phobail ar ghníomhaíochtaí an Choimisiúin, cuirtear in iúl don phobal an bhfuil na céimeanna ábhartha uile á nglacadh ag an gCoimisiún, agus ag údaráis na Seice, in am trátha, chun leasanna airgeadais an Aontais a chosaint agus chun a áirithiú go n-urramófar an smacht reachta. Measaim, dá bhrí sin, go bhfuil leas mór ag an bpobal an tuarascáil iniúchóireachta chríochnaitheach seo a chur ar fáil do shaoránaigh an Aontais a luaithe is féidir.

Ina chinneadh daingniúcháin an 23 Aibreán 2020, dhiúltaigh an Coimisiún rochtain phoiblí ar an tuarascáil ar an mbonn nach raibh an próiseas iniúchóireachta críochnaithe go fóill.^[1] Mhínigh an Coimisiún don ghearánach gur iarradh ar údaráis an Bhallstáit atá i gceist freagra a thabhairt ar thorthaí sheirbhísí iniúchóireachta an Choimisiúin faoin 5 Meitheamh 2020.

Aontaíonn an tOmbudsman sa chás seo nach féidir a mheas go bhfuil an t-iniúchadh atá i gceist curtha i gcrích go dtí go dtabharfaidh an Ballstát barúlacha maidir leis an tuarascáil chríochnaitheach.

I bhfianaise leas suntasach an phobail, áfach, bheadh sé ina chuidiú freagra i scríbhinn a fháil ón gCoimisiún chun a dheimhniú go bhfoilseoidh an Coimisiún an tuarascáil iniúchóireachta chríochnaitheach go réamhghníomhach a luaithe a bheidh an t-iniúchadh críochnaithe.

Bheadh sé úsáideach freisin tuiscint a fháil ar an gcéim ag a measfaidh an Coimisiún go bhfuil an t-iniúchadh curtha i gcrích. Más féidir fráma ama táscach a thabhairt, bheadh sé sin cabhrach freisin.

Ina theannta sin, bheadh sé úsáideach freagra i scríbhinn a fháil ón gCoimisiún maidir le hargóint an ghearánaigh go bhfuil sé d’oibleagáid ar an gCoimisiún an tuarascáil iniúchóireachta a fhoilsiú tar éis í a thabhairt chun críche má mhaíonn sé go n-oibríonn sé de réir chaighdeáin ISSAI, lena n-áirítear go sonrach, cé na caighdeáin is infheidhme sa chás seo agus cén fáth.

Tabhair faoi deara le do thoil gur dócha go seolfaidh mé do fhreagra agus iatáin ghaolmhara chuig an ngearánach le haghaidh tuairimí^[2]. Bheinn buíoch, dá bhrí sin, dá bhféadfadh an Coimisiún aistriúchán ar an bhfreagra féin a chur isteach i nGearmáinis, arb í teanga an ghearáin í.

Bheinn buíoch as freagra an Choimisiúin a fháil faoin 6 Iúil 2020. Más rud é, le linn an fhiosrúcháin seo, go mbeidh an Coimisiún páirteach in imeachtaí cúirte a bhaineann leis an ábhar céanna leis an ngearán seo, iarraim ort é sin a chur in iúl dúinn.

Le dea-mhéin,

Emily O'Reilly An tOmbudsman
Eorpach

[1] Airteagal 4(2), an tríú fleasc, de Rialachán 1049/2001.

[2] Más mian leat doiciméid nó faisnéis a chur isteach a mheasann tú a bheith rúnda, agus nár cheart a nochtadh don ghearánach, déan iad a mharcáil ‘Rúnda’. Is féidir doiciméid den sórt sin a sheoladh trí bhealaí slána, amhail Ares, CIRCABC nó feidhmchláir choibhéiseacha. Is féidir teagmháil a dhéanamh leis an láimhseálaí cásanna roimh ré, más gá.